Ola i se Olaga o le Filemu, Olioli, ma se Faamoemoega

A o e savali i le tuaoi o lou malamalamaaga i le tauafiafi o le le mautonu a o faaaogaina le faatuatua, o le a taitaiina oe ia maua ni tali i luitau o le olaga lea semanu e te le maua. E tusa lava pe ia te oe se faatuatua aupito sili ona malosi, ae e le o taimi uma o le a vave tauia ai oe e le Atua e tusa ai ma ou manao. Nai lo lena, o le a Ia tali mai i se vaega itiiti mai lea taimi i le mea o loo i ai i Lana fuafuaga e faavavau lea e sili ona lelei mo oe. O le faaauau pea o le faaaogaina o lou faatuatua o le a fausia ai le malosi o uiga faaletagata lea e avanoa mo oe i taimi e sili ai ona manaomia. O uiga faapena e le atiina ae i taimi o luitau po o faaosoosoga tetele. O le taimi lena e faaaoga ai.

O le faavae o uiga faaletagata o le amiosao. O uiga agavaa faaletagata o le a faamalosia ai lou gafatia ia iloa le taitaiga a le Agaga ma ia usiusitai i ai. O uiga malosi o se tagata e sili atu lona taua nai lo mea ua e umia, i mea ua e aoaoina, po o a foi sini ua e ausia. O le faifai pea o lou faaaogaina o le faatuatua e fausia ai uiga malosi faaletagata. Ma le isi, o uiga faamalosia faaletagata e faalautele ai lou gafatia e faaaoga le faatuatua, e faapena ona faaleleia ai lou malosi ma le talitonuga i le faatoilaloina o tofotofoga o le olaga. E faaauau pea lenei taamilosaga o le faamalosiaina, aua o le tele lava o le faamalosia o ou uiga faaletagata, o le tele foi lena o lou mafaia ona faaaoga le mana o le faatuatua.

Po o fea lava e te nofo ai, po o le a foi lau galuega po o le taulaiga o le olaga, o le a tosoina atu oe i se taua mo agaga o alii ma tamaitai. Ia lototoa i lena tauiviga. O loo tauina i le faavae o uiga faaletagata. Ua faamanino mai e Satani ma ana au o latou uiga e ala i le tetee malosi i le finagalo o lo tatou Tama ma le solia pea lava pea o Ana poloaiga. O ou uiga faaletagata e faamalosia i le tumau i filifiliga sa’o. I le olaga atoa o le a tauia oe mai taumafaiga e te faia e filifili ai ma le sa’o.

E le mafai e Satani po o se isi lava mana ona faavaivaia pe faaleagaina ou uiga tuputupu a’e faaletagata. E na o oe lava e mafai ona faia lena mea e ala i le le usiusitai. O le pogai lena ua matuai taulai tonu atu ai Satani i le faaosoosoina o oe e fai filifiliga o le a faavaivaia ai ou uiga faaletagata. O Satani o se matai faamanuiaina i le faiga o filifiliga faataumaoi ia foliga tosina, ma lelei. O lea ia faaeteete ai. I lenei taimi taua o le olaga, o le a e feagai ai ma le tele o filifiliga. O faaiuga e te faia o le a aafia tele ai lou olaga i le taimi nei ma le faavavau. Ia faia ma le poto ma le agaga tatalo.

E lua mamanu o loo i ai mo le faia o faaiuga i le olaga: (1) o faaiuga e faavae i tulaga ma le (2) o faaiuga e faavae i luga o upumoni e faavavau. O Satani e uunaia filifiliga ia faia e tusa ai ma tulaga: O le a le mea o loo fai e isi tagata? O le a le mea e foliga mai e sili atu ona taliaina lautele pe faapolokiki? O le a le mea o le a aumaia le tali sili ona vave, ma sili ona faamalieina? O lena mamanu e maua ai e Lusifelo le avanoa telē e faaosooso ai se tagata e fai faaiuga o le a tiga ma faataumaoi e tusa lava pe foliga mai e sili atu ona manaia pe a uma ona faia se faaiuga.

