Ol Man mo Ol Woman insaed long Wok blong Lod

Papa blong yumi long Heven i bin krietem tugeta, man mo woman, we oli ol spirit gel mo boe blong Hem. Hemia i minim se blong stap olsem wan man o wan woman, i no save finis. Hem i gat wan plan we Hem i putum i stap, blong helpem evriwan we oli jusum blong folem Hem mo Pikinini blong Hem, Jisas Kraes, blong oli kasem fiuja ples blong olgeta olsem olgeta man mo woman we oli gat raet long laef we i no save finis.

Sapos we, blong yumi kam olsem wan God, i stamba gol mo stamba tingting blong Tufala, mo sapos Tufala i save mo luk evri samting mo Tufala i stret evriwan, olsem we yumi se i tru we Tufala i olsem ia, nao, Tufala i andastanem gud olsem wanem blong mekem yumi rere, olsem wanem blong tijim yumi, mo lidim yumi blong yumi gat janis we i gudwan moa blong kwalifae blong kam olsem wan god.

Bigfala namba blong yumi i gat wan famle o wan fren we i fas long sam defren trabol blong sosaeti. Blong stap raorao from ol poen ia, plante taem, i no tekem ansa i kam, mo hem i mekem moa raorao. I gat samfala kwestin abaot weaples Jos i stanap long hem long sam poen we i no isi blong tokbaot, mo i had blong ansa blong save stretem tingting blong eniwan. Be, taem yumi stap askem Lod, long prea, long olsem wanem nao filing blong yumi mo wanem yumi stap mekem long ol situesen ia, strong tingting we i pusum yu i kam olsem: “?Yu yu biliv long Jisas Kraes? ?Mo yu yu stap folem Hem mo Papa?” Mi biliv se kolosap evriwan long Jos, long wan taem, bae i askem hemwan sapos hem i save mekem evri samting we Lod i askem hem. Be sapos yumi bilivtru long Lod, nao stret save ia i kam: “Mi biliv long Jisas Kraes, mo mi glad blong mekem wanem Hem i nidim mi blong mekem.” So yumi muv fored i go. !Ol toktok ia oli gat paoa tumas: “Mi mi biliv long Jisas Kraes”!

Ol testemoni blong yumi, mo pis blong tingting blong yumi, mo gudlaef blong yumi, i stat wetem wan tingting blong wantem biliv se Papa blong yumi long Heven i save moa gud bitim yumi.

Jos blong Jisas Kraes blong Ol Lata-dei Sent i Jos blong Lod. Mo Jos blong Hem, ol lida blong Jos oli lidim wetem mo tru long atoriti blong prishud mo ol ki blong prishud. “Ol prishud ki oli atoriti ia we God i givim long ol prishud lida blong oli lidim, kontrolem, mo rulum olsem wanem blong yusum prishud blong Hem long wol ia.”¹

Olgeta we oli gat ol prishud ki—nomata se hem i wan dikon we i gat olgeta ki from kworom blong hem, o i wan bisop we i gat ol ki from wod blong hem, o i wan stek presiden we i gat ol ki from stek blong hem, o i Presiden blong Jos we i holem evri prishud ki—i mekem i posibol stret blong evriwan we i fetful blong givim seves o i wok anda long daereksen blong olgeta blong oli yusum prishud atoriti mo save yusum prishud paoa. Evri man mo evri woman oli givim seves anda long daereksen blong olgeta ia we oli gat ol ki.

Evri man mo evri woman oli givim seves anda long daereksen blong olgeta ia we oli gat ol ki. Olsem ia nao Lod i rulum Jos blong Hem.

Bae mi ripitim wan samting we mi bin talem long Epril 2013 jeneral konfrens: “Insaed long plan blong Papa blong yumi long Heven we i givim prishud paoa long man, ol man oli gat stret responsabiliti ia blong wok wetem prishud, be oli no prishud ia. Ol man mo woman oli gat defren be ikwol wok. Semmak olsem wan woman i no save krietem pikinini sapos i no gat wan man, nao semmak, wan man i no save yusum fulwan paoa blong prishud blong stanemap wan famle we i no save finis, sapos hem i no gat wan woman. … long lukluk we i no save finis, tugeta, paoa ia blong krietem laef, mo prishud paoa, wan hasban mo wan waef tufala nao i serem.”²

?From wanem nao oli odenem ol man nomo long ol ofis blong prishud, be i no ol woman? Presiden Godon B. Hinkli (1910–2008) i eksplenem se Lod nao, be i no man, “we i putum se ol man nomo insaed long Jos ia bae oli mas kasem prishud”…³ Afta we oli talem mo mekem evri samting, Lod i no talemaot from wanem nao Hem i bin oganaesem Jos blong Hem long wei ia we Hem i bin mekem.

Yumi no mas fogetem se kolosap haf blong evri tijing we i tekem ples insaed long Jos, ol sista ia nao oli stap mekem. Plante lidasip i kamaot long ol sista blong yumi. Plante janis blong givim seves, mo ol aktiviti, ol woman nao oli mekem plan from mo oli lidim. Kaonsel mo wok blong ol woman long ol wod mo stek kaonsel, mo long ol jeneral kaonsel long hedkwota blong Jos, oli givim ol niu laet, niu waes tingting, mo gudfala skel long ol samting.

