Auaunaga i le Ekalesia
E Leai la i Lau Vaavaaiga!
E alala le tusitala i Kalefonia, ISA
O le ki i lo tatou faamanuiaina o le alolofa i alii talavou ao tatou auauna atu ia i latou.
Sa ou latalata atu i se aiga sa i ai se atalii i Alii Talavou. I le taimi o se gaoioiga ao avea o ia ma se tiakono, sa otegia ai o ia e se taitai, ma faalumaina o ia i luma o lana tupulaga. Sa ia lagonaina mulimuli ane le tauvalea atili, ma le toe sau ai i gaoioiga, ma sailia ai ni uo i fafo atu o lana uarota.
Sa i ai se aafiaga tele o lena mea na tupu ia te au. Sa ou naunau o le a le tupu se mea faapena i lau vaavaaiga pe afai e valaauina au e galulue ma alii talavou. O le lua tausaga mulimuli ane sa valaauina ai au e galulue faatasi ma le au tiakono.
I totonu o nai masina, ae ou taulimaina ai se alii talavou o le sa fai soo lava lona tautalaitiiti ma lana amio.
“O le laina lea,” sa iu ina ou fai atu ai e faatatau i ana amioga. “Aua lava nei e sopo ai.”
Sa ia sopoiaina, sa fai sina a maua finauga, ma ia aluese ai.
Mulimuli ane, sa ma talanoa ai e foia o maua feeseeseaiga. Sa ou faapea atu, “Tavita, ou te alofa ia te oe, ma o oe o se alii talavou lelei, ae ou te le fiafia i nisi o mea e te faia. E vaavaai atu isi alii talavou ia te oe o se taitai, ma afai e vaai atu e leai se mea e faia e uiga i au amioga le talafeagai, o le a latou faataitai ai foi.”
Sa ma toe faalelei, sa ia lagonaina le taliaina, ma sa matou fesoasoani o ni taitai e foia nisi o ona luitau patino. Ina ua atoa lona 14, sa ia fai mai ou te faauuina o ia o se aoao. O le aso, i ni tausaga mulimuli ane, na te tuuina mai se opo lapoa ia te au i soo se taimi lava e vaai ai ia te au, ma e talanoa ma le faamemelo e uiga i lona taimi i Alii Talavou.
A tatou alolofa i alii talavou ma fiafia i le faatasi ai ma i latou, latou te iloa lava. O le pogai lena na matou faaalia ai ma ou fesoasoani le fiafia moni i a matou alii talavou. Matou te le faia lava se gaoioiga ona sa faatonu mai i le tusi, sa matou faia ona sa matou iloa o le a aoao ai e alii talavou se tomai, tuputupu ae ai, ma maua se taimi fiafia.
I se tasi taimi, sa i ai se matou alii talavou sa lei fiafia ona matua i la matou polokalama.
“E le afaina lea,” sa ou fai atu ai ia i laua, “ae e te lua malilie e sau pea le lua atalii, e aoao, ma maua sina taimi malie?”
Sa matou faaaofia o ia i le matou polokalama, ma e lei umi ae ioe mai ona matua ia auai atoatoa mai. Sa laua vaaia sa aoao ma fiafia le la atalii. Mulimuli ane, sa ia auauna atu i se misiona talai. Sa tuputupu ae foi lona uso laitiiti ma faia foi se misiona.
Sa matou vaaia se sootaga i le va o taitai na fiafia i se alii talavou, ma le aoao o lena alii talavou, tuputupu ae, ma iu ai ina faia se misiona. E faamalieina le vaavaai ai i le tuputupu ae o alii talavou, ma o se mea fiafia le aoao faatasi ma i latou. O le ki i lo tatou faamanuiaina o le alolofa i alii talavou ao tatou auauna atu ia i latou.