Iren Mahsen en Padahk en Pas, Epreil 2014
Misin Sarawi en Sises Krais: Sounkomour oh Soundor
Onopki ni kapakap ire pwukat oh rapahki ken esehla dahme ke pahn ehukihda. Ia mwomwen ahmw wehwehki duwen mour oh doadoahk en misin en Sounkomouro eh pahn kalaudehla ahmw pwoson Ih oh kapaiada irail akan me ke kin tetehk sang ni omw kin wia ahmw padahk en pas? Pwehn alehdi iren kapehse kapatapat, tehk reliefsociety.lds.org.
Pwoson, Peneinei, Sawas
Elder D. Todd Christofferson en Pwihn en Wahnpoaron Ehk Riemen mahsanih, “Sounkomour wia ehu mwahr kesempwal nanpwungen mwahr akan me kin kawehwehda duwen Sises Krais.” Komour wehwehki pwainla pweipwand ehu. Komour kak pil wehwehki kapitala de lapwahda sang ni pwainla pweipwand. … Ehuehu wehweh kan kasalehda soangen palihkei me Komourla lapo me pweida sang Sapwellimen Sises Krais Tomwo, me iangahki, lokaiahn nan diksineri koasoaia, ‘en kapitasang nan dihp oh kalokolokpe kan, ni mwohmw en tohnmetei eh wiawi ong me dihpo.’”1
Linda K. Burton, President lap en Pwihn en Sawas en Lih, koasoaia: “Sahm Nanleng … kadarodo Sapwellimeo me Iehros oh unsek pwe en lokolongki dipatail kan, atail nsensuwed kan, oh soahng koaros me kin mwomwen sapahrek nan pein atail mour.
“… Emen lih me lelohngehr soangen kahpwal oh nsensuwed tohto koasoaia ni pilen mese eh kereker, ‘I wehwehkidahr me I rasohng tehn tala-20 mering ieu—mwerekireklahr, tei, samin, wiakau, oh ohla. Ahpw … Ei wia tala 20 duweduwehte.’ Lih menet ese me e … kesempwal ong [Koht] pwehki Sapwellimeo pekederdo pwe en tomwiki ih. Lih koaros nan Mwomwohdiso wet anahne ese dahme lih menet ese.”2
Sang Pwuhk Sarawi Kan
Sang Atail Poadoapoad
Nan Kadehde Kapw audaudki soai kei duwen lih akan me kin kasalehda arail pwoson Sises Krais, esehla oh momourki Sapwellime padahk kan, oh kadehdehki Sapwellime doadoahk, manaman kapwuriamwei kan, oh wahu.
Sises mahsanih ong Lih me mih ni pwarero:
“ahpw mehmen me nimpil sang ni pihl wet me I pahn kihong solahr pahn pwurehng men nimpilda kohkohlahte. Pihlo me I pahn kihong, pahn poad loale oh pwapwangkadahn pihl me pahn kuskusdahng mour soutuk.”
“Liho ahpw patohwanohng, “Maing, komw ketikihong ie pihlen, pwe I en dehr pwurehng men nimpilda. …
“I ese me [Mesaia] pahn ketido, … : e lao ketido, e pahn ketin masanihong kitail mehkoaros.
“Sises ahpw ketin sapeng, mahsanih, “Iei ngehi ih, me koasoakoasoi ong uhk.”
Liho “ahpw pwilikihdi eh pwoatol en pihlo,” oh pwurala nan kahnihmwo oh kadehdehki Ih. (Tehk Sohn 4:6–30.)
© 2014 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/13. Kamanaman ong kawehwe: 6/13. Kawehwehpen Visiting Teaching Message, April 2014. Pohnpeian. 10864 885