Mi save serem wan Buk blong Momon?

Long ol fas yia blong mi long hae skul, seminari tija blong mi i invaetem klas blong mi blong givim ol kopi blong Buk blong Momon long ol fren we oli no memba. Nomata we mi stap sem tumas, mi bin akseptem invitesen.

I bin tekem mi sam dei blong bildimap strong tingting, be mi bin givim long fren blong mi Britni Buk blong Momon long wan lanj taem mo serem wan smol testemoni. Britni i bin talem tangkyu from buk ia.

Taem skul i finis long yia ia, Britni i muvaot, be mitufala i gat gud kontak i stap. Hem i bin talem long mi abaot niufala skul blong hem mo olsem wanem evri fren blong hem oli ol memba blong Jos, be hem i neva tokbaot long mi eni samting long saed blong spirit.

Fasin ia i bin jenis bifo mi go long misin blong mi. Mi bin kasem wan mesej long Britni se hem i gat bigfala nius blong mi: bae hem i kasem baptaes, mo hem i wantem talem tangkyu long mi blong stap olsem fren blong hem mo soem wan gud eksampol.

God i bin tekem wan boe blong 15 yia we i stap sem, mo, i no gat eksperiens blong misinari mo Hem i givim daereksen long hem blong i serem gospel wetem wan we Hem i bin save bae i akseptem. Mi save se taem yumi stap lisin long Spirit, bae yumi evriwan i faenem ol pipol raon long yumi we oli stap wet blong lanem abaot gospel we i bin kambak. Mi save se sapos yumi help blong karem wan man nomo i kam long Lod, glad blong yumi bae i bigwan wetem man ia insaed long kingdom blong Papa [blong yumi] (luk long D&C 18:15).