Te Maungatabu ao Ngai

I aki toki n iangoa te maungatabu ni kabuta bwa te bong ni motirawa ae abwabwaki ao e kabotu, ma inanon waakin te tai, I a tia ni karekea tangirana ao n ingainga nanou nako iai. E kona te maungatabu ni kabuta n te wiikiente n rang ni kakorakoraira n te tamnei, ma e bebete karekean mamaaran namakin aikai ngkana e teimatoa te maiu n te Moanibong. Tabeua iango aikai a tia ni buokai ni karekea ae mwaiti man te maungatabu n aron ae kona n reke.

I katauraoai ibukin te maungatabu man korean titiraki, ao ngkanne I koroi taekana ngkana a kaekaaki au titiraki. Imwiina, I tangiria n rawei man te intanete taetae ao katangitang man te maungatabu man LDS.org ao n rawei nakon te MP3 bwa I iaonga n ongora n te taetae ao te anene ngkana I karaoi au mwakuri ni katoabong. I tangiria naba ni kamatebwaia kanoan te maungatabu n te Riaona. I mwaaken ao ni koroi taian taeka ni mataniwin oin au boki. N te tai are e a manga karaoaki te maungatabu are imwiina, e nang bongana raoi au maekatiin. N tabetai ao au utu a bootaki ni kamatebwai rongorongo ni bootakin te utu n te tairiki.

Kawakinan te tamnei ae ti namakinna n tain te maungatabu ma ngaira ao n reitinako n reiakin taian rongorongo a tangira te mwakuri, ma karaoan aei e a tia n riki bwa te kakabwaia ae korakora ibukiu. I a tia ni karekea te korakora ao te kairi ae bati n taai ni kainnano man reiakinan rongorongo man te maungatabu ni kabuta, ao I ataia bwa rongorongo aikai a bon kairaki mai ieta.