2013
Tabu Misin blong Jisas Kraes: Wan Stret Pikinini Ia Nomo
Disemba 2013

Visiting Tijing Mesej, Disemba 2013

Tabu Misin blong Jisas Kraes: Wan Stret Pikinini Ia Nomo

Stadi gud long toktok ia mo lukaotem blong save wanem blong serem. ?Olsem wanem bae undastanding blong yu long laef mo misin blong Sevya bae i mekem fet blong yu long Hem i kam antap mo blesem olgeta we yu stap lukaotem olgeta tru long visiting tijing? Blong kasem moa infomesen, go long reliefsociety.lds.org.

Pikja
Rilif Sosaeti sil

Fet, Famle, Help

Sevya blong yumi, Jisas Kraes, oli singaotem hem Wan Stret Pikinini Ia Nomo from Hem wan nomo long wol ia we i bon long wan mama we i save ded mo wan Papa we i no save ded. Hem i kasem ol tabu paoa we i kam long God, Papa blong Hem. Long mama blong Hem Meri, Hem i kasem wan bodi blong mit mo bun we i mekem Hem i save go tru long hangre, tosta, taet, filim soa, mo ded.1

From se Jisas Kraes i Wan Stret Pikinini Ia Nomo blong Papa, Hem i gat paoa ia blong givim laef blong Hem mo tekem bakegen. Ol skripja oli tijim se “tru long atonmen blong Kraes,” yumi “kasem wan laef bakegen” (Jekob 4:11). Yumi lanem tu long ol skripja se evri pipol oli save girap bakegen mo nomo save ded, mo, afta kasem laef ia we i no save finis sapos oli biliv. (Luk long D&C 29:43).

Taem yumi kam blong andastanem moa, wanem i minim blong Jisas i Wan Stret Pikinini Ia Nomo blong Papa, fet blong yumi long Kraes bae i kam antap. Elda D. Tod Kristofesen blong Kworom blong Ol Twelef Aposol i talem, “Fet long Jisas Kraes i strong bilif mo stret save blong (1) aedentiti blong Hem olsem Wan Stret Pikinini Ia Nomo blong God, (2) Atonmen blong Hem we i no gat en, mo, (3) Taem Hem i Girap Bakegen long Ded.”2 Ol profet blong tedei oli testifae: “[Jisas Kraes] i bin … Wan Stret Pikinini Ia Nomo long bodi, Ridima blong wol.”3

I Kamaot long Ol Skripja

Jon 3:16; Doctrine and Covenants 20:21–24; Moses 5:6–9

I Kamaot long Histri blong Yumi

Long Niu Testeman yumi rid abaot ol woman, olgeta we oli talem nem blong olgeta mo olgeta we oli no talem nem blong olgeta, oli putum fet blong olgeta long Jisas Kraes, oli bin lanem mo laef folem ol tijing blong Hem, mo oli bin testifae long ministri blong Hem, ol merikel, mo bigfala paoa. Ol woman ia oli kam ol eksampol blong ol disaepol mo ol impoten witnes long wok blong sevem man.

Olsem eksampol, Mata i bin talemaot strong testemoni abaot tabu laef blong Sevya taem i talem long Hem, “Mi mi bilif se yu yu Mesaea, yu yu Pikinini blong God. Yu yu man ya we olgeta bifo oli bin talem se bambae yu yu kam long wol” (Jon 11:27).

Sam long ol witnes we i bin stap long taem blong tabu laef blong Sevya, hemi bin mama blong Hem Meri, mo, kasen blong hem Elisabet. I no longtaem afta we enjel Kabriel i visitim Meri, hem i visitim Elisabet. Taem Elisabet i harem Meri i toktok, hem “i kam fulap long Tabu Spirit” (Luk 1:41) mo i talemaot testemoni se Meri bae i kam mama blong Pikinini blong God.

© 2013 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/13. Oli letem translesen: 6/13. Translesen blong Visiting Teaching Message, June 2013. First Presidency and Visiting Teaching Messages, December 2013.Bislama.Bislama 10672 852

Ol Not

  1. Luk long Gospel Prinsipols (2009), 52–53.

  2. D. Tod Kristofesen, “Bildimap Fet long Kraes,” Liahona, Sept. 2012, 13.

  3. “Jisas Hem I Kraes We I Laef: Testemoni Blong Ol Aposol,” Liahona, Apr. 2000, 2–3.

Wanem Mi Save Mekem?

  1. From wanem i impoten long mi blong andastanem ol wok blong Jisas Kraes?

  2. ?Olsem wanem fet blong yumi i kam antap taem yumi kipim ol komanmen?