E Kabonganaira te Uea Ni Kakoroa Nanon Ana Mwakuri
Ukoukoraia aika kainnano ao te ibuobuoki nakoia aika rotaki n te kanganga a rangin ni kakawaki nakon ae nanonaki bwa ana reirei Iesu Kristo.
N tain te Bwaka ae Korakora ni kaubwain te United States are e riki imarenan 1929 ao moan 1949’s, onoman beretitenti n te titeiki man te Salt Lake Valley a bootaki ni maroroakina te kanganga n te rongo ao te baki ae a rikirake are e rotiia angiia kaain te Ekaretia.1 E ngae ngke te kanganga ni kaubwain te aba e rotia aomata n taabo ni kabane, e a tia n rangin n rotaki Utah n tingaia.2
N te tai anne, taan kairiiri n te Ekaretia a karako kaubwaia ni buokia ake a kainnanoa te ibuobuoki. A kona ni kabonganai angabwai n aki mamatam, eng, ma e rikirake te kainnano n aron ae e tataneiai te aba iai. Ian ana kaetieti te Bitiobiriki n Tararua, te tabo ni kamakuri ae te Deseret Employment Bureau e a tia ni kateaki ni moan te ririki ae 1900 tabun. Ma e aki tau ni buoka te aekaki ni kainnano ae korakora anne.
Taan kairiri aika onoman n te nakonibonga a ataia bwa ngkana a na buokaki kaain aia titeiki, aki kona n tataninga. A riai ni karaoa te mwakuri n te tai naba anne. A moanna man kamwakuraia aomata. A baireia mwaane ao ni uotia nakon te tawaana ike a kona n uniki aroka. N onea mwiin aia mwakuri, taan ununiki aika kukurei a anga te buoka n te amwarake nakoia mwaane. Nikirana a uotaki nakon te autinikaikobwai ao n tibwatibwaaki nakoia tabeman ake a baki. Ngke e tabe n rikirake te anganano, a moanna aomata Aika Itiaki ni katikui inanon tiin amwarake ni kawakin. Aio bon moanakin te burokuraem n te warebea n taai aikai.
Wanibwi te ririki imwiina, taan kairiiri n te Ekaretia n taai aikai ni kabuta te aonaaba a tararuaia aia taan taromauri ao n namakina te aeka n nano ni karoko irouia aika kainnano.
N te maungatabu ni kabuta n Okitobwa 2011, e taku Beretitenti Dieter F. Uchtdorf, te Kauoma ni Kauntira n te Moan Beretitentii: “N tainako ao ti aki toki n namakina kainnanoia kain rarikira, ma te kantaninga bwa temanna mai keraroa e na kaoti ni buoki kainnano aikanne. Tao ti na tataningaia taan rabakau ma rabakauia ae onoti ni katoki kanganga aika onoti aikanne. Ngkana ti karaoa aei, ti kakeaia kain rarikira n te mwakuri n ibuobuoki are ti kona n anga, ao ti kakea tibwangara ni beku. Ngkai akea te bwai ae bure ma taan rabakau, ti na kaitarai: e na bon aki tau mwaitia ni katoki kanganga ni kabane. Irarikin anne, e a tia te Uea ni katauraoa te nakoanibonga ao ana bootaki nakoira ni kabuta te aonaaba.”3
Te wewete aei ibukia taan kairiiri n te Ekaretia ao membwa ni karaoa te mwakuri man ana kairoro te Tamnei ae Raorioi e a tia ni kairia aika mwaiti ni kabuta te aonaaba, n aron are e taekinna Beretitenti Uchtdorf, “iangoia i bon [ibukiia].”4 A tauraoi ni mwakuri ao n iangoia ni bwaai ni kabane naake rarikin ao kainnano, aika aoraki ao a karawawataki” (D&C 52:40).
Ecuador
Ngke Bitiobi Johnny Morante i Guayaquil, Ecuador, e taraia membwa n ana uoote, e rikirake tabeaiangan nanona. A rangi ni mwaiti utu aika a korakai ni kani karekei bwaai aika bebete n te maiu. E tangiria ni buokia, ngaia ae e maroroakinna ma ana taan kairiiri n te uoote ao ni uota te kanganga anne nakon te Uea.
