Mga Pagpamalandong
Ang Bintana diha sa Pool
Ang tagsulat nagpuyo sa Utah, USA.
Ang atong relasyon sa pamilya makatabang kanato nga makat-on, makasabut, ug makasunod sa ebanghelyo.
Paghulagway pinaagi ni Allen Garns
Ang among bakasyon hapit na mahuman. Samtang kami namahaw nianang buntaga, kami nagplano unsaon sa pagpahimulos sa among panahon diha sa hotel sa dili pa mo-drayb og lima ka oras sa pagpauli. Ang akong bana nakahukom sa pagdala sa among tulo ka gagmayng anak nga mga babaye alang sa katapusang paglingaw-lingaw diha sa pool. Ako mopahimulos sa treadmill sa workout room.
Ang treadmill nga akong gipili nag-atubang sa usa ka bintana nga nag-umbaw sa swimming pool. Sa wala madugay akong nakita ang usa ka pamilya, ang akong pamilya, nga nagpaingon sa pool. Ang mga toalya, mga sapatos, ug mga T-shirt gisalibay bisan asa sa dihang ang batang mga babaye mahinamon nga nag-andam sa pag-ambak ngadto sa tubig. Sa kasagaran ako magsunod nila, mamunit sa mga sinina ug mga sapatos ug, sa tinuod lang, medyo maglagot ko niini. Hinoon, nagtan-aw ako niini nga pamilya nga mora og wala koy apil, ingon og ang dakong bintana sa akong atubangan usa ka tilon sa sine. Samtang ang akong mga tiil nagdagan sa treadmill, ako nagtan-aw.
Akong nakita kon unsa ka malipayon ang tanan, nangatawa ug nagdula, ug ako naghunahuna kabahin sa mga panahon nga ako nawad-an sa kadasig tungod sa gagmay nga mga argumento nga dili malikayan nga mahitabo sa usa ka pamilya, tungod sa naghigwaos nga pagbati nga, bisan pa sa akong labing maayo nga paningkamot, ako napakyas sa pagtudlo sa akong mga anak sa paghigugma sa usag usa. Apan samtang ako nagtan-aw, akong nakita ang mga tawo nga malipayon. Akong nadiskobrehan nga ako wala mapakyas sa pagtudlo kanila sa paghigugma sa usag usa; napakyas lang ako sa pagkakita nga sila makahimo.
Akong nabantayan ang usa sa mga babaye nga moambak gikan sa kilid sa pool balik-balik ngadto sa mga bukton sa iyang papa. Naghunahuna ko sa tanan nga dagkong pag-ambak nga iyang himoon sa iyang kinabuhi ug naglaum nga siya mosalig sa Langitnong Amahan sa pagsawo kaniya sa matag higayon. Ako nasayud nga sa matag ambak siya nagkat-on sa pagsalig ug nga ang pagkahimong kabahin sa among pamilya usa ka luwas nga paagi sa pagkat-on niana nga pagsalig.
Laing anak nga babaye nagtinguha sa paghingpit sa usa ka kahanas sa paglangoy. Akong nakita kon sa unsang paagi ang awhag sa iyang pamilya nakapadayon sa iyang pagpaningkamot. Adunay panahon sa iyang kinabuhi nga siya magkinahanglan niana nga suporta atubangan sa mas lisud nga mga hagit.
Ug dayon nagtan-aw ko samtang ang among ikatulong anak nga babaye aksidenteng nabangga sa pool. Naglagot ug nasuko, mihaw-as siya sa tubig ug mipaingon sa usa ka lingkuranan. Diha-diha dayon nakabantay ang iyang pamilya nga nawala siya. Akong gitan-aw ang matag usa nga mahigugmaong nag-awhag kaniya nga moapil nila pag-usab. Miapil ra siya sa kadugayan, ug naghunahuna ko sa iyang kaugmaon, sa tanan nga mga panahon nga siya masakitan ug gusto nga moundang. Naglaum ako nga makita niya kanunay diha sa gugma sa iyang pamilya ang kalig-on sa paglahutay.
Sa kalit lang, ang pagkaamgo miigo kanako: ang atong mga pamilya mahimong yawe sa atong abilidad sa pagkat-on, pagsabut ug pagsunod sa ebanghelyo. Si Nephi misulat nga “pinaagi sa gagmay nga mga paagi ang Ginoo makapahinabo sa mahinungdanon nga mga butang” (1 Nephi 16:29). Mao usab kini sa mga pamilya. Oo, ang mga ginikanan nanlimbasug. Apan ang matag paningkamot sa pagtudlo ug pagbansay ug paghigugma, bisan unsa pa ka gamay, mahinungdanon.
Ang akong gamay nga sine hapit na mahuman. Samtang gipalong nako ang treadmill ug nagtan-aw sa akong pamilya nga mikuha sa ilang mga sinina, gibati nako ang bag-ong determinasyon sa pagpadayon, sa pagpadayon sa pagbuhat sa tanang gagmay nga mga butang nga usahay akong gikabalak-an nga walay mahimo.