Iren Mahsen en Presidensi Keieu, Oaktohpe 2013
Atail Pwukoa en Doarehla
Ong Souleng en Imwin Rahn Akan, anahnepen doarehla riatail ohl oh lih akan me, pwehki kahrepe sohte lipilipil, weidsangehr nan ahl en kin towtowe kemwekid kan en Mwomwohdiso, wia mehkot me mie kesempwalpe poatoapoat. Mie me kitail ese me mahs kin poakohng rongamwahuo? Ma iei, dahkot atail pwukoa en doareirailla?
Medewe irail me salongalahr nanpwungen me mah, me arail pwoud melahr, oh me soumwahu. Re kin kalapw dierek nan irair me rasehng sapwtehn en kelekelehpw me kahdaniki loaloid. Ansou me aramas kin mahla, soumwahula, luwetala, ansou me marain en koapwoaroapwoar kin tikitikla, aramas pwukat kak kakehlailda oh utuhtda sang ni peh me kin sawas oh mohngiong me ese duwen limpoak.
Udahn mie, ekei me anahne doandoarla. Ekei kin toutouki dihp ah ekei kin weidseli mwahl ni masepwehk de soukautih de sawehwe. Pwehki kahrepe sohte lipilipil, irail pein kadohwanirailsang towe Mwomwohdiso. Oh irail udahn pahn sansalongete ma e sohte mwekidda loalatail—tohn Mwomwohdiso me kin sansarawi—ineng en doare oh sawas.
Emen Mehn Kasalehda Ahlo
Ansoukis samwalahro I alehdi kisin likou kis sang ohl emen me dohlahsang Mwomwohdiso. Met wiawihiongehr tohtohn iengetail aramas akan. Mwurin ohlo eh kawehwe duwen eh sohla kin iang sarawi, e ntingihdi:
“Laud me I ahniki mahs ahpw met udahn tikitiklahr. I nsensuwed oh pehm me I sohte kin pweida nan soahng koaros. Rongamwahuo sohte kohsang nan mohngiongie, mendahte eh solahr mih nan ahi mour. I peki amwail kapakap kan.
“Menlau dehr manokehla kiht me mihmi liki—Souleng en Imwin Rahn Akan me salongalahr. I ese ia wasa Mwomwohdiso mihie, ahpw ekei pak I kin leme me I anahne emen en kasalehiongie ahlo, kangoangeie, kihsang ahi masepwehk, oh kihda kadehde ong ie.”
Ni ansou me I wadewadek kisin likou kiset, I tamanda ansou kis me I pwarek ehu wasahn kasale mahlen oh kilel me ndand nan sampah—me iei Victoria and Albert Museum nan London, England. Wasao, mie kilel kaselel ehu me litopda nan 1831 sang Joseph Mallord William Turner. Mahleno kasalehda depwek toutou, toantoal oh sehd angin me wia kasalepen keper oh mehla. Lingen dengki sang sohp pwoat sansaldohsang wasa doh. Me sansal mwahu nan kilelo, iei lapalahn pwoht pwoat en doarehla aramas, me ilok en sehd angin wie keskeseseli. Ohl oko sei kehlail ni pwohto eh dikoulongalahng nan melimelo. Lih emen oh nah seri riemen keskesihnen pohn oaroahro, wisekesengkilahr kotou oh kisinieng ipihpir ira. Re kilikilenglahng nan sehdo ni pwunod. Nan ahi madamadau I kamwotehla eden mahleno. Ongie eden mahleno wiahla Kohlahng Doarehla.1
Nan melimel kan en mour, mie irair keper. Ohl oh lih, pwutak oh serepein kin diarada me irail seradahr oh sohsohpai ohla. Ihs me pahn katanga pwoht kan en doarehla aramas, pwilikihdi soanamwahu en ihmw oh peneinei, oh kolahng doareirailla?
