Ko e hā te u lava ʻo fai kapau ʻoku teke au ke u maumauʻi e ngaahi tuʻunga moʻui ʻo e Siasí ʻe he toʻu tupu kehe ʻoku nau toe hoko pē ko e kāingalotu mālohi ʻo e Siasí? ʻOku ʻikai ke u fie hā ngali fiemāʻoniʻoni pe loto fakamaau.

Maʻu ha loto toʻa ke taukaveʻi e ngaahi tuʻunga moʻui ʻo e Siasí, tatau ai pē kapau ʻoku fakahoko e teke ko ʻení ʻe he toʻu tupu Siasi ʻoku nau ʻiloʻi e ngaahi tuʻunga moʻuí mo nau fakakaukau ʻokú ke fiemāʻoniʻoní. Ko e fē ʻoku tuʻu fakatuʻutāmaki tahá: ko e talangataʻa ki he ngaahi fekau ʻa e ʻEikí pe hā fie māʻoniʻoni ki ha niʻihi homou toʻú? (Ka ko ʻeni, kapau ʻoku nau teke koe ke ke fai ha faʻahinga meʻa ʻokú ne ʻai ke ke ongoʻi taʻe-fiemālie ai ʻiate koe pe maumauʻi ai e ngaahi tuʻunga moʻui ne fokotuʻu ʻe homou fāmilí kae ʻikai ko e Siasí, te ke kei lava pē ʻo tuʻu ʻiate koe pē ʻo talaange ʻoku ʻikai ke ke fie fai ia mo kole ange ke nau fakaʻapaʻapaʻi ho lotó.)

Kuo pau pē foki ke ke feinga ke fakaleleiʻi ʻa e meʻá ni ʻi ha founga fakapotopoto. Hangē ko ia ne talaange ʻe he palōfita ko ʻAlamaá ki hono foha faifekau ko Sipiloní, “Ngāue ʻaki ʻa e loto toʻá, kae ʻikai ko e fielahí” (ʻAlamā 38:12). ʻOku ʻikai fie maʻu ha tukuakiʻi fefeka pe tōʻonga fakakaukau tukuhifo. Te ke lava pē ʻo fakahā moʻoni ange ke ʻilo ʻe he kakaí ʻa e ngaahi tuʻunga moʻui kuó ke fili ke moʻui ʻakí. Pea kapau ʻoku kole atu e kāingalotu mālohi ʻo e Siasí ke ke maumauʻi e ngaahi tuʻunga moʻui ʻo e Siasí, manatuʻi e meʻa naʻe leaʻaki ʻe Palesiteni Tietā F. ʻUkitofa, ko e Tokoni Ua ʻi he Kau Palesitenisī ʻUluakí: “Hoko ko ha kaungāmeʻa ki he taha kotoa, kae ʻoua naʻá ke teitei holoki ai hoʻo tuʻunga moʻuí.”¹