Thawj Pawg Thawj Tswj Hwm Tsab Xov, Kaum Hli Ntuj 2013
Peb txoj Kev Lav Ris Kom Pab Cawm Tib Neeg
Qhov uas Haiv Neeg Ntseeg yuav tsum muab peb cov kwv tij thiab cov muam uas tsis tshua muaj siab ntseeg lub Koom Txoos lawm cawm dim yog ib qho tseem ceeb. Peb puas paub cov neeg zoo li no uas ib txwm ntseeg txoj moo zoo? Yog tias muaj li no, peb txoj hauj lwm kom pab cawm lawv dim yog zoo li cas?
Cia li xav txog cov uas poob zoo uas yog cov neeg laus, cov poj ntsuam yawg ntsuag, thiab cov muaj mob muaj nkeeg. Feem ntau lawv nyob lawv kho siab khuav. Thaum yus laus zuj zus, thaum yus tsis noj qab nyob zoo ntau pes tsawg, thaum qaug zog, thaum tsis muaj kev cia siab, lawv xav tau ib tug neeg uas muaj ib lub siab khuv leej lawv thiab xav cev tes mus txhawb nqa lawv.
Kuj muaj lwm tus uas xav tau kev cawm dim thiab. Ib txhia ua kev txog kev txhaum lawm ho lwm tus ntshai, tsis quav ntsej, los yog tsis kawm txawj ntse. Txawm yog li cas los xij, lawv nyob nrug deb es tsis nquag mus koom lub Koom Txoos lawm. Thiab lawv yeej yuav nyob ntawd tsis tau kev cawm dim yog tias peb—cov uas nquag mus koom lub Koom Txoos—tsis muaj ib lub siab xav pab cawm lawv dim.
Yuav Tsum Muaj Ib tug Neeg Qhia Kev
Ntau xyoo dhau los lawm kuv tau txais ib tsab ntawv los ntawm ib tug neeg uas tau tso lub Koom Txoos tseg lawm. Ntxim tu siab uas tsab ntawv no hais txog peb cov mej zeej ib txhia. Tom qab uas nws piav saib yog vim li cas nws thiaj tsis tuaj mus tom lub koom txoos lawm, nws sau ntawv tias:
“Yav thaud, kuv muaj ntau, nim no kuv muaj tsawg. Kuv tsis zoo siab hlo li thiab zoo li kuv lub neej puas tsuaj. Txoj moo zoo tseem nyob hauv kuv nruab siab, tiam sis kuv tsis coj raws li txoj moo zoo qhia. Kuv thov kom nej thov Vajtswv rau kuv.
“Thov kom nej nco qab ntsoov peb cov uas nyob sab nraum no—cov Ntseeg hauv Hnub Nyoog Kawg uas poob zoo lawm. Kuv paub tias lub Koom Txoos nyob qhov twg, tiam sis qee zaum kuv xav tau ib tug neeg qhia kuv kev, yaum kuv, pab kom kuv tsis txhob ntshai, thiab ua tim khawv rau kuv.”
Thaum kuv nyeem tsab ntawv no, kuv txawm xav txog lub sij hawm uas kuv tau mus xyuas ib lub tsev khaws duab uas zoo kawg—Victoria thiab Albert Museum hauv London, Akiv teb. Nyob ntawd, yog ib daim duab zoo nkauj heev uas Joseph Turner tau teeb thaum xyoo 1831. Daim duab no muaj tej tauv huab dub nciab thiab tej dej hiav txwv uas muaj tej nthwv dej loj, zoo li yuav muaj xwm txheej. Muaj ib lub teeb uas ci ci los ntawm ib lub nkoj nyob nrug deb me ntsis es zoo li nws khuam dab tsi lawm. Nyob tom hauv ntej yog ib lub nkoj cawm neeg txoj sia uas tiv qees tej nthwv dej loj. Cov txiv neej rub tej tus nquam nkoj mus tom ntej. Nyob tim ntug dej muaj ib tug poj niam thiab ob tug me nyuam, thawm ntub nag thiab tiv cov cua uas nplawm lawv. Lawv ntsia ntsoov cov dej hiav txwv saib cov txiv neej cawm puas tau lawv tus neeg. Kuv tau hloov lub npe ntawm daim duab ntawd. Nim no, rau kuv, nws hu ua Mus Cawm tus uas Poob Zoo Kom Dim.1
Nyob hauv lub neej no tej cua daj cua dub, yeej muaj xwm txheej. Cov txiv neej thiab poj niam, covtub thiab ntxhais, lawv puav leej pom tias lawv khuam dab tsi lawm thiab twb yuav raug puas tsuaj mus. Leej twg yuav nquam nkoj cawm neeg txoj sia, tso tseg tej yam zoo tom tsev, thiab mus pab cawm tus poob zoo kom dim?
