Erekyɛ Onnyiewiei Enyigye

Adze kor a ɔfa asɛmpa no ho a oye kɛse no nye nkwagye nhyehyɛɛ no ho nyimdzee. Ɔyɛ nwanwa dɛ yɛwɔ kwan a yebotum nye hɛn ebusua atsena afebɔɔ. Dɛm nyimdzee no boa hɛn ma yenya enyidado ber biara a yɛtse dɛ wiadze no rehyɛ hɛn do no. President Erying kyerɛkyerɛ dɛ, “Hɛn Ɔsor Egya dɔfo nyim hɛn akoma mu. No botae nye dɛ Ɔbɛma yeenya enyigye (hwɛ 2 Nephi 2:25). Na dɛm ntsi no Ɔmaa hɛn akyɛdze a ɔyɛ Ne Ba no ama ebusua nkyekyeree mu enyigye no eetum aakɔ do afebɔɔ. … Ɔyɛ dza odzi wɔ Nyame Ne ba biara a ɔba asaase do no dɛ obotum ahwehwɛ.”

Dɛm nhyira no wɔ hɔ ma hɛn a yɛtse ase sesei na hɔn a woetwa mu kɔ no—mbom gyedɛ ɔnam hɛn mboa do. Hɛn ewuakɔr a wɔwɔ sunsum wiadze mu sesei no, wɔrotweɔn hɛn ma yesiesie hɔn edzin ama temple ayɛdze no a wobegyina ayɛ ama hɔn no. Mbom ɔtɔfabi a otum yɛ dzen dɛ yɛbɛyɛ edwuma no ama hɔn. Bia na hɛn ho akyer hɛn dodow, anaa yɛtse ekyir dodow a yennkotum ataa akɔ temple.

Ɔayɛ siar dɛ, akwan binom wɔ hɔ a yebotum aboa hɛn ewuakɔr no, tse dɛ yɛbɛyɛ hɛn ebusua abakɔsɛm edwuma, indexing, anaa yɛbɔhwɛ mbɔdomaba do ber a hɔn awofo kɔ temple no. Ber a yɛroboa no, yɛsom Ewuradze na yɛdze onnyiewiei ebusua ebusua ho enyidado brɛ hɔn a wɔwɔ ntwamutam n’afã noho no.