Faatasi ai ma lenei auala, e le o i ai ni tulaga faatauaina po o ni tulaga faatonuina autu ia laugatasia ai le taialaina o faaiuga. O faaiuga taitasi e faia mo le mea e foliga mai o le filifiliga e sili ona tosina i ai i le taimi lea. O le tagata e filifilia lenei auala e le mafai ona faamoemoe i le fesoasoani a le Alii, ae e tuua i lona lava malosi ma le malosi o isi e fia fesoasoani. O le mea e faanoanoa ai, o le toatele o fanau a le Atua e faia faaiuga i le ala lenei. O le mafuaaga lena ua i ai le lalolagi i lenei tulaga pagatia.

O le mamanu a le Alii e mo Lana fanau ia faia faaiuga e faavae i upumoni e faavavau. O lenei mea e manaomia ai le faaauau pea ona faatotonugalemu i lou olaga ia poloaiga a le Atua. O lea, o faaiuga e faia e tusa ai ma upumoni le masuia e lagolagoina e le tatalo ma le taitaiga a le Agaga Paia. E faaopoopo atu i lou oe lava malosi ma le gafatia, o le a e olioli ai i musumusuga faalelagi ma le mana pe a manaomia. O au amioga o le a muai iloaina ma faamanuiaina ai olaga o tagata uma o i le li’o o lau faatosinaga. O le a i ai sou olaga anoa o faamoemoega, filemu, ma le fiafia.

E leai se faamautinoaga o le a faigofie le olaga mo soo se tasi. Tatou te ola ae ma sili atu ona vave aoao e ala i le fetaiai ma le faatoilaloina o luitau. Ua e iinei e faamaonia oe lava, e atiae, ma ia manumalo. O le a i ai pea luitau e mafua ai ona e mafaufau, e fai faaiuga talafeagai, ma ia faia ma le amiotonu. O le a e tuputupua’e mai ai. Peitai, e i ai nisi o luitau e le manaomia lava ona oulua fetaiai. O luitau na e fesootai ma soligatulafono ogaoga. A o faaauau ona e aloese mai na ituaiga mala, o le a sili atu ona faigofie ma fiafia lou olaga. O le a e vaaia isi o siomia oe e le faia lena filifiliga, o e faia mea sese ma faatiapolo ma aumai ai le faanoanoa. Faafetai i lou Tama o i le Lagi ona o le ese o le mamanu o lou olaga ma sa e maua le fesoasoani e fai filifiliga na taialaina e le Agaga Paia. O lena uunaiga o le a faatumauina ai oe i le ala sa’o.

Ua aoao mai i tatou e le talalelei e fai filifiliga e faavae i luga o upumoni e faavavau. Faamolemole aua ne’i faatagaina oe lava e fai se ‘alofaga i lena mamanu o le olaga ina ia maua ai se tulaga lelei ae le tumau, pe ia auai i se aafiaga e te iloa ua le tatau lea. Ua matuai toatele ulugalii talavou ma tagata taitoatasi ua ou vaai i ai ua faia ni sese ogaoga o le olaga ona sa latou saili atu i punaoa sese mo auala e ola ai. Sa oo ina tosina ese i latou mai mataupu faavae moni e ala i le faaosoosoina e fetuunai sina vaega itiiti ia maua ai faatosinaga, tulaga, po o le taliaina. Ia latou tauamiotonuina lo latou o ese mai, ma manatu ai e faapea e mafai ona ausia ai i se taimi mulimuli mai se mea lelei sili atu. Mulimuli ane, o lena mamanu o le olaga o le a aveina atu ai oe i le mea e mautinoa lava e te le manao e te oo i ai.

E faapefea ona e tausia lau tautinoga ia ola agavaa? E mafai faapefea ona e mautinoa o le naunautaiga o lou loto o le a le pala ona o faafitauli e siomia ai oe? Afai ua faamanuiaina oe e faaipoipo, ia olioli i lena mafutaga ma lou toalua ma lau fanau. Ia aua lava nei i ai ni mealilo e taofia mai le tasi i le isi. O lena mea o le a maua ai se faamautinoaga mamana mo le faaauauina pea o le amiotonu ma le fiafia. Fai faatasi faaiuga i faafitauli.

