Kwaļo̧k Ippān Doon Mōņōņō eo Ejjeļo̧k Jem̧ļo̧kin

Juon iaan men ko rem̧m̧an tata kōn gospel in ej jeļāļo̧kjeņ eo kōn karōk in lo̧mo̧o̧r eo. Ewōr ad iien em̧m̧an n̄an pād ippān baam̧le eo ad n̄an indeeo. Jeļāļo̧kjeņ in ej jipan̄ kōj bōk kōjatdikdik in jabdewōt iien jej eddodo kōn men ko an laļ in. Būreejtōn Eyring ej katakin, “Jemedwōj Ilan̄ Eo Ej Iakwe Ejeļā kōn Būruwōd. Kōttōbar eo An ej n̄an letok n̄an kōj m̧ōņōņō (lale 2 Nipai 2:25). Kōn menin, Ekar letok mennin letok eo an Nejin n̄an kōm̧m̧an bwe en tōprak lan̄lōn̄ in iakwe ko an baam̧le im en wōnm̧aanļo̧k wōt n̄an indeeo. … Ej juon mennin aje bwe aolep ajri ro nejin Anij ro rekar ļāwōdetok laļ in ren maron̄ bōke.

Kōjeraam̧m̧an in ej jerbal n̄an kōj aolep ro rej mour kiiō im n̄an armej ro emōj aer jako jān mour in—ak naaj aikuji wōt jipan̄ eo ad. Rūtto ro jibūd im jim̧aad ro rej pād ilo laļ eo an jetōb kiiō, rej kōttar wōt kōj n̄an ad kōpooj etaer n̄an kain̄i ko an tampeļ eo bwe jen jerbal kaki ilo etaer. Ak jet iien menin emaron̄ in pen bwe jen jerbal kōn er. Bōlen jemaron̄ in lukkuun boub, ak jemaron̄ bōlen jokwe ilo juon jikin ettoļo̧k jān juon tampeļ im ejjab emakijkij ad etal.

Jeraam̧m̧an eo in, ebar lōn̄ wāween ko jet jemaron̄ in jipan̄ rūtto ro jibūd im jim̧aad kaki, āinwōt kōm̧m̧ane jerbal in menmenbwij, indexing, ak lale ajri jiddik ro bwe ro jined im jemād ren etal n̄an tampeļ eo. Jān jipan̄ rot kein, jej jerbal n̄an Irooj im jej bōktok kōjatdikdik eo kōn baam̧le n̄an indeeo n̄an armej ro rej pād iturājet in rōn̄ōl eo.