Ennaan eo an Būreejtōnji eo Kein Kajuon, Juun 2015
Baam̧le ko Remaron̄ Pād Ippān Doon N̄an Indeeo
Kajoor eo an priesthood ej liāpe baam̧le ko n̄an indeeo ej juon iaan menin letok ko reļļap an Anij. Aolep armej ro remeļeļe kōn karōk in lo̧mo̧o̧r renaaj kōņaan kōjeram̧m̧an eo ejjeļo̧k jem̧ļo̧kin. Kōjeram̧m̧an in liāp ko rej kōm̧m̧an wōt ilo tampeļ ko em̧ōj aji an Kabun̄ eo an Jisōs Kraist im Armej ro Rekwojarjar ilo Raan-ko Āliktata Anij ej letok kallim̧ur bwe baam̧le ko remaron̄ liāp ippān doon n̄an indeeo.
Kii ko an priesthood ko rej kōm̧m̧an bwe men in en maron̄ kar jepļaaktok n̄an laļ in jān Iļaija n̄an Joseph Smith ilo tampeļ eo ilo Kirtland. Kii kein an priesthood eo kar litok jān rikanaan n̄an rikanaan ro remour ilo Kabun̄ eo an Jisōs Kraist im Armej ro Rekwojarjar ilo Raan-ko Āliktata n̄an raan kein.
Rilo̧mo̧o̧r eo ilo iien kwaļo̧k ko An ilo mour in ekar kōnono kōn kajoor in liāp baam̧le ilo naan kein n̄an Pita, Rijilōk eo An eutiejtata, ke ekar ba, “Em̧ool Ij ba n̄an kom̧, jabdewōt men eo kom̧ naaj liāpe laļ, naaj liāpe lan̄, im jabdewōt men eo kom̧ naaj kōtļok e ioon laļ, naaj kōtļok e i lan̄” (Matu 18:18).
Ilo wōt laļ eo an celestial im jemaron̄ mour ippān baam̧le ko n̄an indeeo. Ijo jemaron̄ in baam̧le im̧aan mejān Jemedwōj Ilan̄ im Rilo̧mo̧o̧r eo. Rikanaan eo Joseph Smith ekar kōmeļeļeik en̄jake in em̧m̧an ke ekar ba bwe
n̄e Rilo̧mo̧o̧r eo enaaj waļo̧ktok jenaaj loe E lukkuun nememein E. Jenaaj loe ke E ej armej āinwōt kōj.
Im ejja iiaio in ippād kiiō ijin enaaj bar pād ippād ijōņ ilo mour eo tok juon, ak enaaj kobaiktok aiboojoj indeeo, aiboojoj eo im jejjab amene kiiō (lale D&C 130:1—2).
Eoon in ej ļōmake bwe jemaron̄ kōn lōke jibadōk jon̄ak eo ilan̄ ilo kōtaan kein ad ippān baam̧le kein ad. Jemaron̄ kwaļo̧k ad kea kōn ro uwaan baam̧le ko ad, ro remour im ro remej, n̄an kōm̧m̧ane jabdewōt men jemaron̄ kōm̧m̧ane n̄an leļo̧k n̄an er kain̄i ko an priesthood im ko renaaj liāpe kōj ilo lan̄.
Elōn̄ iaami, dik im rūtto, rej kōm̧m̧ane men in. Em̧ōj ami pukōt āt ko etan rūtto ro jibūm̧i im jim̧ami ro rej jan̄in bōk kain̄i ko remaron̄ liāpe kom̧ ippān doon.
Enan̄in aolepāmi elōn̄ ro nukumi rej mour ro rej jan̄iin liāp āinwōt baam̧le kōn kajoor eo an priesthood. Elōn̄ ro ewōr nukier ro emōj aer bōk kain̄i ko an priesthood eo ak rej jab kōjparok bujen ko rekar kōm̧m̧ani ippān Anij. Anij enaaj kōjeram̧m̧an eok bwe kwon maron̄ in jipan̄ pukōtļo̧k aolep ro nukum̧ ilo tōmak. Ewōr juon am̧ kallim̧ur eo Irooj ekar kōm̧m̧ane n̄an rijilōk ro An n̄an ro rej etal im boktok ro jet n̄an E.
E [Irooj] ej ba jabdewōt iien armej ej ron̄jake kōj, Enaaj bar āinwōt pād ijoņ. Enaaj etal im̧aadļo̧k. Enaaj pād ilo tuanbwij maron̄in peid im ilo tuanmiin̄, im Jetōb eo aō enaaj pād ilo būruwōd, im enjeļ ro An renaaj jepooļ kōj, n̄an jipan̄ kōj (Lale D&C 84:88).