Ia faatumau le mumu o le malamalama o le talalelei i totonu o lou aiga e ala i le suesueina o tusitusiga paia, tatalo, ma isi mea e te iloa ona fai. Faamamalu ma ola i feagaiga o le malumalu pe a e mauaina. Inu mai le taele o le punavai o le afioga faaalia a le Atua. Pipii mau i Lana afioga. Tausi le aso Sapati ia paia. E faapuupuu atu, ia faaauau ona fai mea ua e iloa e tatau ona e faia. Po o fea lava e te alu i ai, ia tumau le fesootai vavalalata i le Ekalesia ma auauna ai e le aunoa. A o nofofua, ia tausia foi nei lava faamoemoega pe a faatatau i ai.

I le avea ai ma se atalii po o se afafine maoae o le Atua, e matuai manaomia lava oe. O loo i ai se manaoga vave mo ni alii ma tamaitai ia toatele atu e pei o oe o e o le a tutū atu mo mataupu faavae e tetee atu ai i faatosinaga faatuputupulaia e fetuunai na lava mataupu faavae. E manaomia alii ma tamaitai o e o le a amio faamaoni ma le lototele mo le mea ua faamalamalamaina mai e le Alii e sa’o—ae le mo mea e sa’o i le faapolokiki pe taliaina e le lautele. Tatou te manaomia ni tagata taitoatasi o e o i ai le faatosinaga faaleagaga, ma amiotonu o le a latou faaosofiaina isi ia ola faamamaluina. Tatou te manaomia ni taitai faaupufai e amiosa’o, tagata faipisinisi e faamaoni ma amio mama, loia o e e puipuia le amiotonu ma le tulafono, ma taitai o malo o e faasaosaoina mataupu faavae ona e sa’o. O le mea e sili ona taua, tatou te manaomia ni tina ma ni tama o e o le a faasaoina le paia ma le saogalemu o le aiga ma le amiosa’o o le au aiga, lea e aoaoina ai le faatuatua i le Atua ma le usiusitai i Ana poloaiga, e avea o se faavae o se olaga faamanuiaina.

E mafai ona avea oe ma se vaega taua o lena malamalama susulu, o lena faatosinaga amiotonu ina ia faateleina ai le malosiaga o le amio mama o lou atunuu ma ona aiga. O le toatele o au uo latou te ola i se olaga mo na o le taimi nei. Latou te le malamalama i le manaomia o mataupu faavae, tulafono e faavavau, ma le upumoni. Sa tausia i latou i se siosiomaga lea e fai ai faaiuga e faavae i tulaga o le asō po o avanoa o taeao mo le mauaina o ni mea. Faaali atu ia i latou se olaga e sili atu ona lelei—se auala e sili atu ona lelei. O loo i ai nisi o mea e sese ona ua poloai mai le Atua e sese na mea. E le fuafuaina le upumoni i mea e mafaufau i ai le tagata, e tusa lava pe o le a le malosi latou te oo i ai. O le upumoni sa fuafuaina e se Atua Silisili Ese a o le’i Foafoaina lenei lalolagi. O le a i ai pea le upumoni e le masuia e faavavau.

Oi, e mafai ona maua le fiafia lē tumau mai le malosi, aafiaga, po o oa faalelalolagi, ae o le fiafia moni ma tumau, o le ituaiga lea e lagonaina i itula o le taeao lea e te matuai faamaoni ai ia te oe lava, e na o le usiusitai i aoaoga a le Atua e manumalo ai. E tatau ona i ai le faamaoni, amiosa’o, legavia, mama, ma se naunautaiga e lafoai ese se mea faatosina—e oo lava i se mea e moomoo i ai mo se taimi—mo se lelei sili atu i le lumanai. Ou te tautala atu i lo tatou naunautaiga pe a manaomia ai le tulaga o le tuu atu o mea uma i luga o le fata faitaulaga e mulimuli ai i mataupu faavae moni.

Ou te fia fautuaina atu ni mea patino se 10 e fesoasoani e te manuia ai i le fuafuaga ua finagalo le Alii e te mulimuli ai i lou olaga.

