Peneinei oh Kompoakapah kan Kohkohlahte

Wasa koaros me ke mih selihie, miehte kompoakapahmw me kin raparapahki peren laud me komw diaradahr sang ni omw momourki rongamwahu kopwurupwurdo en Sises Krais. Re pahn mwein sohte kak kawehwehda pereno ni lepin mahsen, ahpw irail kak kasawiada ni ansou me irail kilang nan ahmw mour. Irail pahn kin men esehla duwen utuhn pereno, ahpw mehlel ni ansou me re kilang me ke kin ahniki kahpwal duwehte irail.

Ke kehnehr peren sang ni omw kin dadaur kosonned akan en Koht. Iei kapaipen de wahn momouriki rongamwahuo (tehk Mosiah 2:41). Komw sohte kin loaloapwoatehng peikiong kosonned akan en Kauno pwe aramas akan en kin kilangkinuhk, ahpw Kauno kin kaunopada irail kan me kin tehk ahmw peren en rong rohng mwahu en Kopwurupwurdohn rongamwahuo.

Kapai kan me komw alehdier kapikadahr pwukoa kei oh ansou mwahu kei ong komwi. Pwehki omw wia tohnpadahk men me wiahdahr inou rehn Sises Krais, komw pwukoahki kihieng mehteikan ansou mwahu en diarada peren laud, ni mehlel kompoakapahmw kan oh tohn ahmw peneinei kan.

Kauno mwahngih ahmw ansou mwahu en ehukihda rongamwahuo oh kawehwehda ahmw pwukoa ni eh mahsanih me e wia pwukoa en aramas koaros me kaunopehr en kaunopada mehn mpe kan (tehk D&C 88:81).

Kauno kin wiahda kosonnedo en kin mengei en kapwaiada sang ni wekidekla me kin wiawi nan mohngiongumw ni omw kin alehda oh momouriki rongamwahu en Sises Krais. Ih me kahrehda, omwi limpoak ong mehteikan eh kin keirda, duwehte omwi inangih irail en alehdi soangen perenohte me komw pein lelohngehr.

Ehu karasaras en wekidekla wet iei mwomwen omw kasamwoh ansou mwahu en sawas nan sapwellimen Kauno doadoahk en misineri. Misineri kan me kin kalohk rahn koaros kin mwadangete esehla me re kak kasik sang emen me uhdahn weliakapwala mehlel pasapeng mwahu ni ansou me irail kin idek ihs me irail kak padahkih. Me kin weliakapwala kin inangih kompoakapahrail kan oh tohn ah peneinei kan en iang ahnikihdi ah pereno.

Ni ansou me ahmw kaunen misin en nan ahmw ward de misineri kan kin idek rehmw eden aramas kan me ren kohla padahkih, e kin wia kaping ehu ong komwi. Irail ese me kompoakapahmw kan kin kilang ahmw peren oh, irail eri kin kaukaunopehngehr en rong duwen rongamwahu wet oh pilada en alehda. Oh re udahn kamehlele me komw me pahn kin wia kompoakapahrail me re pahn anahne ni ansou me irail towehla mwomwohdiso wet.

Komw dehr periki me irail pahn sohla wia kompoakapahmw pwehki omwi lukehieng misineri kan en tuhwong irail. Mie kompoakapahi me sohte men rong misineri kan ahpw re kalahngankihong erein sounpar tohto kei ei lukehkinirail mehkot me irail ese uhdahn kesempwal ong ie. Komw kak diar kompoakapahmw me pahn mihmi kohkohlahte sang ni omw pahn lukehkinirail rongamwahuo, me irail kilang kihonguhkehr peren. Komw dehr soikala ansou mwahu en luke emen kompoakapahmw oh ni mehlel emen tohn peneinei en pilada en idawehn pilahn en pereno.

Sohte ansou mwahu lapasang luhk wo eh pahn kohda nan tehnpas sarawi kan en Mwomwohdiso. Wasao Kauno kak ketkihda tiahk sarawi kan en komour ong atail pahpa nohno kahlap kan me sohte alehdi nan mour wet. Irail kin kilang oh kasik uhk ni limpoak oh koapwoaroapwoar. Kauno inoukihier me irail pahn ahniki ansou mwahu en pedelong nan Sapwellime wehi (tehk D&C 137:7–8), oh E ketin padokedi nan mohngiongumw limpoak ong irail.

Tohto rehmwail kehnehr peren ni amwail wia tiahk sarawi kan en nan tehnpas sarawi ong mehteikan, duwehte ni ansou me kumwail kin kihwei eden aramas kan rehn misineri kan en tuhwong. Ke udahn kin kehnda peren laudsang ni omw wiewia tiahk sarawi kan ong amw pahpa nohno kahlap kan. E sansalohng Soukohp Joseph Smith me atail peren soutuk kak mie ihte ma kitail kihda ahl ong kapai wo en kohda ong atail peneinei me melahr akan sang ni atail wia weliaparail nan tiahk sarawi kan en tehnpas sarawi (tehk D&C 128:18).

Ansou en Kirismas mohngiongitail kin sohpeilahng Sounkomouro oh ong peren me Sapwellime rongamwahuo wahdohngkitailehr. Kitail kin kasalehda atail kapingkalahngan ong Ih ni keieu mwahu ni ansou me kitail kin lukehiong mehteikan en alehdi pereno. Kapingkalahngan kin wiahla peren ni ansou me kitail kin kihwei ahd kan rehn misineri kan oh ni ansou me kitail wahla eden atail pahpa nohno kahlap kan nan tehnpas sarawio. Kasansalpen atail kaping kalahngan kak wiahda kompoakapahtail kan oh peneinei kan me pahn mihmi kohkohlahte.