Tatalo: O Le Meaalofa a Se Tina

Ata

A woman at her bed praying.

Tatalo, saunia e Walter Rane

E lei i ai se taimi na tele ai a’u tatalo nai lo le taimi sa aulia ai e se tasi o la’u fanau tama le 17 o ona tausaga. Na amata ona i ai ni ona masalosaloga e uiga i le talalelei, ma e i ai taimi sa fouvale ma le fia faalogo ai o ia. Sa ma taumafai ma lo’u toalua e ta’u atu pea ia te ia e alu i le lotu, ae o le tele o taimi e musu ai o ia. E fai a matou afiafi faaleaiga, faitau tusitusiga paia, ma tatalo o se aiga, ae e tele ina ia filifili e le auai mai. Ou te le manatuaina pe faafia ona ou tootuli e ole atu i lo tatou Tama Faalelagi e pa’i atu i lona loto ma fesoasoani ia te ia ia tumau i le ala sa’o.

I le lua tausaga na sosoo ai, sa tele faafitauli sa feagai ma ia. Sa lagolagoina a’u e taitai o le Ekalesia ma sa latou talanoa atu ia te ia, ae sa foliga mai e leai se mea na aoga. Na iu lava ina tuua e ia le aiga.

O na taimi uma e lei tuua ai lava lo’u tatalo mo ia. E i ai taimi ua le lava ai lo’u toalua ma fai mai, “Tuu laia o ia. Ua ia te ia le faitalia e filifili tonu ai.” Ae o la’u tali lava e tasi: “E leai, o le a le uma lava lo’u faamoemoe.”

Ina ua mavae se taimi, na sau ai lo ma atalii i lo matou fale. Sa talosaga mai mo la’u faamagaloga ma sa ia fai mai, “Mama, ua ou fia sau i le fale.” Sa ma faaeteete ma lo‘u toalua, ae ina ua uma ona talanoaina, sa ma gauai atu i ai. Ina ua toe foi mai, sa ma vaaia lona naunautaiga mausali e sui. Na toe malosi o ia i le Ekalesia ma auai atu i gaoioiga. Sa mulimuli ane valaauina e avea ma se faiaoga i le Peraimeri, o se aafiaga sa fai lava si faapitoa mo ia.

I se tasi aso sa ou faatautauina se Pepa o i ai se savali mai le Liahona fai mai, “Aua nei faatagaina atugaluga po o masalosaloga e taofia ai oe mai le auauna atu i se misiona talai.”¹ Sa tautau i lona potumoe mo ni nai masina, ma sa faafuasei i se tasi aso ona ia fai mai ia te au, “Mama, ou te fia alu i se misiona i le faaiuga o le tausaga.” O se mea ofoofogia. Sa ma fetagisi ma lo’u toalua, ma ioe, sa ma lagolagoina o ia a o tapena e alu i le malumalu ma auauna atu i se misiona. Sa faaauau pea ona ou tatalo i taimi uma, a ole taimi lenei ua faafetai atu i le Tama Faalelagi i le pa’i atu i le loto o la’u tama.

Ina ua mavae sina taimi i lana misiona, i se tasi o ana tusi na ia fai mai ia te au, “Mama, ua i ai sau molimau malosi i le tatalo, faafetai atu lava ia te oe. Ou te iloa na e tatalo i le taimi atoa mo au, ma o lea ua ou i ai i le misiona ona sa pa’i mai le Alii i lo’u loto, e le faapea ona o so’u lelei. Faafetai, Mama. Faasoa atu i tuafafine lenei mataupu faavae na suia ai lo‘u olaga.”

O lenei sa auauna atu la’u tama ma le faamaoni i se misiona ma sa auai i se galuega ofoofogia. Ou te matua faafetai lava i le Tama Faalelagi mo le faafofogaina o a’u tatalo i nei tausaga uma, ma mo le pa’i atu i le loto o la’u tama, lea na afua ai ona toe foi mai i le ala sa’o.