2013
Yexus Khetos lub Luag Hauj Lwm Los Saum Ntuj Los: Tus Tsim Txhua Yam
October 2013

Cov Mus Xyuas tom Tsev tsab Xov, Kaum Hli Ntuj 2013

Yexus Khetos lub Luag Hauj Lwm Los Saum Ntuj Los: Tus Tsim Txhua Yam

Ua tib zoo thov Vajtswv kawm tej yam no thiab, thaum tsim nyog ua, sib tham txog tej no nrog cov viv ncaus uas koj mus xyuas. Siv tej lus nug no pab koj txhawb koj cov viv ncaus lub zog thiab ua kom lub Koom Haum Niam Tsev muaj feem hauv koj lub neej. Kom tau ntaub ntawv xov xwm ntxiv, cia li txuas rau reliefsociety.lds.org.

Kev Ntseeg, Tsev Neeg, Kev Pab

Yexus Khetos “tsim lub ntuj thiab lub ntiaj teb” (3 Nifais 9:15). Nws tau ua li no los ntawm lub hwj chim pov thawj hwj, raws li peb Leej Txiv Saum Ntuj Ceeb Tsheej coj (saib Mauxes 1:33).

“Peb yuav tsum ua Vajtswv tsaug vim tus uas Tsim Txhua Yam uas muaj tswv yim tau ua ib lub ntiaj teb thiab tso peb nyob rau haud,” tus Thawj Tswj Hwm Thomas S. Monson tau hais, “… kom yuav muaj sij hawm sim peb lub siab, ib lub cib fim qhia tias peb tsim nyog txais tag nrho tej yam uas Vajtswv tau npaj rau peb txais lawm.”1 Thaum peb siv peb txoj kev ywj siab xaiv ua raws li Vajtswv tej lus txib thiab hloov siab lees txim, peb tsim nyog rov qab mus nrog Nws nyob.

Hais txog Kev Tsim Ntuj Tsim Teb Raug, Thawj Tswj Hwm Dieter F. Uchtdorf, tus Pab Cuam thib Ob hauv Thawj Pawg Thawj Tswj Hwm, tau hais:

“Yog vim peb, nws thiaj li tsim lub qab ntuj khwb no! …

“Nov yog qhov txawv txav rau tib neeg: piv rau Vajtswv, tib neeg tsis tseem ceeb dab tsi; tiam sis peb tseem ceeb tshaj plaws rau Vajtswv.”2 Qhov uas peb paub tias Yexus Khetos tsim lub ntiaj teb rau peb vim peb muaj nqi tshaj plaws rau Leej Txiv Saum Ntuj Ceeb Tsheej yuav pab peb txoj kev hlub Nkawd loj zuj zus tuaj.

Los ntawm cov Vaj Lug Kub

Yauhas 1:3; Henplais 1:1–2; Mauxiyas 3:8; Mauxes 1:30–33, 35–39; Anplaham 3:24–25

Los ntawm Peb zaj Keeb Kwm

Vajtswv tau tsim peb kom muaj yam ntxwv zoo li nws (saib Mauxes 2:26–27), thiab peb muaj peev xwm los saum ntuj los. Tus Yaj Saub Yauxej Xamiv ntuas cov viv ncaus hauv lub Koom Haum Niam Tsev kom lawv “ua neej raws li [lawv] lub cib fim.”3 Vim muaj kev txhawb nqa no ua ib lub hauv paus, cov viv ncaus hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg tau kawm ua raws li lawv txoj kev muaj peev xwm uas los saum ntuj los thaum lawv ua raws li tej lub hom phiaj uas Vajtswv tau teev cia rau lawv. “Thaum lawv to taub tias lawv yog leej twg tiag tiag—Vajtswv cov ntxhais, uas muaj peev xwm hlub thiab saib xyuas—lawv yuav ua raws li lawv muaj peev xwm ua poj niam dawb huv.”4

Tus Yaj Saub Yauxej Xamiv hais tias “Tam sim no nej muaj peev xwm ua raws li tej kev xav uas Vajtswv tau muab rau hauv nej lub siab lub ntsws. Yog nej ua raws li tej ntsiab cai no ces yuav zoo kawg nkaus rau nej!—yog tias nej ua neej raws li nej tej cai, yuav txwv tsis tau cov tim tswv los ua nej tus khub.”5

© 2013 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/13. Pub txhais ua lus Hmoob: 6/13. Kev txhais lus Visiting Teaching Message, October 2013. Hmong. 10670 295

Lus Cim

  1. Thomas S. Monson, “The Race of Life,” Liahona, Tsib Hlis Ntuj 2012, 91.

  2. Dieter F. Uchtdorf, “You Matter to Him,” Liahona, Kaum Ib Hlis Ntuj 2011, 20.

  3. Yauxej Xamiv, hauv Daughters in My Kingdom: The History and Work of Relief Society (2011), 171.

  4. Daughters in My Kingdom, 171.

  5. Yauxej Xamiv, hauv Daughters in My Kingdom, 169.

Kuv Yuav Pab Li Cas?

  1. Qhov uas peb xav to taub qhov uas peb los saum ntuj los yuav ua kom peb txoj kev hlub tus Cawm Seej loj tuaj li cas?

  2. Peb yuav ua li cas qhia Vajtswv tias peb ua Nws tsaug rau tej yam Nws tau tsim?