Pag-ila sa mga Pagpangilad ni Satanas

Ni Dennis C. Gaunt

Ang tagsulat nagpuyo sa Utah, USA.

Kon kita nag-atubang sa espirituhanong pagpangilad, ang Basahon ni Mormon makatabang kanato nga motino kon unsa ang tinuod ug unsa ang dili.

Imahe

woman with money

Nagbutang ko og duha ka U.S. nga dolyar nga papel sa akong pitaka didto sa tindahan sa grocery sa dihang naa koy namatikdan sa usa sa papel. Naghunahuna ko nga ang kolor nga green kulang og gamay kaysa uban, busa ako kining gisusi og maayo. Dayon akong namatikdan ang imahe ni Presidente George Washington dili kaayo klaro tan-awon. Bisan ang papel lahi rang hikapon. Peke kini! Giilisan kini sa klerk og tinuod nga dolyares nga papel ug dayon gihatag ang piki nga kwarta ngadto sa manager sa tindahan.

Naghunahuna ko og maayo mahitungod nianang peke nga dolyar sukad adto. Naghunahuna ko kon unsa na ka dugay nga nagamit ug unsa na kadaghan ang mga tawo nga nailad niini sulod sa mga katuigan. Sa pagkatinuod, og wala pako nagpakabana, nailad usab ko. Apan pinaagi sa pagtandi niini batok sa tinuod nga butang ug pagtutok sa mga kalainan imbis sa pagkaparehas, ako makaingon nga peke kini.

Ang Basahon ni Mormon puno sa mga ehemplo sa espirituhanong mga mangingilad, kinsa misunod sa mga pamaagi ni Satanas ug pagpanlingla sa uban alang sa ilang kaugalingon nga kaayohan. Pinaagi sa pagtuon sa ilang mga lipat-lipat ug mga taktika, atong mamatikdan ang sipyat ug mga sayop sa samang paagi nga ang nabansay nga mata magsugod na nga makabantay sa kalainan tali sa tinuod ug peke nga kwarta. Ang dugang nga pagbansay sa atong mga mata sa pag-ila sa mga kalainan, mas maandam kita sa pakig-atubang sa mga mangingilad sa panahon karon ug batukan ang ilang mga bakak.

Pagpundok og Salabutan mahitungod sa Pagpangilad ni Satanas

Si Satanas nagtinguha sa pagdala kanato pahilayo pinaagi sa iyang kaugalingong matang sa espirituhanon nga pagpameke, ug kon dili kita mainampingon, mailad kita. Si Presidente Joseph F. Smith (1838–1918) mipasidaan: “Si Satanas mao ang usa ka hanas nga tigpameke, ug samtang ang kamatuoran sa ebanghelyo gihatag sa kalibutan sa ingon ka abunda, siya nagsabwag usab sa peke nga doktrina. Pagbantay sa iyang mini nga doktrina, ang inyong maangkon niini walay lain kon dili ang kahigawad, kasakit ug espirituhanong kamatayon.”¹

Ang labing maayong panagang nato batok sa pagkailad sa mga pagpangilad ni Satanas mao ang pagpamilyar sa mga kamatuoran sa ebanghelyo kutob sa mahimo. Ang pagkasayud og mas lawom sa kamatuoran, mas masayon ang pagtumbok sa kalainan kon ipresentar na ni Satanas ngari kanato ang iyang mga peke. Mao nga kon iya kining buhaton, kita kinahanglan nga mangita sa mga kalainan ug dili ang pagkaparehas, sama sa akong gihimo uban sa akong kwarta nga papel nga dolyar, tungod kay kana diin ang mga bakak kanunay ipadayag.

Si Presidente Ezra Taft Benson (1899–1994) mitudlo: “Ang Basahon ni Mormon mibutyag sa mga kaaway ni Kristo. … Ang Dios, uban sa Iyang walay kinutuban nga nahibaloan nang daan, mao nga mihulma sa Basahon ni Mormon nga unta atong makita ang sayop ug makahibalo unsaon sa pagpakigbatok sa sayop nga edukasyon, politikal, relihiyon, ug mga pilosopikanhon nga konsepto sa atong panahon.”²

Karon anaa kita sa pagkiggubat ni Satanas. Kita, sama sa bisan unsa nga mga kasundalohan, nagkinahanglan nga masayud kon unsa na ang plano sa kaaway. Ang pagkahibalo kon kanus-a ug asa ang mga kaaway mosulong, sama pananglit, mahimong usa ka bililhon nga impormasyon. Mao kana nganong ang mga pulong alang sa pag-angkon og ingon niana nga impormasyon gitawag og “pagpundok og salabutan.” Ang pag-ila sa atong kaaway mao ang pagkahimong mas maalamon kaysa sa atong mga kaaway. Ang Basahon ni Mormon makatabang kanato sa “pagpundok og salabutan” sa malinglahon nga pamaagi ni Satanas.

