Te Angkaae Kamatoaaki Raoi

Oin te kantaninga ibukin te angka bwa e na kawakinaki ao e na kamanoaki iai te kaibuke n te tabo are e baireaki ke ni buokia n tararua te kaibuke n tain te angibuaka. E ngae n anne, kakoroan nanon kantaninga aika kakawaki aikai, tii karekean te angka e bon aki tau. E riai ni matoatoa raoi te angka, n onimakinaki, ao ni kabonganaki raoi n te tai ao n te tabo ae eti.

Ngaira ao utu n tatabemaniira nako ti bane ni kainnanoi naba angka.

E kona n roko te kanganga bwa kanga angibuaka aika korakora ni uotiira nakon te kawai ae bure ao ni kakamakuira ni kakoroira nako aon taian bwaa. Ma n tabetai ti reke naba n te kabuanibwai ngkana bwaai ni kabane a tara n nakoraoi—te ang e bebete ao taari e raoi. Ni koauana, ti kona n reke n te kabuanibwai ae korakora ngkana akea mweengara ao te mwainging e rangin ni bebete ae kanga ti aki kona n ataia.

A riai angka ni matoatoa, ni korakora, ao ni karaoaki raoi bwa a na tauraoi ngkana a kainnanoaki. N raonaki ma anne, a riai ni kanimwaki ma aan te kateitei are e na kona ni kaitarai rawawatan katikitiki aika kakaitara.

E koaua, ae a na euangkerio Iesu Kristo bon te angka anne. E katauraoaki iroun te Tia Karika te aonaaba ma bukina aika kakawaki ao a karaoaki bwa a na katauraoa te kamanomano ao te kawai nakoia Natina.

Tera te euangkerio, ae kakawaki riki, irarikin ana babaire te Atua bwa e na kamaiuia Natina ao ni uotia n oki Nakoina?

Atakina ae bon aron rikin bwai ni kabane bwa a na bane n iai bukiia, ti riai ni katea ara angka ni kamatoa iaon aan koauan te euangkerio. Aki riai ni kabebeteaki ni karinanoaki nako aan tanon te kainikatonga ke n aki kona n ringa mataniwiin ara koaua.

N te namwakaina aei ao ti na ongora mairouia ana toro te Atua n ana maungatabu ni kabuta te Ekaretia. Aia taeka, n raonaki ma booki aika tabu ao ana wirikiriki te Tamnei, a karekea aan bwaai aika kakawaki aika akea tokina ao reirei aika ti kona ni kanim iai ara angka n te aro bwa ti na teimatoa n nim ao ni kawakinaki man kanganga ao kataaki n te maiu aei.

Te burabeti n taai akekei ae Ereman e reirei, “Bon iaon te bwa are ara Tia Kaboomwi, are Kristo, natin te Atua, are kam na riai ni katea iai aami, bwa ngkana te riaboro e kanakoa te ang mairouna ae korakora, eng, ana kanoa ibuakon te ukeuke n anti, eng, ngkana ni kabane te atibu ae bwaka mai karawa ao te angibuaka ae korakora a bwaka iaomi, bon akea korakoraia iaomi ni katiki ngkami nakon marawan te nanokawaki ao te maraia ae aki totoki, ibukin te bwa are kateaki iaona, are bon aan te kateitei ni koaua, aan te kateitei are ngkana aomata a kateitei iaona ao aki kona ni bwaka” (Ereman 5:12).

Iai te kawai n te maiu ni katai ara angka ao n anai nanora bwa a na akea mweengara. E ngae n anne, ngkana a kamwaneauaaki raoi ara angka iaon bwaan te Tia Kabooi Maiura, a na taui—n aki tabe ma korakoran te ang, korakoran te iabuti, ke rietan naao.

Ni bon arona, e aki kabaaki te kaibuke bwa e na tiku n aki kakamwakuri inanon te tabo n rooro ma e na tabeka ana angka ao n ieakina marawan te maiu. Ma anne te taetae ni kaikonaki ibukin te tai teuana.

N te tai aei, I karekea te rau n atakin ae angkaan te euangkerio ao bwaan te Tia Kabooi Maiura e na kateimatoaira ao ni kawakinira.

Te aekaki n angka anne e na kawakiniira man uotakira nakon te kabuanibwai ao te tekebuaka. E na karekea ara tai ae kakimwareirei ni kakukureira ni bwain te maiu aei aika tikiraoi man aki bibitaki.

Te maiu e tikiraoi ao e uaana maiuakinana. Te ang, angibuaka, ao aira aika ai bon aroaroia naba a kona n anai nanora ni uotira nakon te kanganga aika noraki ke aki noraki, ma te rongorongo man te euangkerio ao mwaakana mai ieta a na kateimatoaira ni kawaira nakon ana tabo n roroo Tamara are i Karawa ae mano.

Ma ngaia, ae, ti na aki ti kakauongo nakon taian taetae n te maungatabu ni kabuta n Eberi ma ti na karaoi nanon aia rongorongo bwa kanga te angka ae kamatoaki raoi nakon maiura ni katoabong.

E bia kakabwaiaira te Atua ao ni kairiira n te mwakuri ae kakawaki man uaana aei!