Visiting Tijing Mesej
Ol Fasin Blong Jisas Kraes: Hem I Gat Jareti mo Lav
Stadi long toktok ia wetem prea mo luklukgud blong save wanem blong serem. ?Olsem wanem nao taem yu andastanem fasin blong Sevya i leftemap fet blong yu long Hem, mo blesem olgeta we yu stap lukaotem olgeta tru long visiting tijing? Blong kasem moa infomesen, go long reliefsociety.lds.org.
Fet, Famle, Help
Paoa blong ol Woman we i gat stret mo gud fasin, I kam long Juli Rojas
Gaed blong ol Skripja i talem mining blong jareti olsem “wan kaen lav we i moa hae, i moa gud, i moa strong” (“Jareti”) Hem i klin lav blong Jisas Kraes. Taem yumi stap lanem abaot Jisas kraes mo stap trae had blong kam olsem Hem, bambae yumi save stat blong filim klin lav blong Hem long ol laef blong yumi wantem blong lavem mo helpem ol nara man olsem we bae Hem i mekem. “Jareti hem i blong gat fasin blong save wet longtaem wetem wan man we i bin mekem yumi harem nogud,” Presiden Tomas S. Monson i talem. “Hem i blong blokem ol filing we i save mekem yumi harem nogud kwiktaem. Hem i blong akseptem ol wiknes. Hem i blong akseptem ol man olsem huya olgeta. Hemi blong lukluk bitim fisikol bodi i go long ol samting we bae i nosave lus taem ol yia i stap pas. Hemi blong blokem filing ia blong jajem ol nara man.”1
Insaed long Buk blong Momon, yumi lanem bigfala trutok ia se taem yumi “prea long Papa wetem evri paoa blong hat, blong [yufala] i save fulap wetem lav ia, we hem i bin givim long olgeta we oli ol tru man blong folem Pikinini blong hem, Jisas Kraes; blong yufala i save kam ol boe blong God; blong taem we bae hem i kamaot bae yumi stap olsem hem, from bae yumi lukim hem olsem we hem i stap; blong yumi save gat hop ia; blong yumi save kam klin olsem we hem i klin. Amen. (Moronae 7:48).
Sam Moa Skripja
Jon 13:34–35; 1 Korin 13:1–13; 1 Nifae 11:21–23; Ita 12:33–34
I Kamaot long Histri blong Yumi
“Wan sista we man blong hem i jes ded, i glad tumas blong gat ol visiting tija we oli serem sore wetem hem mo kamfotem hem. Hem i bin raetem: “Mi rili nidim wan man we bae i save helpem mi; wan man we bae i save lisin long mi. … Mo olgeta we oli lisin, Oli kamfotem mi. Oli krae wetem mi. Mo oli haggem mi… [mo] helpem mi blong kamaot long bigfala harem nogud ia long ol fas manis we mi bin stap miwan,”
“Wan nara woman i talemaot filing blong hem long wan taem we hem i bin kasem tru jareti ia long wan visiting tija: “Mi bin save se mi mi no wan namba nomo long ol rikod buk blong hem we hem bae visitim. Mi bin save se hem i kea from mi.”2
Olsem ol sista ia, plante Lata-Dei Sent raon long wol i save toktok blong Presiden Boed K. Peka (1924–2015), Presiden blong Kworom bong Olgeta Twelef Aposol: “I gud tumas blong save se nomata wea ples [wan famle i save] go long hem, wan famle insaed long Jos i stap wet finis long olgeta. Stat long dei we oli jes kam, bae hem i joenem kworom blong olgeta prishud mo hem i joenem Rilif Sosaeti.”3