Rongorongoia Kairake n Ikawai
Te Rairaki ao te Anganano iFinland
Aekakira aron te kairake n ikawai ae kakaonimaki iaon Finland? Temanna te kairake n ataei ni mwaane ae tibwaua katein abana ao ana onimaki.
Tabeua te maire man biken Helsinki, Finland, bon te nono ae kateaki i tari i Suomenlinna, ae kateaki n te ka 18 n tienture are e na kamanoia n tuukia taan ninia te aba. N rinanon rababan abamwakora aika onoua, te bwai ni kamanomano aei e tei ibukin aia nanomatoa ni matoatoa ana aomata Finland.
Ma kaain Finnish ae kaain te aro a kawara te tabo ae kaokoro ngke a mwananga nakon kautuun te aba. Te Helsinki Finland Tembora bon te kanikina ae rabwata ibukin rairakia ao te kamanoaki are a karekea man maiuakinan te euangkerio.
Ibukin Niilo Kervinen, te kairake n ikawai ae 24-ana ririki-ni maiu mai Rovaniemi, Finland, te mwananga n te turein ae 10-aoana nako Helsinki bon te boo ae bebete kaboana ibukin te kakabwaia ni beku inanon te tembora.
Imwain katabuan te Helsinki Finland Tembora n Okitobwa 2006, Niilo ma tabeman kaain ana uoote a mwananga nako Stockholm Sweden Tembora ke nakon te Copenhagen Denmark Tembora. “Te mwananga aei e na kabanea teuana te wiiki n tain te motirawa n te tiamwa,” e uringnga. Te mwamwananga n te bwati ao te matu inanon taian uma n rianna inanon mwamwananga akanne bon tabeua ururing aika tamaroa ake e uring.
Irarikin anne n reken te tembora iaon abana bon te kakabwaia ae kamimi. “Ngke a katanoata te Helsinki tembora, I bon rangin kukurei,” E taku Niilo. “I teimatoa n namakina mwaakan te tataro (are e karaoaki n tain katabuan te tembora) ni katoa te tai are I rin iai inanon (te tembora).”
Ana tangira aei ibukin te tembora are e a karika kaokoron Niilo mairouia raoraona. “Kaain te aba ae Finland a mwakuri korakora ao a rang ni kukurei ngkai a kakamwakuri ma ti teutana aia tai ae reke ni karaoi baika a kaineti ma bwain te tamnei inanon maiuia,” e kamatata. E ngae ngke e taku Niilo bwa e aki toki ni kakabwaiaki ma raoraona aika tamaroa, ngkai e tabe n ikawairake ao kaokoron aron maiua raoraona ma aron reireiana bwa e kanga aron maiuna e boni matata raoi. Boni man te bitaki aei are e a karika Niilo bwa e na ukoukora oin ana koaua ngke e koro te 17 ana ririki. “I tabe ni karaoa au babaire bwa N na tei ia ao a na antai ngai,” e taku “Ma ana kakabwaia te Uea ao ma aia kairiri au utu ao raoroau aika tamaroa, I a karekea riki au koaua ae matoatoa ibukin te Ekaretia.”
N taetae ibukin te rairaki, e taku Unimwaane David A. Bednar man te Kooram n Abotoro n te Tengaun ma Uoman, “I berita bwa ngkana e korakora ara atatai ibukin te koaua ao n rairaki nakon te Uea, ti na reitinako n nene ao n teimatoa ao n aki kona ni bwaka.”1 E ngae ngke e kainnanoaki te tai ma te mwane ibukin te mwananga nako Helsinki, e bon motinnanoia Niilo bwa e na riki bwa ana reirei Kristo. Ao ibukin Niilo, karaoan ae bon riai ni kakoroa bukin te motinnano tiaki te anganano ni kabane.