I nidim tufala samting ia, blong man i respektem woman mo ol spesel presen long saed blong spirit we oli gat, mo tu, ol woman we oli respektem ol ki blong prishud we ol man oli holem blong invaetem ol ful blesing blong heven long eni wok insaed long Jos.

Ol man mo ol woman oli ikwol long ae blong God mo long ae blong Jos, be blong stap ikwol i no minim blong stap semmak. Ol responsabiliti mo ol tabu presen blong ol man oli defren long hemia blong ol woman, be oli no impoten defren o oli no moa bigwan. Doktrin blong Jos blong yumi i putum ol woman oli ikwol long ol man, be yet, oli defren long ol man. God i no luk se wan woman o wan man i moa gud, o i moa impoten bitim narawan. Presiden Hinkli i talemaot long l woman se “Papa blong yumi We I No Save Finis i neva gat tingting ia se bae oli daon moa long glori bitim ol nara kriesen blong Hem.”⁴

Ol man mo ol woman, oli gat ol defren presen, ol defren paoa, mo ol defren wei blong lukluk samting mo mekem samting. Hemia i wan stamba risen from wanem yumi nidim wanwan long yumi. I nidim wan man mo wan woman blong krietem wan famle, mo i tekem man mo woman blong mekem wok blong Lod. Wan hasban mo wan waef we tufala i wok long stret mo gud fasin, tufala i komplit, i fulwan. Bae yumi lukaotgud blong yumi no stap blokem plan blong Papa blong yumi long Heven mo ol stamba tingting blong laef blong yumi.

Taem ol man mo ol woman oli go insaed long tempol, tufala tugeta i kasem semfala paoa, we i paoa blong prishud. Nomata we atoriti blong prishud oli daerektem tru long ol prishud ki, mo ol prishud ki, ol man nomo we oli stret mo gud oli holem, blong save kasem paoa mo ol blesing blong prishud, hemia i stap nomo long evriwan blong ol pikinini blong God.

Papa blong yumi we I Stap long Heven i glad nomo blong givim paoa blong Hem. Evri man mo evri woman oli save kasem o yusum paoa blong ia blong helpem sevem laef blong yumiwan bakegen. Evriwan we i bin mekem ol tabu kavenan wetem Lod mo oli givim ona long ol kavenan ia, oli save kasem revelesen blong olgetawan, oli save kasem blesing tru long seves blong ol enjel, mo oli save toktok wetem God, oli save kasem fulwan blong gospel, mo long en, oli save kam blong save kasem, wetem Jisas Kraes, evri samting we Papa blong yumi i gat.

Pikja

A Sunday school class of teenagers. One of the youth is in front talking to the class while the teacher is standing to the side.

Yumi nidim ol woman blong Jos ia blong save doktrin blong Kraes mo blong oli testifae abaot Restoresen long evri wei we oli save mekem. I neva gat wan taem long histri blong wol we i gat fulap fulap defren samting long hem. Setan mo ol soldia blong hem oli mekem i stret gud moa ol tul blong faet blong olgeta, i rere from milenium, mo oli gat eksperiens blong prapa spolem gud fet mo tras we famle blong man i gat long God, mo long Lod Jisas Kraes.

Yumi evriwan—ol man, ol woman, ol yang adalt, ol yut, mo ol boe mo ol gel—i gat Lod mo Jos blong Hem blong difendem, blong protektem, mo blong tokbaot raon long wol. Yumi nidim moa strong voes mo fet blong ol woman we i save lidim tingting blong man. Yumi nidim blong lanem doktrin mo blong andastanem wanem we yumi stap biliv long hem blong yumi save talem testemoni blong yumi abaot trutok blong evri samting—nomata ol testemoni ia, oli givim raon long faea blong kamp long Yang Woman Kamp, long wan testemoni miting, long wan blog, o long Fesbuk. Yufala nomo i save soem wol se ol woman blong God we oli mekem ol kavenan oli luk olsem wanem mo oli bilivim wanem.

Ol sista, ples we yufala i stap blong lidim tingting blong man, i no gat tufala ples olsem—i no gat wan i save tufala sem ples olsem. I no gat wan i save difendem Sevya blong yumi wetem moa strong toktok blong winim tingting, o wetem moa paoa, be yufala nomo, ol gel blong God, i save mekem—yufala i gat wan paoa insaed long yufala, mo wan strong tingting. Paoa blong voes blong wan woman we i jenisim laef, i no gat man i save makem, mo Jos i nidim ol voes blong yufala naoia i moa bitim eni taem.

Mi livim wetem yufala witnes blong mi, mo testemoni blong mi, se yumi stap long wan taem we yumi mas stanap wan. Yumi mas stanap tugeta—ol man mo ol woman, ol yang man mo ol yang woman, ol boe mo ol gel. Yumi mas stanap from plan ia blong Papa blong yumi long Heven. Yumi mas difendem Hem. Oli stap pusum Hem i go saed. Yumi no save stanap nating olsem ol memba blong Jos blong Jisas Kraes blong Ol Lata-dei Sent, mo letem hemia i gohed blong hapen; be yumi mas gat inaf strong paoa long tingting blong mekem man i harem voes blong yumi.

Bae God i blesem yufala blong gat strong paoa long tingting blong stadi, mo blong save ol simpol trutok blong gospel, mo afta, serem olgeta long evri janis we yu gat blong serem.