Mga Pagpamalandong
Ang mga Instruksyon Masabtan ba?
The author, nagpuyo sa Colorado, USA, namatay na sa milabay nga tuig.
Ang pagbyahe sa bisikleta nakakombinser nako nga kinahanglan susihon kanunay ang mapa sa kinabuhi sa Ginoo.
Pipila ka tuig ang milabay gibyahe nako ang France sa bisikleta uban sa akong igsoong babaye, bayaw nga babaye, ug ang iyang anak nga babaye. Kada buntag gihatagan mi og tulo ka mga pahina sa detalyado nga mga instruksyon nga, kon eksaktong masunod, mogiya kanamo sa among destinasyon ana nga adlaw. Samtang nagbisiklita kami agi sa mga ubasan, ang mga direksyon nagtudlo namo sa “pag-adto sa 165 ka pye (50 ka metros) amihanan, dayon moliko sa wala ug moadto sa 330 ka pye (100 ka metros).” Kasagaran, ang mga instruksyon adunay mga timailhan ug mga ngalan sa dalan.
Usa ka buntag among gibisikleta ang nindot nga karsada apan ang among instruksyon wala na mahaum sa teritoryo. Paspas kaayo ang pagkahisalaag, mihukom mi sa pagpamalik ngadto sa dapit katapusan namong nahibaloan nga hustong dalan aron masusi kon asa gyud mi paingon.
Tuod man, sa pag-abut namo didto, nakita namo ang usa ka gamayng timailhan sa dalan, gitiman-an namo ang mga instruksyon, nga napakyas kami sa pagtan-aw. Sa wala madugay anaa na usab kami sa hustong dalan, gitandi ang among pag-uswag uban sa mga instruksyon, diin nakahimo na usab og hingpit nga kahulugan.
Ang kasinatian nga nagsilbi nga simbolo mitubag sa makalibog nakong pangutana: Ngano, kon ang usa ka tawo nga aduna nay pagpamatuod sa ebanghelyo, mawala pa ba gihapon siya? Naklaro na kini nako nga kon maagi kita sa sayop nga dalan (sala) o mapakyas sa pagsunod sa mga sugo sa Dios, ang mga instruksyon (ang pulong sa Dios) wala nay kahulugan. Ang mapa, sama sa naandan, wala na mohaum sa teritoryo nga among nahimutangan. Kon wala kami nahisalaag og layo kaayo, mamatikdan unta namo nga nasayop kami ug nga kinahanglan mi nga mamalik (maghinulsol) o mopasalig pag-usab sa pagsunod sumala sa gisugo sa Dios diin nasayud kami nga husto gayud ang rota nga among gisunod.
Sa kasagaran kon ang mga instruksyon nga dili na haum kon asa na kita dapit, mokwestyon dayon kita sa mga instruksyon. Imbis nga mobalik, basulon na hinoon ang mga instruksyon ug isalikway na ang tanan. Sa katapusan, sa pag-undang sa panan-awon sa among distinasyon, nahisalaag kami, naglaroy-laroy sa mga dalan nga daw, sa kasamtangan, maanindot kaayo apan dili kini mopaingon kon asa kami moadto.
Kada adlaw kita adunay oportunidad sa pagtuon sa mga kasulatan. Ug sa kada unom ka bulan, makapaminaw kita sa kinatibuk-ang komperensya sa Simbahan. Dili ba kini mga panahon nga makasusi kita sa atong mga mapa sa dalan ug makasiguro nga naa kita sa dapit nga gikinahanglan? Sa makausa, samtang naminaw ko sa komperensya, akong gibati, nga dili man kita hingpit, mahimo kitang makahibalo nga anaa kita sa husto nga dalan kon kining mga instruksyon nakahimog kahulugan ngari kanato.
Gani ingon nga ang pagsunod sa husto nga direksyon makadala kanato sa atong mga destinasyon niining kinabuhia, ang pagtuon sa mga kasulatan ug ang pagpatalinghog sa tambag sa buhing mga propeta nagtugot kanato sa pagsusi sa atong agianan ug mo-adjust niini kon gikinahanglan aron, sa katapusan, moabut kita sa atong celestial nga panimalay.