Elder Gerrit W. Gong

Si Elder Gerrit W. Gong, bag-ohay lang nga gitawag nga moserbisyo sa Kapangulohan sa Seventy, nakahinumdom og usa ka pag-aghat nga miabut kaniya samtang nagserbisyo siya isip usa ka misyonaryo didto sa Taiwan.

Usa ka investigator ang miabut sa sakrament miting. “Mibati ko og kadasig sa paghatag kaniya og mubo nga sulat sa Morse code nga nag-ingon og sama niini, ‘Welcome sa sakrament miting. Nalipay mi nga nakakita nimo dinhi!’”

Ang investigator usa diay ka operator sa radyo ug nalipay nga makadawat sa mensahe. “Natingala ko nga ang usa ka butang nga akong nakat-unan mga tuig na ang milabay makatabang diay nako … nga matabangan ang usa ka tawo sa usa ka piho nga paagi,” miingon si Elder Gong.

Ang pagkat-on ug pagtabang sa uban mao ang dalan sa kinabuhi ni Elder Gong sukad sa pagkabata, sa dihang nakakat-on siya og Morse code isip usa ka Boy Scout. Niadtong 1977 nakadawat siya og bachelor of arts degree sa Asian Studies ug University Studies sa Brigham Young University, pagka-1979 nakadawat siya og master of philosophy degree, ug pagka-1981 nakadawat siya og PhD sa international relations gikan sa Oxford University.

Si Elder Gong nakaserbisyo sa daghang calling sa Simbahan, lakip na sa pagka-high councilor, high priest group leader, presidente sa stake Sunday School , seminary teacher, bishop, presidente sa stake mission, presidente sa stake, ug Area Seventy. Sa panahon sa iyang tawag isip usa ka General Authority Seventy niadtong 2010, nagserbisyo siya isip sakop sa Ikalimang Korum sa Seventy sa Utah South Area.

Niadtong 1985 si Elder Gong miserbisyo isip special assistant sa undersecretary of state sa U.S. State Department, ug pagka-1987 nagtrabaho siya isip special assistant sa US ambassador sa Beijing, China. Gikan niadtong 1989 hangtud 2001 nagserbisyo siya sa daghang posisyon sa Center for Strategic and International Studies sa Washington, D.C.

Si Gerrit W. Gong natawo sa Siyudad sa Redwood, California, USA, niadtong 1953. Siya ug ang iyang asawa, si Susan Lindsay Gong, ang mga ginikanan sa upat ka mga anak ug dunay tulo ka mga apo. Ang mga apuhan ni Elder Gong namalhin sa Estados Unidos gikan sa China. Iyang nasubay ang iyang kaliwatan balik sa 33 ka henerasyon ngadto sa First Dragon Gong, nga natawo niadtong a.d. 837 sa habagatang China atol sa ulahing bahin sa Tang dynasty.