E Mafai Ona E Sui
Tusa lava po o a ou vaivaiga, e mafai lava ona e filifili le ala e te ola ai mo ou gafatia i le lumanai.
Ata na tusia e J. Beth Jepson
I le taimi o le faauuga a le aoga maualuga, e mafai ona taalise atu i lou mafaufau le mau mafaufauga. O le a le mea e sosoo ai? Pe ua e sauni? Pe o le a tumau pea lo outou fesootai ma au uo?
Ae, e leai au. Sa na o le tasi la’u fesili ina ua oo i lo’u taimi e savali atu ai i luma o tagata uma a o latou faalau mai lo’u igoa; pe o le a ou faauu monilava?
Sa ou matua le iloa tonu le mea e ta’u o le sikola. O le suesue tele sa le sili a’e lava i la’u lisi o mea e fai. Ma i le taimi o lo’u tausaga sinia, sa le lelei a’u taumafaiga i se tasi o vasega ma sa ou le iloaina pe na ou pasii le vasega. O le suega faaiu i le amataga o lena vaiaso, o le a faamautuina ai la’u faaiuga, ae e le faapipiia ia togi seia aulia le vaiaso mulimuli ane.
Afai e le pasi la’u vasega lea, o le a ou le faauu i le aoga maualuga.
I le faaiuga, sa ou faamanuiaina i si va itiiti lava sa mafai ai ma ou faauu ai. (Oka!) O le taimi lena, toe 14 masina ona atoa lea o lo’u 19, o le tausaga e faamisiona ai i lena taimi. Sa ou fuafua loa e faigaluega i lena taimi e sefe se tupe mo la‘u misiona. Sa ou iloaina e le o au o se tagata aoao tele, o lea sa leai se mea na mafai ai ona ou fuafua e alu i le kolisi.
O Le Mailei o le Faatapulaaina o Mea
Pe i ai se taimi na e lagona ai faapena? E pei o au taumafaiga ua tuanai i se vaega o lou olaga ua faamaonia ai ou tomai atoa?
Aua nei seetia oe i lena laina o le mafaufau. O se tasi o pepelo aupito tetele a Satani!
“O le taimi lava e faaiuina ai e soo ai soo se tasi o i tatou—‘E pau lava o a’u ia,’ ua tatou lafoaia lo tatou tomai e sui ai,” na aoao mai ai Elder Donald L. Hallstrom o le Au Peresitene o Fitugafulu. “E sili ai lava la le togi o le solo, lafoai auupega, faiaina i le taua, ma siilima loa—ua leai se faamoemoe e manumalo.”1
E mafai ona foliga mai e matua taufaafefe lava le a’oga pe a le o lelei au taumafaiga. E oo lava i le i ai o ni nai togi le lelei i lou lipoti, e matua faigofie ai lava ona e filifili ona pau lena ole mea e te mafaia. Ae e le moni.
“O tagata o loo i ai tatou ae e le o tagata e mafai ona avea ai tatou,” o le tala lea a Elder Hallstrom.2
O Se Amataga Fou
Po o a lava ni musumusuga faalavelave o le le mautonu po o toilalo e ono oo mai i o tatou taliga, e mafai lava ona tatou filifili pea e vaai i luma ma soia le sasaina i tatou lava i mea ua tuanai.
“O loo i ai se mea faamoemoeina ofoofogia e uiga i se amataga fou,” na aoao mai ai Peresitene Dieter F. Uchtdorf, Fesoasoani Lua i le Au Peresitene Sili.3
A e filifili e fai se amataga fou, aua nei galo ona tatalo i le Atua mo se fesoasoani. Ta‘u atu ia te Ia e te manao ia faamanuiaina ona gauai atu lea i musumusuga ma taitaiga mai le Agaga Paia ma mai ou taitai.
Atonu e manaomia ai sina toefetuunai o faamuamua. “O a tatou filifiliga ma amioga i aso taitasi e tatau ona ogatasi ma a tatou sini,” o le tala lea a Elder Quentin L. Cook o le Korama a Aposetolo e Toasefululua. “O le tele o filifiliga e le masani ona leaga, ae a alu uma ai lo tatou taimi ma taofia ai i tatou mai filifiliga silisili ona lelei, ona avea loa lea ma filifiliga matautia.”4
Mauaina o Lou Lava Tagata Fou
Faasaoasaoa i luma le tolu ma le afa tausaga mai lo’u faauuga i le aoga maualuga. Sa ou faigaluega mo se tausaga ma le afa, faamisiona mo le lua tausaga, ma ua iu ina tonu e taumafai i le kolisi.
Maimau pe ana mafai ona ou fai atu sa ou lagonaina ua ou matua ma ua saunia mo le aoga, ae o se mea ula. Sa ou lagona le fefe sili atu nai lo se isi lava taimi. Afai sa ou matua leaga i le aoga maualuga, o le a faapefea la ona ou mafaia le kolisi? O le taimi lea sa tonu ai o le a ou faia le mea sili, ma faaaofia ai le Atua i le faagasologa. Sa ou tatalo faatauanau ina ia atiina ae ni tomai suesue e sili atu.
Sa ou matua te’i, aua sa iu ina sa matua lelei a’u taumafaiga i lena semesa, ma sa ou agavaa ai mo sikolasipi faaakatemia. Sa leai se tasi na sili atu ona ofo nai lo a’u lava ia! E oo lava i lea, sa mafai ona faigofie ona ou toe tepa i tua i masina ua mavae, ma vaaia ai le aao o le Atua sa fesoasoani ia te au a o ou aoao ia avea o se tagata aoao lelei.
O le mea sa ou talitonu ai ia te au lava i le aoga maualuga, sa le moni. Mai lava i lena taimi ma faatasi ai ma le fesoasoani a le Atua, sa mafai ai ona ou asaina se ala e fou a’ia’i lea sa tauaveina ai au i le faauuga a le kolisi ma tala atu.
Pe a tatou faaaofia ai le Alii i a tatou fe’a’eiga, ma filifili e faia se amataga fou i soo se vaega o le olaga, e mafai ona tatou tau atu i mea maualuluga tatou te lei moemiti i ai.