Bishop Dean M. Davies

“Isip usa ka tin-edyer,” miingon si Bishop Dean M. Davies, “nakapalipay kaayo nako nga kami ang kinanindutan og nataran sa among kasilinganan, ug nakakat-on ko og importante nga leksyon: nga ang gamayng dugang nga paningkamot makahimo og tinuod gayud nga kalainan hapit sa tanan natong buhaton.” Ang paghatag og gamayng dugang nga paningkamot nahimong usa ka sumbanan nga padayong nakatabang kaniya isip bag-ong Unang Magtatambag sa Presiding Bishopric.

Si Bishop Davies nakaserbisyo isip Ikaduhang Magtatambag ngadto ni Bishop Gary E. Stevenson, kinsa gipaluyohan nga usa ka sakop sa Korum sa Napulog Duha ka mga Apostoles niadtong Oktubre 3, 2015.

Si Dean Myron Davies natawo sa Siyudad sa Salt Lake, Utah, USA, niadtong 1951. Nagdako siya isip usa sa walo ka mga anak. Nagpasalamat siya alang sa mga ginikanan kinsa wala lamang nahigugma ug miamuma sa ilang mga anak apan nakatabang usab kanila nga makadayeg sa mga panalangin sa pagtrabaho. Naminyo siya ni Darla James niadtong 1973, sa Salt Lake Temple. Sila dunay 5 ka mga anak ug 14 ka mga apo.

Si Bishop Davies nakakat-on usab og importante nga leksyon samtang nagpuyo sa San Francisco, California, USA, niadtong 1989. Atol sa linog, nakasaksi siya sa grabe nga kadaot sa mga apartment nga gitukod nga walay lig-on nga pundasyon. “Namalandong sa panghitabo nianang adlawa nasilsil sa akong hunahuna ug kasingkasing nga aron malampusong makasugakod sa mga bagyo, linog, ug kalamidad sa kinabuhi, kinahanglang natukod kita sa tinuod nga tukuranan … ang tukuranan ni Jesukristo” (“Tinuod nga Tukuranan,” Liahona, Mayo 2013, 9).

Si Bishop Davies nagtrabaho sa Simbahan sukad niadtong Hulyo 1995. Bag-ohay lang siya ang tigdumalang direktor sa Special Projects Department, nga maoy responsable sa special-purpose real estate, pagdesinyo og templo, ug sa pagtukod og templo.

Sa wala pa siya magtrabaho sa Simbahan, si Bishop Davies nagtrabaho sa High Industries, Inc., sa Lancaster, Pennsylvania, ug sa Bechtel Investments, Inc., sa San Francisco, California. Nakaangkon siya og bachelor’s degree sa agricultural economics sa Brigham Young University ug nakakompleto og advanced executive nga mga programa sa Stanford ug Northwestern University.

Si Bishop Davies nakaserbisyo isip presidente sa Puerto Rico San Juan Mission, magtatambag sa presidente sa misyon, presidente sa stake, magtatambag sa presidente sa stake, executive secretary sa stake, high councilor, sa pipila ka mga bishopric, ug isip usa ka full-time nga misyonaryo sa Uruguay/Paraguay Mission.