E Mafai e Tagata Uma ona Aoao mai i se Perofeta
Henry Serion Sr., Hawaii, ISA
Ata na tusia e Allen Garns
Ao 17 ou tausaga, sa ou faigaluega ai i se faletalimalo i Kailua-Kona, Hawaii, ISA. O le faigaluega ai o se ave ato a malo i faletalimalo, sa ou vaai ai i le toatele o malo lauiloa a faletalimalo, e aofia ai John Wayne, Dorothy L’Amour, ma Esther Williams.
I se tasi afiafi, i le mavae ai o le taunuu mai o le tele o malo, sa fai sau malologa puupuu i le pito i luma o le faletalimalo, ae tu loa se limosini uliuli i le afega ae tulioso mai ai i fafo ni alii se toafitu, sa laei i ni ofuvae uumi uli, ofutino papae, ma ni fusiua. Sa i ai foi se isi alii sa suti uliuli sa o mai faatasi ma i latou. Ina ua uma ona paka e le avetaavale le latou taavale, sa o atu uma loa i latou i le potu ai mo le taumafataga o le afiafi. Sa ou faapea, sa foliga i latou o ni alii leoleo nana [FBI] ao ou toe foi i totonu e faaauau ou tiute o le tali atu i valaau mai i potu mo ni auaunaga.
Pe a ma se itula mulimuli ane, sa ou i ai i fafo e ula lau sikaleti, ae toe o mai loa i fafo le vaega lea sa ou vaai muamua i ai e toe foi atu i le latou limo, lea sa faatali atu i le paka. Sa latou o atu i le ala savali agai atu i le taavale ma tatala le faitotoa i tua e alu atu ai i totonu le alii sa laei i le suti uliuli. Ae nai lo o le ulu atu i le taavale, sa tu le tamaloa suti uliuli, liliu ma tilotilo mai ia te au o loo ou faalagolago i le fale, ma savali mai ia te au.
E umi ma paee o ia, ma se tioata e sio i uaea ma se tamai soesa umi sinasina. Sa faaloaloa mai lona lima e faatalofa mai ia te au ae tuu le isi ona lima i luga o lou tauau. Sa ou tei i le sau o se tamaloa e tulaga taualoa ona foliga ma talanoa mai ia te au, o se alii talavou na te lei iloaina lava.
Ou te le manatua ia upu uma sa ia saunoa mai ai ia te au nai lo o le fai mai “e leaga na mea mo oe,” e faatatau i lau sikaleti. O lona agalelei ma lana amio sa ou faagaeetia ai lava.
I le mavae ai o se tausaga, sa fai ai loa au lesona e faifeautalai ma ou papatiso ai.
Ao ou matamata i ata o taitai o le Ekalesia, sa ou matauina ai se ata o Peresitene Siaosi Alapati Samita (1870–1951) ma sa vave ona ou iloaina o ia o le tamalii agalelei ma tulaga ese lea sa ou feiloai i ai i luma o le faletalimalo. Sa atili ai lou faagaeetia ona o le faia e le Peresitene o le Ekalesia o se mea faapea i se tasi e pei o au, o se taulealea sa leo se tagata foi o le Ekalesia ma e leai se mea faapitoa e taua ai.
O se tamalii a maoae ma le faaalia o se alofa ma se manatu popole faapena mo se taulealea e faigaluega i se tulaga e tau le iloaina, ma le leai o se malamalamaaga o le talalelei po o le alofa o lo tatou Tama Faalelagi mo i tatou.
O le onosefulu lima tausaga mulimuli ane, ua ou maua ai se malamalamaaga sili o lena manatu popole ma le alofa, ma ou te taumafai ia ou vaai atu ia i latou e siomia au e pei ona sa tagai mai ai Peresitene Samita ia te au.