Onnyiewiei Ebusua mu Ɔdɔ ho Enyidado no

Akyɛdze a Ɔsor Egya dɔfo dze ama Ne mba nyina no, onnyiewiei nkwa nye dza a ɔsõ kɛse wɔ mu no (hwɛ N&A 14:7). Dɛm akyɛdze no nye dɛ yɛbɛtsena Nyame Egya no na No Dɔba no Hɔn enyim dɛ ebusua ebusua afebɔɔ. Nyankopɔn N’ahenman mu dza ɔkrɔn koraa no, celestial dze no, ɔno nko mu na ebusua abrabɔ mu ɔdɔ nhyehyɛɛ no bɔkɔ do wɔ.

Hɛn nyina yɛwɔ ebusua ebusua a wɔtsena ase wɔ ɔdɔ mu ho enyigye enyidado. Hɛn mu binom no, ɔyɛ atsenkã a yennyaa ho sũahu—atsenkã a yenyim dɛ obotum aba naaso yennyaa bi. Bia yeehu no wɔ binom hɔn abrabɔ mu. Hɛn mu binom no, ber a owu apaapaa hɛn na ba, enã, egya, onuabanyin, akyerɛbaa, anaa nana dɔfo mapã bi ntamu no, na ebusua mu ɔdɔ no yɛ dɛ adze a ɔwɔ hɔ ampara na ɔsom bo a.

Hɛn nyina yeenya enyidado nkã-tse no dɛ dabi yebotum atse dɛm ebusanyi no a yɛdɔɔ no kɛse no dɔ bio na sesei yɛhwehwɛ dzendzen dɛ yebofua bio.

Hɛn Ɔsor Egya dɔfo nyim hɛn akoma mu. No botae nye dɛ Ɔbɛma hɛn enyigye (hwɛ 2 Nephi 2:25). Dɛm no ntsi Ɔmaa hɛn akyɛdze a ɔyɛ Ne Ba no ama ebusua mu enyigye nhyehyɛɛ no eetum aakɔ do afebɔɔ. Osiandɛ Agyenkwa no bubuu owu no mpokyerɛ mu no ntsi, yɛbɔsoɛr efi owu mu. Osiandɛ Ɔbɔɔ werdam maa hɛn bɔn no ntsi, yebotum edua hɛn gyedzi na nnuhu do, abɛfata celestial ahenman no, bea a ebusua ebusua wɔabɔ mu wɔ ɔdɔ mu afebɔɔ no.

Agyenkwa no somaa Nkɔnhyɛnyi Elijah wɔ Joseph Smith hɔ dɛ ɔmfa asɔfodzi nsaafee no nsan ananamu mbra (hwɛ N&A 110). Dɛm nsaafee no na ɔdze nsɔwano tum no bae, a ɔdze Nyankopɔn N’akyɛdze mu dza ɔsõ kɛse no ma Ne mba—onnyiewiei nkwa wɔ ebusua ebusua mu a wɔabɔ mu afebɔɔ no.

Ɔyɛ dza Ɔdze ama, a Nyame Ne ba biara a ɔba asaase do no botum ahwehwɛ. No sunsum mu mba nkyɛmu ebiasa mu kor poow dza Ɔdze ama yi wɔ sunsum wiadze. Wɔsaan mu yii dɛ wonnkohu Ɔsor Egya N’onnyiewiei ebusua ebusua mu akyɛdze no mu dɛw no dabiarada, osian hɔn gyedzi a ɔnndɔɔ sõ na nkyii bagua mu etuatsew so ntsi.

Hɛn a yedzii konyim wɔ abrabɔ a ansaana nyimpa reba asaase do mu nsɔhwɛ a ohia kɛse do no, ma ɔnam do ma yenya ɔnnkyebo honandua akyɛdze no, onnyiewiei nkwa ho nsanmuyi tsitsir no da ho wɔ hɔ ma hɛn. Sɛ ɔyɛ nhyira ma hɛn ma yebenya asɛmpa nsan-ananmu no a, yebotum asan mu yɛnye Nyame ayɛ ahyɛmudzi a ɔbɛma yɛafata onnyiewiei nkwa. Ber a yetsim wɔ nokwardzi mu no, Sunsum Krɔnkrɔn no besi hɛn enyidado na awerɛhyɛmu no pi dɛ yɛnam onnyiewiei nkwa anamɔn kwan no do a, yɛnye hɛn ebusua ebusua rekɛtsena afebɔɔ wɔ celestial ahenman no mu.

Binom dze, wonnkenya dɛm onnyiewiei dɛwdzi no ho enyidado biara. Bia awofo, mba, nuambanyin, na nkyerɛbaa binom ayɛ nsanmuyi a ɔyɛ dɛ ɔnnkɛma wɔaafata onnyiewiei nkwa. Ibotum mpo adwen ho dɛ ana woedua Jesus Christ No Werdambɔ no do ama ɔwoara afata a.

Mpɛn bi Nyame No nkɔnhyɛnyi bi maa me afotu a ɔma me asomdwee. Nna ɔhaw me dɛ binom hɔn nsanmuyi botum ama hɛn ebusua akwantsen no nnkɛfata dabiarada dɛ yɛbɔbɔ mu afebɔɔ. Ɔsee dɛ, “Edze asɛnhia no a ɔmmfa ho rehaw woho. Ɔwo bɔ bra ara a ɔbɛma afata celestial ahenman no, na ebusua nhyehyɛɛ horow no bɛyɛ nwanwa akyɛn dza ibotum esusu ho no.”

Hɔn a hɔn ankorankor sũahu anaa hɔn awar na mba—anaa woenya bi no—dze sum kata hɔn enyidado do no, mema hom me dasegye dɛ: Ɔsor Egya nyim wo na Ɔdɔ wo dɛ eyɛ No sunsum mu ba. Ansaana abrabɔ yi reba no, ber a nna enye Ɔno na No Dɔba no wɔ hɔ no, Wɔdze onnyiewiei nkwa ho enyidado hyɛɛ w’akoma mu. Jesus Christ No Werdambɔ mu tum redzi dwuma no na Sunsum Krɔnkrɔn no rema kwankyerɛ no, ibotum atse sesei na ibɛtse no wɔ wiadze a ɔreba no mu ebusua mu ɔdɔ a w’Egya na No Dɔba pɛ no dodow ma wo dɛ ibenya no.

Megye dase dɛ sɛ ibɔ bra a ɔfata celestial ahenman no a, nkɔnhyɛsɛm anohoba dɛ “ebusua nhyehyɛɛ horow no bɛyɛ nwanwa akyɛn dza ibotum esusu ho no” bɛyɛ wo dze.