Iren Mahsen en Presidensi Keieu, Epreil 2014
Angke Me Katengetengdi Mwahu
Ansou kis samwalahro I ahniki ansou mwahu en iang sohp kaselel pwoat me tang ni keilen pahina kaselel en Alaska, USA. Ni ansou me kepdino kaunopada sohpo eh pahn peipei nihpwongo nan kepidau kaselelo, e kasawih mwahu wasao oh tehk irair kan, me rasehng ahd, loal en sehd, oh uwen doh sang mehkot keper kan. Ansou me e itarkier soahng koaros, e kadaridi angkehu pwe sohpo en kak peipei wasa mwahu oh angkehdi teng, kahrehieng aramas en nan sohpo ahr kak kilang oh pwurpwuriamweiki Sapwellimen Koht kepikipik kaselel kan.
Ansou me I kilikilang pahinahu, I esehda me sohpo kin wie peipeiseli sang ni kisin kisinieng oh ahd ahpw kereniong sohte sansal. Ahpw, sohpo tengedihte oh peipeiselihte nan pwonopwon ehu me wiawihda sang uwen reirei en sahl en angkehu oh kehlail en angkehu.
Kepdino sohte nekidala angkehu nan sohpo, onopehngete en kihdi ihte ni ansou me melimel pahn kohkohdo. Soh, e katengehdi angkehu pwe en wia mehn doareparail oh doare sohpo e de peila wasa me keper de serada pohn mad ni pahsinse oh tohndoadoahk kan ahr pahn sohte per.
Ni ansou me I wie medemedewe dahme I kilikilang, I medewe ma met sou wia ansou mwahu ong soai karasaras, I saikinte katanga sompihr pak ehu.
Dahme Kitail Anahnehki Angke.
Kahrepen eh kin mie angke iei pwe en koledi sohp wasa sohte keper oh en katengetengdi wasahkis de en sewese koledi sohp ansou me iren mesenlahng suwed. Ahpw, en kapwaiada kahrepe kesempwal pwukat, e sohte itar en kolokolte angke. Angkehu anahne kehlail, kehlail, oh doadoahk mwahu wasa oh ansou me e konehng.
Emenemen aramas oh peneinei kan pil anahne angke.
Kahpwal kak kohdo ni duwen melimel kehlail me pahn ipir kitail sang nan ahl oh kamasangkinkitail eh pahn keseikitailehng nan takai kan. Ahpw ekei pak kitail pil kin mih nan keper ansou me mehkoaros mwomwen sohte keper—kisinieng sohte nohn angin oh sehd mwele. Ni mehlel, kitail kak mih nan keper laud ansou me kitail peipeiseli oh ekiste mwekmwekid ni atail kerenieng sohte kehn.
Rongamwahuo Iei Atail Angke
Angkehkan anahne en kekeluwak, kehlail, oh kaunop mwahu pwe en onopohng ansou me anahn. Pil kapatahieng, irail anahne katengetengdi ong sahl kehlail me kak kol de pelian ahd kan.
Ni mehlel, rongamwahu en Sises Krais wia soangen angke wo. E kaunopdahr sang Sounkapikipik me ketin kapikada mehkoaros ong kahrepe sarawi oh e ketin koasoandi en kihda silasil oh kaweid ong Sapwellime serihkan.
Dahkot rongamwahuo, mwurin mehkoaros, likin Sapwellimen Koht pilahn en lapwahda Sapwellime serihkan oh kapwureiraillahng nan mwoale?
Pwehki atail esehier me mehkoaros kin uhdahn kehieng peila, kitail anahne en katengehdi atail angkehkan pohn poahsoan en takai en rongamwahu mehlelo. Irail sohte konehng en kawaidi pohn pihk en pohnmwahso de ekiste sair pohn atail pepehm kehlail kan.
Nan sounpwong wet kitail ahniki ansou mwahu en karonge Sapwellimen Koht ladu kan nan tiepene lap en Mwomwohdiso. Arail mahsen kan, iangahki pwuhk sarawihkan oh kemwekid kapehm kan en Ngehno, ketkihda silasil oh poahsoan kehlail en padahk soutuk kan me kitail kak katengehdieng atail angkehkan pwe kitail en kak kolokol teng oh pitsang nan kahpwal akan en mour.
Soukohp en mahs Helaman padahngki me iei pohn paip en atail Sounkomour, me iei Krais, Sapwellimen Koht Iehroso, me kitail anahne kauwada atail poahsoan powe; pwe ansou me tepelo pahn kadarodo ah kisinieng kehlail kan, ah engipip kan, ni ansou me ah takai ais kan oh ah melimel kehlail kan pahn lelleluhk, e sohte pahn mie mene pohmw en apihiukdihla nan lehn nsensuwed oh weikek poatoapoat, pwehki paip me kitail kokouda powe, me iei poahsoan mehlel, poahsoan me ma aramas kokouda powe re sohte kak sohte pweida (Helaman 5:12).
Kesempwalpen Katengehdi Mwahu Angkehkan
Nan mour wet kin mie wiepen kasong atail angkehkan oh kasongosongih kitail en peila. Ahpw, ma atail angkehkan katengetengdi ni pwung nan paip en atail Sounkomouro, irail pahn koledi—sohte katepe kehlail en ahng, kehlail en ahd, de ileilehn ilok kan.
Uhdahn, sohp pwoat sohte wiawihda pwe en mihmihte wasahkis nan kepidau ahpw en kihda angkehu oh seiloak nan sehd en mour. Ahpw met e wia ehu mehn karasaras en ehu ansou tohrohr.
Ansou wet, I nsenamwahuki ahi ese me angkehn rongamwahu oh paip en atail Sounkomour pahn kol kitail teng oh doareikitail.
Soangen angkeo pahn pereikitailsang peilahng wasa keper oh paisuwed. E pahn kahrehiengkitail ansou mwahu en perenki kilang lingaling kan en mour me sohte me pahrekohng me kin kalapw-wilwiliali oh kaselel mehlel.
Mour uhdahn lingan oh mie katepen momourki. Kisinieng, melimel, oh ahd akan me uhdahn kin mie kak song kitail en peila wasa keper kan me sansal de sohte sansal, ahpw padahk en rongamwahuo oh manamanpe me sarawi pahn kolkitaildi nan atail ahl en pwurala nan kepidau en Samatail Nanleng me sohte keper.
Ihme kahrehda, kitail en, dehr rongete kapahrek kan en tiepene lap en Epreil ahpw pil doadoahngki arail padahk kan nin duwen ar wia angke me katengetengdiong atail mour nan ehuehu rahn.
Koht en kapai oh kahluwaikitail nan mwekid kesempwal wet!
© 2014 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/13. Kamanaman ong kawehwe: 6/13. Kawehwehpen First Presidency Message, April 2014. Pohnpeian. 10864 885
Padapadahk sang Iren Mahsen Wet
Medewe koasoakoasoikipene kesempwalpen angkekan ni koasoaia duwen ahn Lehi peneinei seiseiloakdohng sapwen inouo (tehk 1 Nephi 18). Ke kak kasalehda nan 1 Nephi 18:11–15, ansou me Nephi pirapirdi, Liahona sohla doadoahk, oh sohpo peila nan kisinieng kehlail kan. Dahme kitail pahn sohpai ansou me kitail sohte tengedi mwahu nan rongamwahuo? Ke kak kasalehda nan 1 Nephi 18:21–22 oh koasoaikipene ia mwomwen atail kak diar doarepatail ni atail sohpeilahng Soundoro.