Ulog-ulog nga Pinulongan Mao ang Peke

Misobra sa katunga sa mangingilad sa Basahon ni Mormon migamit sa ulog-ulog nga mga pinulongan ug usa ka makabibihag nga personalidad aron makab-ot sa ilang mga tumong. Sama pananglitan, si Sherem “adunay usa ka hingpit nga kasayuran sa pinulongan sa mga katawhan; busa, siya makagamit og daghan nga pag-ulog-ulog, ug daghan nga gahum sa pinulongan, sumala sa gahum sa yawa” (Jacob 7:4). Ang dautan nga mga pari ni Haring Noah namulong “kawang ug maulog-ulogon nga mga pulong” (Mosiah 11:7), ingon nga maoy hinungdan sa mga tawo nga moapil sa mga dios-dios ug uban pang mga kadautan. Si Korihor mikab-ot sa susama nga mga resulta sa iyang panahon, “naglingla sa mga kasingkasing sa daghan” (Alma 30:18). Si Amalickiah ug Gadianton migamit sa ilang kamaayo nga moulog-ulog sa pagpadaghan sa mga kasundalohan sa dautan nga mga sumusunod (tan-awa sa Alma 46:10; Helaman 2:4).

Kini dili sulagma lamang. Ang pag-ulog-ulog mabaw, dili sinsero, taphaw ug hinambog. Si Nephi mipahimangno niadtong “motudlo subay niini nga paagi, sayop ug kawang ug binuang nga mga doktrina, ug manghambog diha sa ilang mga kasingkasing, ug maningkamot sa pagtago sa ilang mga pakitambag gikan sa Ginoo; ug ang ilang mga buhat anaa sa kangitngit” (2 Nephi 28:9).

Ang pag-ulog-ulog sa kasagaran gigamit aron sa paglingla; kini sa kasagaran adunay tinaguan nga motibo o nagpahipi nga mga tumong. Ang pag-ulog-ulog mao ang estilo sa pagsulti labaw sa unsay husto, ug kini dunay dakong epekto sa kakawang ug sa garbo sa kahiladman sa kinaiyanhon nga tawo. Ang mga propeta sa Ginoo, hinoon, nagsulti kanato sa yano apan importante nga kamatuoran kita kinahanglan makadungog.

Ang pag-ulog-ulog mao ang pinulongan ni Satanas. Si Presidente James E. Faust (1920–2007), Ikaduhang Magtatambag sa Unang Kapangulohan, mipasabut: “Ang tingog ni [Satanas] kanunay nga morag makatarunganon ug ang iyang mensahe sayon ra kaayong hatagan og katarungan. Kini madanihon, makapa-intriga nga tingog uban sa matahum nga tuno. Kini dili gahi o bati paminawon. Walay maminaw sa tingog ni Satanas kon kini hait o sakit paminawon.”³

Imahe

whispering

Kon ang kalibutan mopresentar kanato uban sa usa ka ideya, pilosopiya, o mga opinyon nga daw mohangyo lamang sa atong kakawang o garbo o kanang nindot lang kaayong paminawon maayo kaayo og matinuod pa, kana unta mahimong pasidaan ngari kanato diha-diha dayon. Tagda kana nga mga ideya isip peke. Itandi kini batok sa mga kamatuoran nga gitudlo sa mga propeta sa Ginoo. Pangita og mga kalainan, dili pagkasusama, ug ang peke nga mga ideya maklaro.

Si Nehor—usa ka Inila nga Mangingilad

Si Nehor gawasnon sa paggamit sa pamaagi ni Satanas sa pag-ulog-ulog. Atong siyang susihon isip usa ka pagtuon sa usa ka espirituhanong mangingilad. Si Nehor, kansang doktrina ingon og midawat sa ideya sa usa ka manunubos, usa ka inila ug makabibihag nga tigsangyaw diha sa mga Nephite. Si Nehor nakahimo og daghan nga mga sumusunod pinaagi sa pagtudlo nga “tanan nga mga katawhan kinahanglan maluwas sa katapusan nga adlaw ug makaangkon og kinabuhi nga dayon” (Alma 1:4).

