Elder Dale G. Renlund

Human sa inisyal nga katingala sa pagkatawag ngadto sa Korum sa Napulog Duha ka mga Apostoles, si Elder Dale G. Renlund miluhod sa pag-ampo uban sa iyang asawa, si Ruth, nagtinguha sa pagsaksi nga ang “Dios maoy nagdumala niini nga buhat.”

Si Elder Renlund nagtinguha niana nga direksyon sa makadaghan—isip General Authority Seventy, isip cardiologist, ug isip bana ug amahan. Samtang nagtrabaho siya isip usa ka medical resident nga nagbansay didto sa Maryland, USA, sama pananglit, ang iyang asawa nasakit og kanser sa ovary. Ang ilang anak nga babaye, nga si Ashley, 16 ka bulan pa lang ang panuigon. Panahon niadtong malisud nga mga adlaw, ang pagbati sa kasuod ni Elder Renlund ngadto sa Ginoo nabalik sa dihang si Ruth nagpasalamat sa Ginoo pinaagi sa pag-ampo tungod sa ilang pagka-sealed sa templo.

Si Elder Renlund migahin sa iyang propesyon isip usa ka cardiologist, mitambal sa mga pasyente nga dunay sakit sa kasingkasing. Nakakita na siya og daghang pasyente nga namatay. Apan human nga ang usa ka pasyente nga ginganlan og Chad namatay, ang pagpugong nga dili mahimong emosyonal sa panahon sa kalisud isip usa ka doktor nahugno sa dihang ang mga ginikanan ni Chad miuban niya didto sa emergency room. Nianang higayuna iyang nakita si Chad pinaagi sa ilang panan-aw.

Kalabut niini nga kasinatian, miingon si Elder Renlund, “Nakaamgo ko karon nga aron epektibong makaserbisyo sa uban, kinahanglan ato silang makita pinaagi sa panan-aw sa usa ka ginikanan, pinaagi sa panan-aw sa Langitnong Amahan. Niana lamang nga masugdan nato pagsabut ang tinuod nga bili sa usa ka kalag” (pahina 94).

Ang pagkabata ug pagserbisyo sa Simbahan ni Elder Renlund nakatabang usab sa pag-andam kaniya nga makakita sa uban pinaagi sa panan-aw sa Ginoo ug makasabut sa nagkalain-laing mga miyembro sa Simbahan.

Si Dale Renlund natawo niadtong Nobyembre 13, 1952, sa Swedish nga mga imigrante kinsa miadto sa Utah aron ma-sealed sa templo. Sa bata pa si Dale, ang pamilya namalhin ngadto sa Finland ug dayon balik sa Sweden. Mibalik siya sa Utah uban sa iyang pamilya paglabay sa tulo ka tuig. Sa edad nga 19 gitawag siya nga moserbisyo og full-time nga misyon sa Sweden.

Niadtong 2009 si Elder Renlund gitawag nga moserbisyo isip usa ka General Authority Seventy. Ang iyang unang assignment mao ang Africa Southeast Area Presidency. Si Elder Renlund mitapos sa iyang propesyon isip usa ka doktor ug propesor, apan ang iyang asawa, siya miingon, “ang mihimo sa mas dakong sakripisyo.” Si Ruth maoy presidente sa iyang law firm sa dihang si Elder Renlund gitawag ug mibiya usab sa iyang trabaho. Apan sukad sila naminyo niadtong 1977, miingon siya, si Ruth kanunay nga “okey ra sa tanan” ug usa ka tinubdan sa dako nga kalig-on ngadto kaniya.

Samtang didto sa Africa, si Elder ug Sister Renlund “natudloan sa mga Santos kabahin sa unsa gayud ang importante.” Kausa, didto sa Democratic Republic of Congo, si Elder Renlund nangutana sa mga miyembro kon unsa ang ilang mga hagit. Nakahinumdom siya nga human sa pipila ka pagdasig, “usa ka mas edaran nga lalaki ang mibarug ug miingon, ‘Elder Renlund, unsaon man namo pagkabaton og mga hagit? Anaa kanamo ang ebanghelyo ni Jesukristo.’” Si Elder Renlund namalandong: “Ang akong asawa ug ako gusto nga mahimong sama niadtong mga Santos sa Kananga. … Kon tan-awon ingon og wala silay gipanag-iya, apan sila aduna sa tanan.”

Sa pagtapos sa iyang unang pakigpulong isip usa ka Apostol, si Elder Renlund mipamatuod: “Uban sa tibuok kong kasingkasing gusto kong mahimo nga usa ka tinuod nga sumusunod ni Jesukristo. Siya akong gihigugma. Siya akong gitahud. Mosaksi ko sa katinuod sa Iyang pagkabuhi. Mosaksi ko nga Siya ang Usa nga Dinihogan, ang Mesiyas” (pahina 94).