Usa ka Pag-ampo diha sa Family History Center

Sa dihang gi-call ko isip family history consultant sa among branch sa Ushuaia, Argentina, mibati ko og lalum nga panginahanglan sa pagsiksik sa akong mga katigulangan. Ang buluhaton lisud, ug halos walay adlaw nga dili ko mosulay og bag-ong estratehiya sa pagdiskobre si kinsa sila ug asa sila gikan sa Italy.

Niadtong 2006 gi-call ko sa pagdumala sa family history center. Hinoon, padayon kong mibati og kasagmuyo, tungod sa akong kapakyas nga makakita og impormasyon sa akong pamilya. Mas nasagmuyo ko sa dihang maayo ang resulta sa pagsiksik sa akong bana sa iyang katigulangan. Nianang tuiga, si Ruben nakaila og sobra sa 5,000 ka ngalan sa iyang mga katigulangan kinsa nagpuyo sa San Ginesio, Macerata, Italy.

Usa ka hapon sa family history center samtang si Ruben sunod-sunod nga nakakita sa ngalan sa iyang katigulangan sa microfilm, siya malipayon ug balik-balik mosyagit, “Ania na say usa!” Mibati nga nawad-an sa kadasig, ug naghilak, mipahayag ko sa akong kaguol, nagdugang nga wala nako masayud unsaon sa pagpangita sa akong katingulangan. Nakakita nga nasakitan ko, siya misugyot nga mag-ampo mi. Amo kining gibuhat, nangamuyo nga ang Espiritu Santo molamdag kanamo aron among mapadali ang buhat para sa akong pamilya.

Atol sa pag-ampo, si Ruben diha-diha dayon nakahimumdom og usa ka website nga nag-feature og mga apelyidong Italian. Paghuman dayon sa among pag-ampo, amo kining gisusi. Sulod lang sa mga minuto kami nakakita og upat ka tawo nga sama nako og apelyido pagkadalaga, Gos, diha sa directory sa telepono sa gamayng lungsod sa Iutizzo, sa amihanang Italy.

Diha-diha dayon nagpadala ko og sulat sa tagsa-tagsa kanila. Ang usa mitubag, nagsulti nga ang iyang bana adunay sama nga apelyido, apan dili paryente sa pamilya. Hinoon, siya nakaila sa usa sa igoong babaye sa akong namatay nga lolo, ug siya mitanyag nga ipaila-ila ko sa laing paryente, nga buhi pa.

Paglabay sa pipila ka bulan, niadtong Disyembre 2006, kami nakadawat og long-distance nga tawag sa telepono.

“Kini ba si Susana Gos?” tingog sa lalaki nga ingon og naa sa layo ang nangutana.

“Oo,” ako mitubag.

“Kini ang imong ig-agaw gikan sa Italy,” siya miingon.

Ang nanawag, si Giovanni Battista Tubaro, anak nga lalaki ni Maria nga igsoon sa akong lolo!

Niadtong Marso 2008, sila si Giovanni ug iyang asawa, si Miriam, mibisita namo dinhi sa Argentina. Amo silang gihisgutan kabahin sa ebanghelyo ug sa buhat sa family history, ug sulod sa pipila ka adlaw kami naghisgot niadtong mga tawo nga nag-una kanamo. Karon ang ilang mga ngalan balik sa unom ka henerasyon aduna nay dagway ug kasaysayan.

Ang family history nakapahimo nako nga makatampo sa importanti nga bahin sa buhat sa Ginoo. Kini usab mas nakapaduol kanako sa akong mga katigulangan—mga anak sa atong Langitnong Amahan nga dili gyud unta nako maila-ila kon wala pa ang pag-ampo nga may hugot nga pagtuo diha sa family history center.