Atail pwukoa wet kitail kak kapwaiada. Kitail alehier ilek sang Kauno; kitail pahn alehdi Sapwellime sawas.
Erein sapwellimen Kauno kalohk, E luke sounlaid kan nan Kalili en kihdi arail uhk kan oh idawehn Ih, mahsanih, “I ahpw pahn padahkihong kumwa duwen laidih aramas akan.”2 Kitail en patehng irail sounlaid kan en ohl oh lih, pwe kitail en kihda sawas sohte lipilipil me kitail kak.
Atail pwukoa iei en doarehla irail akan me kohkohsangehr irair en doandoarla me kohsang towtowe, pwe irail en kak kopwurupwurdohng Kauno pwehn tungoale Sapwellime mahsen, paieki iangahng en Sapwellime Ngehn oh en “solahr wia mehn liki de tohn wehin liki, pwe met [irail en] wialahr sapwellimen Koht pilipil me uhdahn tohn wehiteieu oh kisehn sapwellimen Koht peneinei.”3
Tepin Padahk en Limpoak
I diaradahr me mie kahrepe kesempwal riau me kin elehieng aramas ahr kin pwurodohng sarawi oh wekidala arail madamadau, tiahk, oh mwekid. Keieu, aramas akan kin pwurodo pwehki mie aramas me kasalehieng irail soahng kan me poatoapoat me kak pweida oh seweseirail en nantiong kapwaiada. Irail me sohte kalapw towe sohte pahn men soukautih ni arail pahn kilang me re kak alehdi mehkot me mwahusang.
Keriau, aramas kin pwurodo pwehki kompoakapahrail de “iengarail souleng kan” idawehnla poahngoak en Kauno, oh poakohng mehn mparail kan duwehte pein irail,4 oh sewese mehteikan en kapwaiada arail ouraman kan oh soahng kan me re men kapwaiada.
Me kin wekidala aramas nan irair wet—oh pahn doudoulahte—iei tepin padahk en limpoak.
Ni mehlel, aramas oko me diar apwal nan sehd angin nan ahn Turner mahleno duwehte tohto iengetail aramas me solahr kin kalapw kohdo sarawi me awiawih irail me kin katanga pwoht kan en doareirail. Mohngiongirail kin kasik sawas. Nohno oh pahpa kan kin kapakapki neirail pwutak oh serepein kan. Lih pwopwoud kan kin peki rehn Kauno me arail pwoud kan en kak alehdi sawas. Ekei pak serihkan kin kapakapki arail pahpa nohno.
Ahi kapakap iei me kitail en ahniki ngoang en doarehla irail me sohte kin kalapw sarawi oh en kapwureiraildo ong nan popohl en rongamwahu en Sises Krais, pwe irail en kak iang kitail alehda koaros me kin towtowe ni unsek kin wahdo.
Kitail en doarehla me salongala me kapil kitail: me mah, me arail pwoud mehsang irail, me soumwahu, me ahniki kahpwal en paliwar, me solahr kin kalapw iang sarawi, oh irail me solahr kolokol kosonned akan. Kitail en kapahlang irail peh me kin sawas oh mohngiong me ese duwen limpoak. Sang ni met, kitail pahn wahdo popohl nan mohngiongirail, oh kitail pahn pehm nsenamwahu loal me kin kohdohng kitail ni atail kin sewese emen tohrohr nan ahl ong mour soutuk.
© 2013 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/13. Kamanaman ong kawehwe: 6/13. Kawehwehpen First Presidency Message, October 2013. Pohnpeian. 10670 885
Padapadahk sang Iren Mahsen Wet
Medewe en peidek rehn aramas akan me komw kin pwarek ma mie me re ese me kin apwaliki kohdo iang sarawi. Komw kak pilada emen aramas oh koasoaia wiepe kan en kasale limpoak, me rasehng luke ih en iang towehda ehu mihting en peneinei de kohdo iang kumwail mwenge.