Karem Ol Blesing blong Prishud i kam long Hom blong Yu

Hem i Mandei naet, mo yu gat plante homwok. Yu harem papa i stap singaotem famle blong kam tugeta blong famle haos naet. ?Bae yu mekem wanem?

Joes A: Yu ansa, “!Ah, Papa, mi no gat taem blong samting ia tedei long naet! !Mi mas stadi!”

Joes B: Kwiktaem yu help blong tekem evri brata mo sista blong yu, mo wetem glad, tekpat long ol prea, miusik mo mesej.

Stap sapotem papa mo mama blong yu wetem glad taem yu tekpat long famle haos naet, famle prea, mo famle skripja stadi; hemia sam samting blong mekem prishud lidasip long hom blong yu i kam strong moa. I gat plante nara wei, olsem:

• Prea from papa mo mama blong yu (Tufala tu i prea from yu evri dei.)

• Sapotem papa mo mama blong yu long ol koling blong olgeta blong Jos mo givim help raon long haos, speseli taem oli bisi wetem sam spesel wok.

• Helpem papa mo mama blong yu blong welkamem ol hom tija taem oli kam, mo wetem respek, lisin long ol mesej blong olgeta.

• Sapos i gat wan tempol long eria blong yu, askem blong lukaotem ol brata mo sista blong yu blong mekem se papa mo mama blong yu oli save go long tempol mo tekempat long ol prishud odinens.

Tingbaot se i no papa mo mama nomo we oli responsibol blong invaetem mo kipim Spirit insaed long hom blong yu. Yu save mekem plante samting blong invaetem Spirit, hemia tru long ol aksen mo fasin blong yu. ?Yu yu stap mekem pat blong yu blong stap invaetem paoa blong Spirit insaed long hom blong yu?

I no evri famle we oli luk semmak, o oli wok semmak. Ating yu stap insaed long wan famle we i gat papa, o i gat mama nomo i stap, o i no gat wan we i kasem prishud we i prisaed insaed long hom blong yu. I gat yet plante wei blong invaetem prishud paoa blong mekem yu mo famle blong yu i kam strong moa. Hemia ol samting we yumi mas mekem oltaem, nomata wanem situesen yumi stap long hem:

• Mekem prea blong yuwan, stadi long ol skripja, mo livim kaekae. Ol traehad ia bae oli helpem yu blong stap strong long saed blong spirit mo bae i invaetem Spirit insaed long laef blong yu mo insaed long ples we yu stap long hem wetem ol narafala man.

• Tekem taem blong wok strong long ol koling blong yu, long ol wok blong Jos we oli givim long yu, mo yu mas rere long ol Sandei lesen. Taem yu mekem ol samting, bae yu gat tras long yuwan mo bae yu soem sapot long ol program blong prishud.

• Soem respek long evri memba blong famle blong yu, mo sapotem ol gudfala aktiviti blong olgeta. Ol joes ia oli help blong mekem ful famle i kam strong moa.

• Serem wetem famle blong yu ol samting we yu lanem mo mekem olgeta samting ia insaed long ol klas blong Jos mo insaed long ol kworom blong Jos. Hemia i wan wei blong tekem ol tijing blong gospel i kam insaed long hom.

• Faenem sam wei blong givim seves long olgeta raonabaot long yufala tru long ol simpol aksen blong fasin we i kaen.

• Helpem blong mekem ol wok blong haos, o blong helpem wan brata o sista.

• Soemaot lav we i semmak long lav blong Kraes i go long famle blong yu—bae i mekem wan bigfala samting blong bildimap wan strong rilesen bitim eni nara samting we bae yu save mekem.

Taem yumi stap givhan, lavem, mo mekem ol famle blong yumi oli kam strong moa, yumi stap tru long ol kavenan we yumi bin mekem long taem blong baptaes, blong stanap olsem ol witnes blong Jisas Kraes, blong obei long ol komanamen blong Hem, mo blong mekem olgeta we oli stap raonabaot long mifala oli kam strong moa. Yumi save dipen long paoa blong kavenan blong prishud blong stap olsem wan blesing, mo blong help insaed long ol hom mo ol famle blong yumi. Prishud, seves, mo hom oli ol toktok we oltaem nomo oli mas joen insaed long maen blong yumi. Ol memba blong famle blong yumiwan bakegen, oli mas kam nambawan taem yumi faenem ol wei blong tekpat long wok blong fasin blong sevem man. Taem yumi mekem ol famle blong yumi oli kam strong moa, yumi stap mekem Jos tu i kam strong moa, yumi mekem ol komuniti, mo wol i kam strong moa.