Muamua, faatulaga se seti o mataupu faavae lea o le a e taialaina ai vaega uma o lou olaga—i lou aiga, i lau auaunaga i le Ekalesia, i lau galuega, i lou nuu. E toatele tagata e taumafai e faavasega o latou olaga ma ua i ai se tulaga faatonuina mo le Ekalesia ma se isi tulaga faatonuina mo mea ua latou faia i le pisinisi ma i isi vaega o latou olaga. Ou te fautuaina malosi oe e aua le faia lena mea. E na o le tasi lava le faatulagaga o tulaga faatonuina e talafeagai. O aoaoga na a Iesu Keriso, lea e faailo mai ia i tatou le taua o le faatuatua, auaunaga, usiusitai, ma le amio sa’o.

Lona lua, aua e te faia ni tuusaunoaga i ou tulaga faatonuina. Aua ne’i fetuunaia i latou. O le tasi o auala e puipui ai i tatou e le Alii o le tuuina mai lea o le taitaiga i le olaga. O se tasi o auala ua taumafai Satani e faatamaia ai i tatou, o le taitai malie ese atu o i tatou mai le mea ua tatou iloa ua sili ona taua i lo tatou olaga. Sa ou nofo i Uosigitone, D.C., i le tele o lo’u olaga, ma ou te manatua mai lea taimi i lea taimi e o mai ai ni tamaloloa i lena aai, o e sa filifilia e fai ma sui o le malo ma o ni tagata o le Ekalesia. O isi i le talutalufou o a latou matata faalematata sa amata ona fai ni ‘alofaga, «Ana o i tatou o ni uo lelei atu a isi ma malamalama lelei ia i tatou, o le a tatou maua ni tofiga o le a tuu ai i tatou i se tulaga e mafai ona tatou auauna lelei atu ai.» Sa amata ona latou faia ni tuusaunoaga laiti i tulaga faatonuina lea na latou iloa e tatau ona taiala ai o latou olaga. E toalaiti foi i latou na manatuaina. Sa latou maimaua a latou galuega ma tofi ona sa latou faia ni tuusaunoaga i tulaga faatonuina. Aua ne’i outou faia lena measese.

Ia faamaoni i aoaoga ua outou maua mai i o outou matua ma taitai o le Ekalesia. O mea na ua silisili ona taua. Afai e te tuufaatasia au aoaoga aloaia ma mea ua e iloa e uiga i aoaoga a le Alii ma faataitaiga a na tagata agavaa o e ua avea ma faataitaiga lelei ia te oe, o le a e maua se faavae mausali. O le a faamanuiaina oe ma faia mea e tauaogaina mo isi.

Lona tolu, ia faamaoni. Ia faamaoni i ou matua ma e pele ia te oe. I mea uma lava, ia faamaoni ia Iesu Keriso, o le Faaola. E oo mai le faamanuiaina pe a ogatusa a outou faatinoga ma aoaoga a le Alii. Pe a e saili le galuega, sue se mea e luitauina ai oe, e siitia ai oe i tulaga maualuluga o le faatinoga. Atonu e faigata atu, ae o le a e tuputupu ae, atiina ae sili atu, ma saofagā atu i nisi mea lelei. E te le o iloa moni lava po o ai oe ma mea e mafai ona e ausia i le olaga. E i ai sou tulaga gafatia maoae i tua atu o le mea e mafai ona e mafaufau i ai i le taimi nei.

Lona fa, ia ola ina ia mafai e le Alii ona taiala oe i le mea e finagalo o Ia ia avea ai oe ma auauna atu ai. E mafai ona Ia faia lena mea pe afai e te ola agavaa i Ana poloaiga ma taumafai i auala uma e usiusitai i Ana aoaoga.

Lona lima, auauna atu i isi. O le faasoa atu o mea ua e iloa i isi o le a aumai ai ia te oe le fiafia ma faamanuiaina ai o latou olaga.

Lona ono, ataata. ou te le o faapea atu e tatau ona e faia ni tausuaga i aso uma, ae o se tala tausua lelei i lea taimi ma lea taimi o se faatonutonu faasopoloa. O le olaga e le matua leaga lava. O le a e aoaoina i se taimi vave e tofu tagata uma ma faafitauli ma e leai se isi e fia faalogo ia oe faafitauli. Faataatiaese na mea ae ataata. Ia i ai se uiga malie, e pei ona faia e perofeta. Maimau pe ana mafai ona ou tauina atu nisi o mea sa matou talanoa i ai. O le o ni mea taufaalili, e le o ni mea e le talafeagai—na o se lagona lelei o le aga malie. O le a ou ta’u atu ia te oe se mealilo i le auala e ala mai ai i le taeao ma se ataata i ou foliga e tusa lava po o a ni ou lagona: alu e moe ma se tautauofu i lou gutu. Ia manatua, o se aga malie lelei o le a fesoasoani tele ia te oe.