Ngkai te mwakuri n te aono anne e karako, e moanna ni mwakuri ma kurubu n aine aika 11 kaina, ni kaungaia bwa a na kakaea te anga ni wakina te bitineti ae uarereke. A noria aine aikai bwa iai kainnanoan bwai ni kaitiaki aika a matoatoa, ao ni bebete booia, ao a kan ataia bwa a na kona ni karaoi ao ni kaboi nako bwaai aikai n aia kaawa. Ma a na kanga n ata aron karaoan bwaai ni boobwai aikai?
N te tai aei, Bitiobi Morante e moanna ni kina te aine ae akea ana mwakuri n ana uoote ae a tia ni mwakuri n te tabo n ni kareke bwai n aoraki. Ngke aine ake 11 a bubutia ngkana e kona n ibuobuoki, e rangin ni kukurei n reireinia bwa a na kanga ni karaoi bwaai n ibuobuoki aika mano, man matoatoa.
A karaoi aia babaire ibukin aia bitineti, kateimwabei aonon te kawa ake a na kona ni mwkauri iai aine aikai, rinei bwaai aika a na karaoi, ao ni bairea aron baketenakia ma korean taekaia.
Inanon tabeua te namwakaina, a tia ni katea aia tabo ni kabobwai ao ni karekea te mwane ae tau ni kauarerekea te rongo ao n ibuobuoki ni karekea kainnanoia aia utu.
Ngke manatia n te kambwana ni bwainaoraki a reiakina taekan te bitineti aei, a moanna ni kan ongora nakon karakinan te tia anga bwai n aoraki ae akea ana mwakuri. N tokina a intawiunna ao a kamwakuria bwa e na tararua oin aia kambwana.
Rutia
N te Uoote ae Rechnoy i Moscow, Russia, Galina Goncharova, are e mwakuri bwa te tia koro rongorongo n te uoote, e marannako iaon tabeua aiti ao ni maoto baina ni kauaai. E uotaki nakon te onaoraki, ike e kabaeaki man tauaki baina ma te bwai teuana. E aki kona n amwarake ke ni karina kunnikaina i bon irouna. E aki kona ni kaara irana ke ni kaeka te tarebon.
Ngke a ata te bwai ae riki kaain ana uoote, a kaeka n te tai ae waekoa. Kaain te nakoanibonga anganna te kakabwaia ao ni mwakuri ma ainen te Bootaki n Aine ni karaoa te tai ae a na kona n tutuoa te aine ae tamaroa aei ao ni buokia ni kainnanona.
Vladimir Nechiporov, te tia kairiiri n te mition n te uoote, e taku, “Ti uringa te taetae are e taekinaki n te maungatabu ni kabuta ibukin katotongan tamnein Kristo are akea baina.5 Iai ae a tia ni kanimwa te bwai iaan te tamnei anne ma korobokiana ae kangai, ‘Ngkoe au tabonibai.’ Ibukin tabeua te wiiki te aine ae tamaroa aei akea te bwai ae kona ni karaoia bon irouna, membwa n te Uoote ae Rechnoy a namakina te reitaki ma ngaia n te karaki anne. Ti a riki raoi bwa ana tabonibai.”
Biribin
Ngke e oreaki aonon Biribin n te Angibuaka ae Washi inanon 2011, e karika te ieka n te aono man korakoran te ran ao te ang. Tabeua mweenga aika 41,000 mwaitia a bon uruaki, ao e raka iaon 1,200 aomata ake a bua maiuia.
Imwain te ieka, Max Saavedra, te beretitenti n te Cagayan de Oro Biribin Titeiki, e a tia n namakina te kairoroaki bwa e na waekoa ni katea te tiim ni kaeka ae tawe. E bairei komete bwa a na kakoroi nanon mwakuri aika kakaokoro—bwai ni kabane ake man te kakaae nakon te kamaiu ni bwaai ao bwain aoraki aika kataweaki are e na anganaki te aomata ae aoraki ke n ikoaki imwain reken bwain aoraki ni karekean te amwarake, te ran, ao te kunnikai.
