Olwelah ke Insiyac uh Forlah

Ninac kiyuck, Mildred Bennion Eyring, el kapkapwack ke mura in imac se fin acn Granger, Utah, USA. Sie sin tamuhlwel wiyacl ah, Roy, el ukwe orekma luhn sucu uh ke tuhfahlah sip. In oacna sie mukul fuhsr el sislah wik pucspucs som nuh sahyac. Kais kuhtuh na srihkweni kena lal ke Alu uh. Tok kuhtuh el mukwilac nuh Idaho, USA, pahyuckyak, ac tuhlihk tolu nahtuh. El misac ke el yac 34 ke muhtwacn kiyacl ah matwac yac 28 ac tuhlihk nahtuhlos ah arlac srihk.

Finne sucu srihsrihk se lal Roy ah muhta fin acn Idaho ac ninac kiyuck ah som mael 2,500 (4,025 km) nuh New Jersey, USA, el kwacna suhmuhslah lwacta in luhngse ac ahkkweyeyuck nuh selos. Sucu luhn uncle se luhk ah luhngse na pahngon ninac kiyuck ah “Aunt Mid.”

Yac pucspucs somlah ah, ac sie lwen ah nga topuk sie tacluhfon tuhkuh sin sie kuhsin luhk ah. Fwackyuck nuh sihk lah katinmas se kiyacl Roy ah misac. Kuhsin se luhk ah fahk, “Aunt Mid el kena kom in etuh.” Aunt Mid el misac ke pacl loeloes somlah ah, tuhsruhk sucu uh srwackna puhla luhngse lal ac kena in fahk nuh sihk.

Nga lut ke luhpan kunohkohn ninac kiyuck ah ahkfalyelah ke sucu lal oacna nuh ke kunohkohn luhn mwet pahluh luhn Mwet Nephi ahkfalyelah ke sucu lalos in fototo nuh sin sucu elos kena in use nuh ke wosasuc luhn Jisus Kraist. Nephi el suhmuhslah sie ma sihmlac ma el finsrakkihn in moklweack tuhlihk nuhtin tamuhlwel wiyacl in fohlohk nuh ke luhlahlfongi luhn patriarch lalos, Lehi. Wen nahtuhl Mosiah ah ahkkahlwemye pacna luhngse se ingacn ke elos luti wosasuc nuh sin usru lal Lehi.

Leum El orwaclah inkacnek nuh sesr in puhla luhngse in sucu uh ma kuh in tuhtahflah ne tok. Mwet fuhsr ke Alu uh mihsenge puhla insiyaclos forlah nuh sin sucu lalos uh. Elos suk inen mwet ke sucu lalos an suc wacngihn pacl wowo la in eis akwuck ke molwelah ke moul se inge. Elos us ine ingacn nuh tempuhl. Ke elos utyak nuh ke kof in pacptais an, elos eis pacl wowo in puhla luhngse luhn Leum ac mwet ke sucu ma elos oruh akwuck kacn mwet sahyac uh.

Nga kuh in srwackna esam luhngse ke puhsrwen kuhsin luhk suc pahng ac fahk, “Ninac kiyacsr ah misac, ac Aunt Mid el kena kom in etuh.”

Kuhtuh suwos suc oruh akwuck nuh sin mwet ke sucu an kahsruh ke luhngse, oacna ke wen nahtuhl Mosiah ac mwet pahluh Nephi oruh ah. Oacna elos, kowos fah puhla engan nuh selos suc lwelah kahsruh lowos an. Kowos oacyacpac kuh in puhla kain puhla wo sacn pacna oacna Ammon, suc fahk ke kuhlwacnsap in misineri lal inmahsrlon mwet ke sucu loes an:

Ke ma inge, lwelah kuht in kaksyak, ahok, kuht fah kaksakihn Leum; ahok, kuht fah engan, tuh engan lasr fohnlah; ahok, kuht fah kaksyakihn God lasr ne tok ma pahtpaht. Liye, suc kuh in arulacna kaksyakihn yohk in Leum? Ahok, suc kuh in fahk upac ke kuh yohk Lal, ac ke pahkotwen Lal, ac ke mongfihsracsr Lal nuh sin tuhlihk nuhtin mwet uh? Liye, nga fahk nuh suwos, nga tiac kuh in fahk kihtin ma se emet ke ma nga puhlakihn (liye Alma 26:16).

Nga oruh fahkwack luhlahlfongi lah puhla ke luhngse lowos nuh sin mwet ke sucu lowos an—oacna sie acn elos oasr we—pa sie ahkfalyeyucklac ke olwelah ma Elijah el fah tuhkuh. El tuhkuh sruhk. Insiyacn tuhlihk uh forlah nuh sin pahpah tuhmwaclos, ac insiyacn pahpah uh forlah nuh sin tuhlihk nahtuhlos (liye Malachi 4:5–6; Joseph Smith—History 1:38–39). Ke kom puhla pahtokyuck in sokwack inen mwet mahtuh lom an ac uslah ine ingacn nuh tempuhl, kom puhlakihn ahkfalyeyucklac luhn palyeyuck sacn.

Sie mwe insewowo in moul ke pacl ma olwelah ke inse forlah uh ahkfalyeyucklac. Mildred Bennion Eyring el puhla pahtokyuck se ingacn ke insiyacl. El luhngse sucu luhn tamuhlwel lal, ac el loh nuh selos. Elos puhla insiyaclos forlah ke luhngse nuh sel Aunt Mid ke srihpen elos etuh lah el luhngse elos.