Ang Ministering Resources Anaa Na para sa mga Konseho

Ang mga sakop sa konseho sa stake ug ward aduna nay access karon sa bag-ong Church web page nga gitawag og Ministering Resources, anaa sa ministering.lds.org, aron sa pagtabang sa mga indibidwal ug pamilya sa ilang temporal ug espiritwal nga mga panginahanglan, lakip sa lisud ug sensitibong mga isyu. Ang access alang sa adunay mga calling sa konseho sa stake ug ward gamit ilang LDS account.

Ang kapanguhaan nga kaniadto anaa lang sa mga bishop ug presidente sa stake gi-update ug gipalapdan nga may pihong paggiya kon unsaon pagtabang sa mga biktima sa pang-abuso, niadtong nanlimbasug sa pagkaadik, single nga mga ginikanan nga nagpaabut og anak, mga tiggamit sa pornograpiya, kadtong nakasinati og kaibug sa sama og sekso, ug niadtong nanlimbasug sa mga problema sa pinansyal ug sa trabaho.

Ubos sa direksyon sa bishop, ang konseho sa ward makagamit sa Ministering Resources sa pagtinambagay sa usag usa alang sa kaayohan sa mga indibidwal ug mga pamilya diha sa ilang mga utlanan sa ward.