2013
Misin Sarawi en Sises Krais: Sounkapikipik
October 2013

Iren Mahsen en Padahk en Pas, Oaktohpe 2013

Misin Sarawi en Sises Krais: Sounkapikipik

Onopiki ni kapakap iren mahsen wet oh, ni eh pahn konehng, koasoaiahkihieng lih akan me komw kin pwarek. Doadoahngki peidek kan pwehn seweseikomwi kakehlailih riomw lih akan oh pwehn elehieng Pwihn en Sawas en Lih en wiahla pali kesempwal en pein ahmw mour. Pwehn alehdi iren sawas kapatapat, tehk reliefsociety.lds.org

Pwoson, Peneinei, Sawas

Sises Krais ketin kapikada nanleng oh sampah (tehk 3 Nephi 9:15). E kapwaiada met sang ni manaman en priesthood, pahn kaweid en Samatail Nanleng (tehk Moses 1:33).

“Ia uwen atail konehng kapingki me Sounkapikipik eripit men wiahda sampah oh kihieng kitail met,” mahsanih President Thomas S. Monson, “… pwe kitail en kak ahniki ansou en kasongosong, ansou mwahu en kamehlel me kitail kak iang warohng soahng koaros me Koht ketin kaunopadahr kitail en alehdi.”1 Ansou me kitail kin doadoahngki atail saledek en pilipil en peikiong kosonned akan en Koht oh koluhla, kitail kin warohngala en pwurala mour Reh.

Me pid Kapikipiko, President Dieter F. Uchtdorf, Sounsawas Keriau nan Presidensi Keieu, mahsanih:

“Kitail me wia kahrepen Eh ketin kapikada sampah kan koaros! …

“Met iei mehkot kapweipwei me pid aramas: rasehng Koht, aramas sohte mehkot; ahpw kitail iei mehkoaros ong Koht.”2 Ni atail ese me Sises Krais kapikada sampah ong kitail pwehki atail wia mehkoaros ong Sahm Nanleng met kak kalaude atail limpoak ong Ira.

Sang Pwuhk Sarawi Kan

Sohn 1:3; Ipru kan 1:1–2; Mosiah 3:8; Moses 1:30–33, 35–39; Abraham 3:24–25

Sang Atail Poadoapoad

Kitail kapikipikdahr ni mwohmw en Koht (tehk Moses 2:26–27), oh kitail ahniki koahiek sarawi. Soukohp Joseph Smith kaweidiki lih akan nan Pwihn en Sawas en Lih en “momour ong [arail] sohso sarawi.”3 Ni kangoang wet eh wia poahsoan, lih akan nan Mwomwohdiso en Sises Krais en Souleng en Imwin Rahn Akan padahngkihier en momour ong arail sohso sarawi sang ni kapwaiada koasoandi kan en Koht ong irail. “Ni arail pahn tepida wehwehki uhdahn ihs irail— sapwellimen Koht serepein kan, me ahnikihier koahiek en poakohng oh apwalih aramas— irail kin kapwaiada arail sohso duwen lih sarawi.”4

“Kumwail mihier nan irair ehu wasa me kumwail kak mwekidki pepehm kan me Koht ketin padokedihier nan mwaromwail,” mahsanih Soukohp Joseph Smith. “Ma kumwail pahn momourki tepin padahk mehlel pwukat ia uwen lap oh kaselel!—ma kumwail pahn kapahrekih amwail mour ong amwail sohso sarawi, tohnleng kan sohte pahn kak irairdihsang wia iengomwail.”5

© 2013 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/13. Kamanaman ong kawehwe: 6/13. Kawehwehpen Visiting Teaching Message, October 2013. Pohnpeian. 10670 885

Iren sawas akan

  1. Thomas S. Monson, “The Race of Life,” Liahona, Mei 2012, 91.

  2. Dieter F. Uchtdorf, “You Matter to Him,” Liahona, Nopempe 2011, 20.

  3. Joseph Smith, nan Daughters in My Kingdom: The History and Work of Relief Society (2011), 171.

  4. Daughters in My Kingdom, 171.

  5. Joseph Smith, nan Daughters in My Kingdom, 169.

Dahme I Kak Wia?

  1. Ia duwen rapahki en wehwehki atail sohso sarawi eh kin kalaude atail limpoak ong Sounkomouro?

  2. Ia duwen atail kak kasalehda kaping kalahngan pwehki kapikipik kan en Koht?