Peb txoj hauj lwm tsis yog ib yam uas peb kov yeej tsis tau. Peb twb yog ua tus Tswv tej hauj lwm; thiab Nws yeej yuav pab peb.
Thaum tus Xib Hwb ua hauj lwm hauv lub ntiaj teb no, Nws hu ib co neeg nuv ntses tom Kalilais los tso lawv tej vas tseg thiab raws nws qab, nws hais tias, “Kuv yuav qhia kom nej paub mus nrhiav neeg.”2 Thov kom peb koom ua ke mus nrhiav kom tau neeg, txiv neej thiab poj niam, kom peb thiaj pab tau ua txhua yam uas peb ua tau.
Peb lub luag hauj lwm yog kom cev tes mus pab cawm cov neeg uas tsis tshua muaj siab ntseeg lawm kom dim, kom cov neeg zoo li ntawd thiaj nrog tus Tswv zaum ua ke rau ntawm Nws lub rooj noj mov thiab muaj Nws tus ntsuj plig nrog nraim lawv nyob thiab kom lawv “tsis yog lwm haiv neeg lawm, nej yog Vajtswv haiv neeg. Nej muaj feem ib yam li Vajtswv haiv neeg, thiab nej yog Vajtswv tsev neeg lawm.”3
Ntsiab Cai ntawm Kev Hlub
Kuv pom tau tias muaj ob yam uas pab tib neeg rov qab los mus koom lub koom txoos, ua rau lawv muaj lub siab xav hloov lawv tus cwj pwm, thiab tej yam lawv ua. Qhov xub thawj, muaj leej twg tau qhia cov neeg zoo li no hais tias lawv yuav ua tau neeg li cas thaum lub neej nyob mus ib txhis thiab cov neeg no tau txiav txim siab ncav kom tau lub hom phiaj ntawd. Lawv tsis txaus siab rau lawv tus kheej thaum lawv pom tau hais tias lawv ncav tau qhov zoo kawg nkaus.
Qhov thib ob, lwm tus neeg rov qab los vim cov uas hlub lawv los yog “haiv neeg ntseeg” tau ua raws li tus Cawm Seej cov lus qhuab ntuas kom hlub lawv cov neeg zej zog ib yam li lawv hlub lawv tus kheej,4 thiab pab lawv tus neeg zej zog ntawd ncav tau nws lub hom phiaj.
Qhov tseem ceeb tshaj ntawm tej no yog—thiab tseem yuav yog tom ntej mus—txoj ntsiab cai ntawm txoj kev hlub.
Tiag tiag, lawv cov uas nyob hauv lub nkoj uas tau khuam dab tsi hauv cov cua daj cua dub hauv Turner daim duab zoo puav tam li peb cov mej zeej uas tsis tshua muaj siab ntseeg uas tos ntsoov cov uas nyob hauv lub nkoj cawm neeg txoj sia pab cawm lawv kom dim. Lawv tej siab tej ntsws tos ntsoov tej kev pab no. Ib tsoom niam thiab txiv thov Vajtswv pab lawv cov tub thiab cov ntxhais. Ib tsoom poj niam thov ntuj kom pab lawv cov txiv. Qee zaum yog cov me nyuam uas thov Vajtswv pab lawv cov niam txiv.
Kuv thov Vajtswv kom peb muaj siab xav cawm cov uas tsis tshua muaj siab ntseeg dim kom coj lawv rov qab los koom Yexus Khetos txoj moo zoo, kom lawv thiaj nrog peb koom txais txhua txoj koob hmoov uas muaj.
Kuv thov kom peb yuav muaj peev xwm cev tes mus pab cov tub rog uas poob zoo lawm uas nyob ib ncig ntawm peb: cov neeg laus, cov poj ntsuam, cov muaj mob muaj nkeeg, cov xiam hoob khab, thiab cov uas tsis nquag tuaj tshawj lawm. Cev tes mus pab lawv thiab muaj kev khuv leej rau lawv. Yog peb ua li ntawd, peb yuav ua rau lawv muaj kev xyiv fab, thiab peb yuav tau txoj kev txaus siab uas los rau peb thaum peb pab lwm tus neeg taug txoj kev mus txais lub neej nyob mus ib txhis.
© 2013 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/13. Pub txhais ua lus Hmoob: 6/13. Kev txhais lus First Presidency Message, October 2013. Hmong. 10670 295
Qhia los ntawm tsab Xov No
Cia li xav seb puas xav nug neeg uas koj mus xyuas seb lawv puas paub leej twg uas nyuaj rau lawv tuaj koom lub koom txoos. Tej zaum koj xaiv tau ib tug neeg thiab sib tham txog tej yam nej ua tau kom qhia nws tias nej hlub nws, xws li caw nws koom tsev neeg hmo ua ke los yog tuaj noj mov.