Jān wūntō in opiij eo aō ij lo limaro pālele im ļōm̧aro pālele aolep raan rej kōm̧m̧an pija ko aer ippān wūt ko im dān ko rej kaiboojoj. Enan̄in aolep iien ļeo pālele ej kotak lio pālele ilo pein, diktata n̄an jet jikinwe ko epen an etetal ie, ilo an ripija eo bōk pija in m̧are ko. Aolep iien ij lo men in, ij keememej ripālele ro ijeļā kajjer ro jet iien—jet iien ejjab etto jān iien m̧are eo aer—rej aikuj kotak doon ilo bar jet wāween eļan̄n̄e mour in ej pen tok. Jerbal ko remaron̄ jako. Ajri ro remaron̄ ļotak tok kōn apan̄ ko reļļap. N̄an̄inmej emaron̄ itok. Innām, imminene ko ilo ad kōm̧anm̧an n̄an ro jet āinwōt n̄e jenaaj kar kōņaaan bwe ren kōm̧ānm̧an n̄an kōj—ke ekar pidodo men in—enaaj kōm̧m̧an bwe jen jet ro rebun̄bun̄ ilo iien ko reppen n̄e kōm̧anm̧an n̄an ro jet enaaj aikuji eļapļo̧k kajoor jān jon̄an eo jej ļōmņak ewōr ippād.
Baam̧le ko ad rej aikuj jān kōj jem̧jerā ko jemaron̄ bōki n̄an im̧aan mejān Anij. Jej aikuj kajjieon̄ bwe jen jab kōmetak ro jet ak watōk men ko jej metak kaki. Jemaron̄ kālet bwe jen joļo̧k bōd iien eo emōkajtata im ilo m̧ool. Jemaron̄ kajjieon̄ pukot m̧ōņōņō an ro jet m̧okta jān eo ad. Jemaron̄ in jouj ilo ad kōnono. Ilo ad kajjieon̄ kōm̧m̧ani aolep men kein, jenaaj karuwaineneik Jetōb Kwojarjar n̄an baam̧le kein ad im mour kein ad.
Kam̧ool eo aō n̄an kom̧ bwe, kōn jipan̄ eo an Irooj im kōn būruwōn ukweļo̧k, jemaron̄ bōk juon meļeļe edik ilo mour in kōn kain mour rot eo jekōņaan bōke n̄an indeeo. Jemedwōj Ilan̄ ej iakwe kōj. Ekōņaan bwe jen ro̧o̧lļo̧k n̄an Ippān. Rilo̧mo̧o̧r eo, kōn kajoor in Pinmuur eo An, ekapidodoik an oktak eo ilo būruwōd eo jej aikuj in kōm̧m̧ane n̄an ad deļo̧n̄e tampeļ ko rekwojarjar, kōm̧m̧an bujen ko jemaron̄ kōjparoki, im ilo iien eo enaaj itok mour ippān baam̧le ko n̄an indeeo ilo aiboojoj in al—m̧weo im̧ōd bar juon alen.
© 2015 jān Intellectual Reserve, Inc. Aolep jim̧we ko rej pād ippān. Jeje ilo USA. Kōmālim ilo kajin English: 6/14. Kōmālim an ukook: 6/14. Ukook eo an First Presidency Message, June 2015. Marshallese. 12586 874
Katakin jān Ennaan In
Ilo am̧ kajedeed katak eo kōn baam̧le n̄an indeeo, ļōmņak kōn ta eo Elder Richard G. Scott jān Doulul eo an Jon̄oulruo Rijilōk ro ekar ba: Aolep iien pukot n̄an kōkajoorļo̧k baam̧le ko. Kwaļo̧k kōn juon visōn eo eaorōk kōn an baam̧le ko liāp ilo tampeļ. … N̄e ewōr ippam̧ visōn in kōn kain̄i ko an tampeļ, kwonaaj jipan̄ kalōk aelōn̄ in kiin̄ eo an Anij ioon laļ in” (Iar Lewōj n̄an Kom̧ juon Waanjon̄ok,” Liaona, Māe 2014, 34). Ewi wāween am̧ maron̄ jipan̄ ro kwoj katakin er ejaake juon vision kōn aorōk in liāp ilo tampeļ eo? Karuwaineneik ro rej jan̄in liāp n̄an kōnono kōn bun̄tōn ko remaron̄ būki n̄an bōk kain̄i in. Karuwaineneik ro em̧ōj aer liāp bwe ren kōnono kōn wāween aer maron̄ kōjparok vision eo an baam̧le ko aer n̄an indeeo im kōkm̧anm̧anļo̧k jem̧jerā ko aer ippān doon.