Makita ba nato nganong ang mensahe ni Nehor madanihon kaayo? Siya nagtudlo mahitungod sa usa ka masayon-sayon ug relaks nga Dios—usa ka Dios kinsa, tungod kay Siya nahigugma sa tanan, moluwas sa tanan, bisan unsa pay mahitabo. Busa padayon ug buhata unsa ang imong gusto, tungod kay kining tanan maayo. Usa kini ka makapadani nga pilosopiya nga gihangup sa mga katawhan sa panahon ni Nehor (tan-awa sa Alma 1:5) ingon man sa daghang mga tawo karon. Usa ka libreng tiket sa langit mao ang usa ka butang nga klaro nga gusto sa katawhan.

Busa unsa may problema sa mensahe ni Nehor? Atong tan-awon pag-usab ang labing mahinungdanong mga punto sa iyang argumento:

Ang Dios milalang sa tanan nga mga tawo—tinuod.
Ang Dios nahigugma sa tanan nga mga tawo—tinuod.
Kita dili angay nga mahadlok sa Dios—tinuod.
Kinahanglan kita magmaya sa paghunahuna sa kaluwasan—tinuod.

Sa pagkakaron, adunay daghang mga pagkasusama tali unsay gitudlo ni Nehor ug sa mga kamatuoran sa ebanghelyo. Apan hinumdumi—sama sa uban nga peke nga kwarta, kinahanglan tan-awon nato ang mga kalainan, dili ang pagkasusama. Busa atong tan-awon ang katapusan nga punto ni Nehor:

Ang Dios moganti sa tanan og kinabuhing dayon—sayop!

Karon ania ang importante nga mga kalainan nga magsulti kanato nga si Nehor usa ka espirituhanong mangingilad. Ang kaluwasan gikan sa pisikal nga kamatayon maoy gipasalig ngadto sa tanan, apan ang kaluwasan gikan sa espirituhanon nga kamatayon nag-agad sa atong kaandam nga maghinulsol. Kon kita maghinulsol, nan atong madawat ang kinabuhing dayon (tan-awa sa Jacob 6:11). Apan walay libreng sakay.

Si Gideon ug si Alma Miila sa Mangingilad

Ang kadautan ni Nehor nabutyag sa adlaw nga gikahinagbo niya si Gideon, usa ka matarung nga magtutudlo diha sa Simbahan sa Dios. Si Gideon miatubang ni Haring Noah mga tuig nang milabay ug sa ingon adunay kasinatian uban sa espirituhanong mga mangingilad (tan-awa sa Mosiah 19:4–8). Si Nehor “misugod sa pakiglalis uban kaniya sa mahait nga paagi, nga siya unta modala sa mga katawhan palayo sa simbahan; apan ang [si Gideon] tawo nakasanta kaniya, nagbadlong kaniya uban sa mga pulong sa Dios” (Alma 1:7). Si Gideon miila kang Nehor isip usa ka mangingilad. Sa dihang nabisto, si Nehor midangop ngadto sa lain nga mga pamaagi ni Satanas—pagkamamumuno. Apan ang kamatayon ni Gideon wala makawang. Ang mga tawo midala sa mangingilad nga si Nehor sa atubangan ni Alma aron pagahukman.

Si Alma miila nga dili lamang sad-an si Nehor sa pagpanapi ug pagbuno apan kon gipasagdan nga wala pugngi, ang pagpanapi taliwala sa mga katawhan “mosangput sa ilang hingpit nga kalaglagan” (Alma 1:12). Busa si Nehor gihukman nga patyon, ug nag-antus og “makauulaw nga kamatayon” (Alma 1:15).

Si Gideon ug si Alma mao ang mga ehemplo alang kanato. Kon kita makabaton sa Espiritu uban kanato, kita makakita ug makadungog sa “mga butang ingon nga sila gayud mao” (Jacob 4:13). Kita makaila ni Satanas pinaagi sa makailad nga mga plano ug mga sumbanan “hingpit nga kasayuran, ingon nga ang kahayag sa adlaw gikan sa kangitngit sa kagabhion” (Moroni 7:15).

Ang atong “malinglahon” nga kaaway malantip, apan sama ni Gideon ug ni Alma, kita mahimong mas maalamon. Sama nga ako misugod sa hinay-hinay pag-ila sa kalainan tali sa akong parisan sa kwarta nga papel, kita hinay-hinay makabansay og atong mga mata ingon man usab sa atong hunahuna ug espiritu sa pag-ila sa kalainan tali sa kamatuoran ug mga bakak. Samtang ato kining buhaton, kita makaila sa mangingilad ug mabatukan ang ilang mga bakak.