Tiepene oh Ngehi

I kin wiahki me tiepene lap me kin wiawi rahn kaunop oh rahn sarawi werei oh kapwang, ahpw mwurin sounpar kei, I tepida pereniki oh kasik ansou me e kin wiawi. Tiepene lap me kin wiawi rahn kaunop oh rahn sarawi kak wia mehn kakehlail en pali ngehn, ahpw soangen pepehm pwukat kin mengei en sohrala ansou me kitail pwurehng doula nan atail mour Niehd. Ekei madamadau me mih pah me kin kalapw seweseie I en doulahte alehdi uwen me I kak sang tiepene lap.

I kin kaunop pein ngehi ong tiepene ni ahi kin ntingihdi ahi kalelapak kan, oh ngehi eri kin ntingihdi pasapengpehkan ni eh kin pasapengla nan tiepenehu. Mwuri, I kin kihsang nan internet padahk kan oh koul en nan tiepeneo sang LDS.org oh kihieng nan kisin keseng me kahdaniki MP3 pwe I en kak rong padahk de koul en sarawi ni ahi pahn wia ahi kediropw en ehuehu rahn. I pil kin pereniki onopki pwuhk en Liahona me ire kan en tiepene mih loale. I kin kalipwiala oh ntingih ni keilehkan en pein nei pwuhko. Ni ansou me tiepene me pahn wiawi mwurin mwo kin leledo, I doadoahngkihier mwahu nei makasihno. Ahi peneinei kin ekei pak onopkipene padahk kan ni aht kin wia aht tuhpenehn soutik en peneinei.

Kolokolete ngehn me kitail pehm nan tiepene oh doudoulahte aliale kamarain sang nan padahk kan kin anahne doadoahk, ahpw e wia kapai laud ehu ongie ni ei kin kapwaiada met. I alehdier kakehlail laud oh kaweid ansou me I kin anahne, sang onopiki padahk kan sang tiepene lap, oh I ese me padahk pwukat uhdahn kamarain.