Nagpadayon ang Paglambo sa mga Templo

“Kon ang tanang gipahibalo na nga mga templo mahuman ug mapahinungod, kita adunay 170 ka mga templo nga magamit sa tibuok kalibutan,” miingon si Presidente Thomas S. Monson atol sa Oktubre 2014 nga kinatibuk-ang komperensya. “Tungod kay kita nagtutok sa atong mga paningkamot sa pagkompleto sa mga templo nga gipahibalo sa una, niining higayona kita dili pa mopahibalo og bag-ong mga templo. Hinoon, sa umaabut, sa atong pag-ila sa mga panginahanglan ug sa pagpangita og mga yuta, ang pahibalo sa dugang nga mga templo himoon.”

Sa dihang si Presidente Monson mipahinungod og usab sa Ogden Utah Temple niadtong Septyembre 2014, kini nakapahimo sa gidaghanon sa magamit nga templo sa Simbahan ngadto sa 143 sa tibuok kalibutan.

Ang Fort Lauderdale Florida Temple gipahinungod niadtong Mayo 2014 ni Presidente Dieter F. Uchtdorf, Ikaduhang Magtatambag sa Unang Kapangulohan. Ang Phoenix Arizona Temple ipahinungod inigka-Nobyembre 16, 2014, ug dili moubos sa lima pa ka laing templo ang ipahinungod o ipahinungod og usab inigka-2015.