Ngke e a kerikaki te ran nakon tiana ae mano, taan kairiiri n te Ekaretia ao membwa a ikotaki. A koroi rongorongon taekan kamaiuakiia membwa n tatabemaniia nako ao n rinanoa aron te urubwai. Temanna te membwa e anga kaibeti aika taian rabwa ni uotia membwa aika a bua ni kamaiuia. A kaukaki auti ni bootaki ni karekei katantan nakoia ni kabane aika kainnanoa te amwarake, te kunnikai, burangketi, ao te tabo ae a na kona n tiku iai teutana te tai. Te ran ae itiaki bon te kainnano ae kakaiaki, ngaia ae Beretitenti Saavedra e reitaki ma te tia bitineti ae bwaibwai n te turaki n ai, ao ni uota te ran ae itiaki nakon tienta n otinako n te auti ni bootaki. Membwa aika iai rabakauia iaon te rabakau ni bwainaoraki a buokia naake a ikoaki.
N te tai are a tia ni buokaki iai membwa n te Ekaretia, Beretitenti Saavedra ao kaain ana tiim a kawari tienta ni kamwaingn te kaawa ao n anga te ibuobuoki. A uoti nakoia amwarake ao bwaai n ibuobuoki riki tabeua. A mwaiti membwa, e ngae ngke a tia ni bua mweengaia, a kakeaia ni buokia tabeman n te tai naba anne imwiin te angibuaka. Ngke e toki te karau ao e mwau aontano, Baai n Ibuobuoki man te Moomon aika anga nanoia man titeiki aike teniua a nako ni mwakuri n tibwatibwai buoka n raonaki ma te ibuobuoki n te kaitiaki.
Brazil
Inanon kawan Sete Lagoas, Brazil, bon te tabo ni katantan ibukiia aine aika mwauku ae maiuia a tia n rotaki man kabonganaan te manging n te aro ae aki riai. A keiaki ni kamaiuia ni katoabong. Iai aia ai n umum ae uarereke ae kona ni karika tao 30 te kariki n te bongina. E ngae ngke a tia aine ni karekei tabeua buoka man te bootaki n ibuobuoki, a karekea ae aki tau ibukin kanaia. Ngke a tia taan kairiiri n te Ekaretia man te Titeiki i SetIe Lagoas Brazil n atai kainnanoia aine aikai, a tangiria ni kan ibuobuoki.
A taetae ma aine ibukin bwaai aika kainnanoi. A taku aine bwa a kona ni karaoi riki kariki aika mwaiti, aki ti kona ni kamwarakeia i bon irouia ma a kona ni kaboi nako tabeua kariki ao ni kareke mwane teutana ibukin kainnanoan te mwane.
Taan kairiiri n te Ekaretia ao membwa a mwakuri ma te taanga ni buaka n te tabo ao te reirei n te kaawa ni kanakoraoi aroia aine aikai. Ma ana ibuobuoki te Ekaretia n te mwane ao taan anganano man te Ekaretia ao te kaawa, a kona ni katea te tabo ni kariki ae boou—te tabo are a kona iai aine ni karaoi 300 te kariki ni katoabong.
Ma te mwane are a tia ni karekea, a tia aine n te tabo ni karao kariki ni kona n kateirakeia aia moa n tia mwakuri—te aine temanna n te tabo ni katantan.
Te Mwakuri ni Warebea
N aroia taan kairiiri aika a kairaki mai ieta n te Ekaretia tebwina te ririki n nako ake a nora te kainnano are irarikia ao n rawa n tannako mai iai, taan kairiri ao membwa n te Ekaretia ni kabuta te aonaaba a karaoa ae ti tebo n oin aia aono ao n oin kawaia.
Ngke e taetae Beretitenti Uchtdorf ibukin tabeakinaia tabeman, e taku: “Tiaki ana kawai te Uea bwa ko na tekateka irarikin te raanga n ran ao n tataninga te ran bwa e na nako imwain ae ti rinanona. Ana roko ni kabane, a tauraoi ni mwakuri, nako ni mwakuri, ao ni katea te buriti ke te booti n rinanon ranin marawan ara kanganga.”6
Ukoukoraia aika kainnano ao te ibuobuoki nakoia aika rotaki n te kanganga e rang ni kakawaki nakon ae nanonaki bwa ana reirei Iesu Kristo. Bon te mwakuri are e karaoia Iesu Kristo ngke E buokiia aomata n Ana tai. “Te mwakuri aei ni karaoia n ana kawai te Uea tiaki te bwai ae kaokoro n ana burokuraem te Ekaretia,” Beretitenti Uchtdorf e kabanea. “E aki kona n aki tabeakinaki ke ni katukaki. E rangin ni kakawaki nakon ara reirei; ngaia bon boton reirein ara aro.”7