Yut
Konfrens mo Mi
Woman we i raet, i stap long Toronto, Kanada.
Mi bin stap tingting se wiken blong jeneral konfrens i bin longfala mo i no fit, be afta sam taem i pas, mi bin kam blong laekem mo no save wet from. Wiken blong Jeneral konfrens i save mekem yumi kam strong moa long saed blong spirit, be i isi blong lusum ol filing ia taem yumi statembak nomol laef long Mandei. Sam long ol tingting andanit ia, oli bin helpem mi blong gohed blong kasem plante samting aot long konfrens olsem we mi save mekem.
Mi rere miwan from konfrens taem mi raetemdaon ol kwestin ia, mo afta, mi tekem ol not taem mi kasem ol ansa blong ol kwestin blong mi. Afta, mi laekem blong daonlodem ol toktok blong konfrens mo miusik long LDS.org mo putum olgeta long wan MP3 plea, mekem se mi save lisin long wan toktok o hym taem mi go mo mekem ol samting we mi stap mekem evri dei. Mi laekem tu blong stadi long ol toktok blong konfrens we oli stap long Liahona. Mi makem long kala mo raetem ol not long saed blong toktok long wan kopi blong mi blong Liahona. Taem we nekis konfrens i kam, magasin blong mi ia, mi raet gud long hem. Famle blong mi, samtaem, oli stadi ol mesej ia tugeta long famle haos naet.
Blong stap kipim spirit we yumi filim long taem blong konfrens wetem yumi mo gohed blong lanem ol mesej ia i nidim wok, be blong mekem samting ia, i bin wan bigfala blesing blong mi. Mi bin kasem plante paoa mo givhan long taem blong nid tru long fasin blong stap stadi ol mesej ia blong jeneral konfrens, mo mi save se ol mesej ia oli bin kam tru long insperesen.