Lona fitu, aua le faitio. O le olaga e le o taimi uma e talafeagai ai. O le mea moni lava lena. Ae e faatumulia i taimi uma i avanoa ofoofogia pe afai e te iloa le auala e maua ai. Ou te manatua se taimi sa ou galue malosi ai i le ala na ou iloa ai. Sa ou faigaluega mo se tamalii o lē sa avatua manatu ma fautuaga ma galuega uma sa ou faia ma pasi atu ia i latou e maualuluga atu ia te ia e pei o ni ana lava fautuaga. Mo se taimi sa matuai ou le fiafia lava e uiga i lena mea. A o ou mafaufau loloto i ai, na oo mai ia te a’u se manatu, ma sa ou filifili ai mai lena taimi o le a ou tusi atu ni lipoti ia te ia o mea uma sa ou faia pe taumafai foi e fai, ma auina atu se kopi i lona pule. Sa le fiafia o ia i lena mea, ae sa fetaui lelei.

Lona valu, ia i ai i taimi uma sou tofiga i le Ekalesia. Ou te le o fai atu e tatau ona e talosaga mo se valaauga faapitoa, ae po o fea lava e te alu i ai i le lalolagi, po o fea lava e ave oe i ai e le Alii, ia ofo atu i taimi uma lau auaunaga i le taitai pulefaamalumalu. Tuu i lena taitai e filifili po o fea ma faapefea foi. Ia fesootai ma mea a le Atua ma auala e auauna atu ai ia te Ia.

O mea mulimuli e lua e aupito sili ona taua.

Lona iva, alu i le malumalu. Tauave se pepa faataga aoga o le malumalu. Atonu e i ai ni nai talavou matutua o le a mananao e faatali e o i le malumalu mo o latou faaeega paia pe a latou o atu faatasi ma a latou soa ina ia faamauina. Ae toetoe lava o tagata uma e mafai ona ia maua ma tausia se pepa faataga o le malumalu. O le a taofia ai oe i le ogatasi faaleagaga, o le a mafai ai ona e manatua ia mea aupito sili ona taua o le olaga, ma o le a uunaia oe e tuuina atu se auaunaga maoae i isi.

Lona sefulu, faaaoga le Faaola o Iesu Keriso e fai ma ou faataitaiga mo le olaga. Faaaoga Ana aoaoga e fai ma au tusitaulima mo le olaga. Aua lava ne’i e faia i ai ni tuusaunoaga.

Mata o le a e mafaufau ma le agaga tatalo i mea ua tatou talanoaina? E toatele ua loto ina ia taitaiina e au faataitaiga amiotonu. Talu ai ona ua faamalamalamaina outou, e te nofo aitalafu ia i latou o e mulimuli ia te oe ia le faataitaiga sili ona lelei e mafai ona e tuuina atu. E le gata o le a faamanuiaina i latou, ae o le a faatamaoaigaina ai foi lou olaga. Ia iloa le uunaiga maoae mo le lelei o loo tafe mai amioga a tagata taitoatasi na soifua mai o le mafaufau ma le mataupu faavae ua mauaa i le upumoni. Filifili faapea o taimi uma o lou olaga o le a atagia ai lou naunautaiga ia lotomaulalao e avea ma se faataitaiga o le amiotonu, amiosa’o, ma le talitonuga maumaututu. Faatasi ai ma se olaga faapena o le a mautinoa lava ona faamanuiaina oe i le faamoemoega lea na e sau ai i le lalolagi.

