Kuó u Aʻu ki ʻApi

Naʻá ku folau ki Luanitā (Rwanda), fakataha mo ha kau toketā tokosiʻi kehe ke tokoni ʻi he ngaahi fie maʻu fakafaitoʻó, ko ha konga ʻo ha ngāue tokoni. ʻOsi ha uike ʻe ua, kuo kamata ke haʻu māmālie ʻa e taʻelatá, ʻi he ofi ki he ngataʻanga ʻo ʻeku folaú. Naʻá ku ʻofa ki hoku fāmilí, mohenga moluú, pea mo hoku ʻapí.

Naʻá ku lava ʻi hoku Sāpate fakaʻosi ʻi ʻAfiliká ke fakafekauʻaki ha taimi tēpile ke u lava ʻo ʻalu ki he lotú. Neongo naʻe teʻeki fokotuʻu fakalelei ʻa e Siasí ʻi Luanitā, ka naʻá ku lava ʻo maʻu e taimi fakatahá mo e ngaahi fakahinohinó ʻi he uepisaiti ʻa e Siasí.

He toki fakahinohino faingataʻa moʻoni: “Lue atu he hala tanumakamaká mei he fale Fakapuleʻangá. Kumi e matapā ʻo ha ʻā ʻoku ava. Pea hifo atu ʻi he ngaahi sitepú.”

ʻI heʻeku muimui ki he ngaahi fakahinohinó, naʻá ku kamata ke fanongo ki ha ongo ʻo ha himi naʻá ku ʻiloʻi lelei. Naʻá ku hifo atu he sitepú, pea ongona ʻe hoku telingá ʻa e ngaahi lea ʻo e “ʻE Kāinga Kuo Langa ha Tuʻungá” (Ngaahi Himi, fika 37). Naʻe ngata e sitepú ʻi ha kiʻi fale, naʻe tuʻu ha kakai fofonga malimali toko lahi he hūʻangá. Neongo ko e muli au ki he haʻofangá, ka naʻá ku ongoʻi ko hanau taha au. Naʻe laka mai ha kakai Luanitā toko lahi ke lulululu mo au, pea ʻi heʻenau fai iá, ne mōlia atu e mafasia ʻo e taʻelatá meiate au—naʻá ku ʻi ʻapi!

ʻI heʻeku hū ki he falé, naʻá ku kau ai ʻi ha lotu houa ʻe tolu naʻe ʻikai toe kehe mei hoku uooti totonu ʻi Kalefōniá. Naʻe tufa ʻa e sākalamēnití ʻe he kau maʻu Lakanga Taulaʻeiki Faka-ʻĒloné, naʻe fakatefito ʻa e ngaahi malangá ʻi he Fakamoʻuí, pea naʻa mo e lēsoni Lautohi Faka-Sāpaté, ko e lēsoni tatau pē ia naʻe akoʻi ʻi hoku uooti totonú he uike ko iá.

Ko e meʻa mahuʻinga tahá, naʻá ku ongoʻi moʻoni e Laumālie ʻo e ʻEikí he lolotonga ʻo e ngaahi houa lotú. ʻOku mahino, naʻe hōifua ʻa e ʻEikí ki he kakai lelei ko ʻeni ʻoku fai honau lelei tahá ke tauhi kiate Iá. Naʻá ku toki ʻilo ko ha niʻihi tokosiʻi pē ʻo e kakai Luanitaá naʻe maʻu lotu heni ʻi he taʻu ki muʻá. Ka, naʻá ku lau ha kakai ʻe toko 100 tupu, ko hanau vaeua ko e fānau fofonga malimali.

Ko ʻeni kuo fakaava ʻa Luanitā ki he ngāue fakafaifekaú, pea ʻoku ou ʻamanaki ʻe ola lelei e ngāue ʻa e kau faifekaú hangē ko hono fakamoʻoniʻi ʻe he Laumālié ki ha tokolahi ange ʻo e kau fiefanongo Luanitaá ko e Siasi kuo fakafoki maí, ko e puleʻanga ia ʻo e ʻOtuá ki he māmaní kotoa—ki he konitinēniti, kakai, mo e fānau kotoa pē ʻa e ʻOtuá. ʻOku ou fakafetaʻi lahi ki he Siasí, tatau ai pē pe ʻoku tuʻu ʻi he matāfanga lotoloto ʻo Kalefōniá pe ʻi mui atu ʻi ha kiʻi hala tanu makamaka ʻi ʻAfilika lotoloto.