Faenem Hop long Fiuja

Long 12 Septemba 2001, mi mo waef blong mi i wokem go mo kam long rod blong hospital long Takson, Arisona, YSA, mo no save wet blong ol aoa i pas kwik taem mitufala i stap wet long boe blong mitufala we bae i bon. Long televisen blong mifala mo long evri televisen long bilding ia, mifala i bin stap luk ol film abaot yestedei long Niu Yok Siti—ol pikja blong tufala bigfala taoa blong siti, we i foldaon mo smas nogud. Oli gohed blong putumaot ol pikja ia long televisen blong plante aoa we i mekem mifala i harem nogud. I luk olsem i wan long ol nogud taem blong karem wan bebi i kam long wol—wan wol we i luk olsem i tudak tumas mo fulap long rabis samting.

Eli long nekis moning, smol boe blong mitufala i bon. Taem mi stap holem smol tintin pikinini blong mitufala ia, mi tingbaot ol rabis nius blong sam dei we i jes pas, ol taem we i mekem mi tingting i gobak long bigfala faea we i bonem Yeloston Nasonal Pak long 1988. Bigfala faea ia i kakae kolosap 323,750 hekta blong bus. Pak ia i bin bon nogud mo no gat wan samting i stap. Ol niufala pikja i soem nomo graon we i blak evriwan mo ol bifala blak smok long skae. Namba blong olgeta we oli kwik blong help i no bin inaf blong karembak ol samting we i bin lus. I luk olsem sapos paoa mo strong paoa blong ol tri mo bus oli no naf blong fesem bigfala paoa blong faea ia.

Be nekis pring taem bae i wan kwaet merikel—ol smol grin plant mo ol flaoa oli stap blong pusum hed tru long graon we i bon long faea. Sloslo, moa mo moa flaoa, mo smol tri, mo ol bigfala tri oli stat blong laef bakegen. Pak ia i bon bakegen, sloslo, mo i fulap wetem ol smolsmol, gudfala ditel mo wetem taem, risal blong hem i gud tumas.

Long ol taem we i luk olsem se fraet bae i kakae yumi olsem ol bigfala faea blong Yeloston, taem fet mo hop blong yumi i kasem mak blong hem, yumi mas tingabot se i gat wan kwaet fandesen we i no save muvmuv andanit long yumi, we hem i gat moa paoa bitim eni rabis fos we bae yumi save fesem. Hileman i eksplenem se fandesen ia hem “ston blong Ridima blong yumi, we i Kraes, Pikinini blong God.” Sapos yumi hang gud long Hem, nao “taem we devel bae i sendemaot ol strongfala win blong hem, yes ol spia blong hem long wael win, yes, taem we ol ston blong aes blong hem mo strong win blong hem bae i foldaon long yutufala, bae i no gat paoa ova long yutufala blong pulum yutufala i go daon long bigfala hol blong sore mo sore tumas we i no gat en, from ston blong hem we yutufala i bin bildimap yutufala, we i wan sua fandesen, wan fandesen long hem we sapos ol man i bildimap olgeta long hem oli no save foldaon” (Hileman 5:12).

Taem ol strong fos blong devel mo temtesen long wol oli fesem yu, bae yumi save ting se ol smol mo simpol paoa blong gospel i smol tumas mo yumi no save winim. Maet bae yumi filim blong gat tu tingting, o blong lusum hop taem yumi stap wet blong man i stretem ol rong, blong man i mekem soa i finis, mo blong man i ansarem ol kwestin. Olgeta win ia stret oli sap kakae yumi, be semtaem, oli sakem ol sid blong jenis mo blong groap, mo bigfala paoa blong gospel i wok kwaet andanit long graon blong wol ia, i stap rere long wan taosen blong smol sid blong hop mo laef.