Sa ou amataina lenei savali i le faailoa atu ua ou faamaoniaina i lo’u lava olaga le moni o mataupu faavae ua faasoaina atu. Sa i ai taimi sa faaalia ai e la’u filifiliga ia tu atu mo mataupu faavae e tetee atu i faatosinaga malolosi e faapea o le a i ai se toilalo patino tele i le faia o lena faatinoga. Ae o lena mea sa ou le lotovaivai ai. Sa ou naunau e fai lea mea sa’o. Ae peitai, o le toilalo sa faamoemoeina, sa le’i oo mai lava. I se isi itu, o le faia o le mea sa’o i le taimi lea sa matala ai ni avanoa anoa sa sili atu ona maoae ma tele. Ou te molimau atu o le a le mafai lava ona e sese pe a e faalagolago i le Alii ma Ana folafolaga, e tusa lava pe o le a le ogaoga o luitau.

Pe mafai ona ou faasoa atu se aafiaga ia te outou? Sa ou tautua i le Neivi a le I. S faatasi ma le alii Ofisa Sinia o Hyman G. Rickover, o se tagata e ese le faigata. Ina ua valaauina au e avea ma se peresitene o le misiona, sa taumafai o ia e tauanau au e aua ou te alu. Ina ua ou fai atu o se perofeta a le Atua sa valaauina a’u, sa fai mai o ia, “Afai o le faiga lena o Mamona, ou te le toe aumaia nisi o i latou e galulue i la’u polokalama.” Sa ou iloa sa toatele ni aiga i Idaho, ISA, sa faalagolago i galuega i lena polokalama, ma sa ou popole i ai.

A o ou tatalo, sa oo mai se pese i lo’u mafaufau: “Fai mea tonu; ma ia le popole” (“Fai Mea Tonu,” Viiga, nu. 148). O le mea lena sa ou faia. Sa ou le iloa pe o le a faapefea ona manuia nisi o luitau sa matou feagai i le ala sa ou faamoemoe e i ai i le tagata o le a sau e suitulaga ia te a’u, ae “fai mea tonu; ma ia le popole.” Sa oo i se tulaga lelei tele lava.

Ina ua iloa e le Ofisa Sinia o Rickover o le a ou alu i se misiona, sa fai mai o ia e le manao e toe fia vaai ia te a’u ma e le manao foi e toe tautala mai ia te a’u. I le aso mulimuli sa ou faigaluega ai faatasi ma ia, sa ou talosagaina ai se avanoa [e feiloai ai ma ia]. Sa tau mole le failautusi, sa manatu o le a i ai se vevesiga.

Sa ou alu atu i totonu, ma sa ia fai mai, “Sikoti, nofo i lalo. O le a lau savali? Sa ou taumafai i auala uma ia sui ai lau faaiuga. O le a lena mea e te fia tau maia ia te au?”

Sa ou tuu atu ia te ia se kopi o le Tusi a Mamona ma fai atu, “Ofisa Sinia, ou te talitonu i le Atua. Ma ou te talitonu a tatou faia le mea sili tatou te mafaia, o le a Ia fesoasoani mai ia i tatou.”

Ona fai mai lea e Ofisa Sinia Rickover se mea ou te le’i mafaufauina lava e faalogo i ai. Fai mai o ia, “A uma lau misiona, ou te manao e te toe foi mai ma ta galulue faatasi.”

“Fai mea tonu; ma ia le popole.”

Tau ina faamalosia e le Alii au faaiuga, le faaaogaina o lou faatuatua, ma lou uiga tuputupua’e ina ia mafai ona avea oe ma se meafaigaluega mo le lelei ua finagalo o Ia e avea ai oe. Ou te molimau atu o loo soifua o Ia. A o e sailia ma le agavaa Lana fesoasoani, o le a Ia taiala oe i lou olaga. Ou te molimau atu i lena mea ma le malosi uma o ia te a’u. O loo soifua Iesu Keriso. O loo Ia taitaia Lana galuega i le lalolagi.

I le avea ai ma Aposetolo o le Alii o Iesu Keriso, ua matou maua ni aafiaga e matua paia lava lea ua faatagaina ai i matou e tuuina atu a matou molimau i Lona suafa ma i Lona mana. Ou te faia lena mea ma se talitonuga loloto. E alofa Iesu Keriso ia te oe. O le a Ia taialaina oe i lou olaga. I taimi o luitau maoae, pe a e le mautonu po o le fea le itu e ui ai, tootuli ma ole atu i lou Tama o i le Lagi e faamanuia oe ma ia tuu atu lou faatuatua i le Faaola ma Lana Togiola e fai ma papa ma faavae o lou olaga faamanuiaina.