Naan in Katak an Kōrā, Juun 2015
Kadkad in Mour eo Ekwojarjar an Jisōs Kraist: Wānōk
Kanooj jar ilo ekkatak kōn katak in im pukōt n̄an jeļā ta eo n̄an kwaļo̧k. Ekōjkan ami naaj meļeļe kadkad in mour eo ekwojarjar an Rilo̧mo̧o̧r eo ej kōļapļo̧k tōmak eo ami ilo E im kōjeram̧m̧an ro kom̧wij (bōk eddoier) mije er kōn naan in katak an kōrā? N̄an meļeļe ko reļļapļo̧k, etal n̄an reliefsociety.lds.org.
Wānōk ej aikuj kaiboojoj ļōmņak ko am̧ ilo ejjeļo̧k kijeļo̧k kake. Innām kōjatdikdik eo am̧ enaaj ļapļo̧k im̧aan mejān Anij, im katak ko an priesthood eo renaaj wūtdikdik Jetōb eo am̧ āinwōt m̧ōtto̧ jān lan̄ (lale D&C 121:45).
Ta in wānōk? Būreejtōn James E. Faust (1920–2007) ekar ba: “Wānōk ilo lukkuun tarlep in meļeļe eo an ej jepooļ aolep men ko rem̧m̧an an jim̧we im rej jipan̄ kōj kalōk m̧wil ko m̧wilid.”1 Būreejtōn Gordon B. Hinckley (1910–2008) kar kobaiktok: “Iakwe eo an Anij ej okran aolep wānōk, aolep men em̧m̧an, im aolep kajoor in m̧wil em̧m̧an.”2
Jen jemjerā ko ikōtaan kōrā im wānōk, Elder D. Todd Christofferson jen Doulul eo an Jon̄oulruo Rijilōk ro ekar ba: “Kōrā ro rej lo̧tak tok n̄an laļ in kōn kwojarjar, juon menin letok eo ekwojarjar bwe ren peran ilo jekjek kein āinwōt tōmak, peran, meanwōr, im em̧m̧anļo̧k ilo jem̧jerā ko im ilo m̧anit ko. …
Sister ro, ilo aolep jikin ko kom̧ij pād ie, ej kadkad eo ami ippān Anij, Jemāmi Ilan̄, eo unin kajoor eo an mour in eo ami, me kom̧ij aikuj iien otemjej likūt m̧oktata mour eo ami. Keememej bwe kajoor eo an Jisōs ekar itok kōn wūjļepļo̧k eo An make n̄an ankilaan Jemān. … Kajieon̄ in kain rikaļoor rōt eo an Jemen im Nejin, im kajoor in kadeel eo ami ejamin makunļo̧k.”3
Bar Jet Eoon Ko
Sam ko 24:3–4; PiIlipai 4:8; 2 Pita 1:3–5; Alma 31:5; D&C 38:23–24
Jān Jeje ko Rekwojarjar
Rainin, kōrā ro rewānōk, robrak kōn tōmak, rej pukōt Rilo̧mo̧o̧r eo. Ilo Luk 8 jej riit kōn juon kōrā eo ekar to̧o̧r ļo̧k bōtōktōkin ium̧win 12 iiō ko im ejjab maron̄ in kar mour. Liin ekar pukōt an mour ke ekar itok likin [Kraist], im un̄n̄ūr tōrerein nuknuk ko An: im e mōkaj an jako an bōtoktōk to̧o̧r ļo̧k. … Im Jisōs e ba, … juon en ear un̄n̄ūr Eō, bwe I ar jeļā kōn an kajoor4 ilo̧k jān Eō. “Im ke kōrā eo ej lo e jab tilekek, ej itok im wūdiddid, im bun̄ im̧aan, im kwaļo̧k im̧aan mejān armej otemjej, kōn unin an un̄n̄ūr E, im kōjkan e m̧ōkaj an mour. “Im E ba n̄an e, Nejū, am̧ tōmak ear kemour eok; kwōn ilo̧k ilo aenōm̧m̧an” ( Luk 8:43–48; bar lale 6:17–19).
Jān wānōk eo An,5 Kraist emaron̄ kemour, kemaron̄, kōkajoor, kaenōm̧m̧an, im kōkketak eļan̄n̄e jenaaj kālet kōn peran im tōmak n̄an ilo̧k n̄an Ippān.
© 2015 jān Intellectual Reserve, Inc. Aolep jim̧we ko rej pād ippān. Jeje ilo USA. Kōmālim ilo kajin English: 6/14. Kōmālim an ukook: 6/14. Ukook eo an Visiting Teaching Message, June 2015 Marshallese. 12586 874