O Le Auaunaga Alofa a le AAG o loo Faaalia i Mea na Tutupu o Malo Aufaatasi

O le galuega a le Auaunaga Agaalofa a le AAG sa avea lea ma mataupu o se talanoaga faavaega i le laumua o Malo Aufaatasi i Niu Ioka, ISA. O le mea na tupu, “Iloaina o le faa-Mamona ma Lona Matafaioi i Fesoasoaniga Alofa,” sa avea o se vaega o le faasologa o le Taulai atu i le Faatuatua e lagolagoina e le vaega o le faalapotopotoga fesoasoani tumaoti o le Matagaluega o Faamatalaga a Tagata Lautele a le U.N.

“O lenei faasologa ua faamoemoe ia maua ai se malamalama lautele atu o le auala o fefaasoaai ai e faatulagaga o talitonuga eseese ia mataupu faavae autu masani e pei o le faapalepale, fefaaaloaloai mo i latou e ese mai ia i tatou, ma o se tautinoga i le faatusatusaga ma le toafilemu o vaifofo i finauga,” o le faamalamalama mai lea a le taitai o vaega o Felipe Queipo, fesoasoani o faamatalaga lautele i le U.N. o se tagata o le Ekalesia mai Sepania.

“O le tausia o e matitiva o se tiute faavae lea o soo se tasi na te faamamaluina le Atua ma le usoga a alii ma tamaitai o tagata uma—e auauna atu, siitia, faamanuia, ma faamama avega e aunoa ma se fesoasoani o talitonuga faalelotu, filosofia faaagafesootai, atunuu, ituaiga, itupa, po o tua atu,” na fai mai ai Sharon Eubank, faatonusili o le Auaunaga Agaalofa a le AAG, lea sa auai i le talanoaga.

I lana tautalaga sa ia toe iloiloina ai foi le ta’ua o le faamoemoega o Galuega Agaalofa a le AAG: ina ia faamāmā i mafatiaga, uunaia o le ola faalagolago o le tagata ia te ia lava, ma maua ai avanoa mo auaunaga mo aiga o tagata uma. Na ia ta’ua, o ona taumafaiga autu, o vai mama ia, nofoaga mo le tausiga o pepe faatoa fananau mai o loo tigaina, tausiga o mata, tufatufaina o nofoa faataavalevale, tui puipui, meaai, ma le tali atu i faalavelave faafuasei.

O isi sui auai o le Au Paia o Aso e Gata Ai e aofia ai Ahmad S. Corbitt, faatonu o le ofisa a le Ekalesia i Niu Ioka o le Va i Fafo Lautele ma Faavaomalo, ma John P. (Phil) Colton, o le o loo auauna atu faatasi ma lona faletua, o Barbara, o se sui o le U.N. mo Galuega Agaalofa a le AAG.

Na fai mai Uso Corbitt o loo i ai “tagata agalelei i lotu uma o le lalolagi,” na faamamafa mai ai le taua o le galulue faatasi. Na faamalamalama mai e Uso Colton ni auala na tuuina atu ai e le Galuega Agaalofa a le AAG le fesoasoani i le toeitiiti lua miliona tagata i atunuu e 132 i le 2013.