Naan in Katak an Kōrā, O̧kwōj 2016
Kōkkaajririik Baam̧le ko Ippān Doon
Kanooj jar ilo am̧ ekkatak kōn katak in im pukōt n̄an jeļā ta eo kwonaaj kwaļo̧k. Ilo am̧ meļeļe “Baam̧le Eo: Juon Naan in Kean̄ n̄an Laļ in” ekōjkan an naaj kōļapļo̧k tōmak eo am̧ ilo Anij im am̧ kōjeraam̧m̧an ro kwoj mije ilo am̧ loļo̧k im katakin er? N̄an meļeļe ko reļļapļo̧k, etal n̄an reliefsociety.lds.org.
Tōmak, Baam̧le, Deeor
Juon “em̧m̧aan im kōrā ripālele ewōr juon aer eddo eo eaorōk n̄an iakwe im kea kake doon im n̄an ajri ro nejierro.”1 “Mweo ej aikuj erom juon ruum̧ in ekkatak an Anij kōn iakwe im jerbal in jipan̄,” Būreejtōn Russell M. Nelson ekar ba, Būreejtōn eo an Doulul eo an Rijilōk ro Jon̄oulruo.
“Jemedwōj Ilan̄ ekōņaan bwe ļōm̧aro pālele im lim̧aro pālele ren tiljek n̄an doon im kautiej im kōm̧anm̧an n̄an ajri ro nejier āinwōt juon jolet jān Irooj.”2
Ilo Bok in Mormon, Jekab ekar ba bwe iakwe eo an ļōm̧aro pālele n̄an lim̧aro pāleer, iakwe eo an lim̧aro pālele n̄an ļōm̧aro pāleer, im iakwe eo aer jim̧or n̄an ajri ro nejier ekar un eo RiLeman ro ilo juon tōre rekar wānōk ļo̧k jān RiNipai ro (lale Jekab 3:7).
Juon iaan wāween ko rem̧m̧an n̄an karuwaineneik tok iakwe im ineem̧m̧an n̄an m̧ōko imōd ej kōnono jouj n̄an ro uwaan baamle ko ad. Kōnono jouj ej karuwaineneik tok Jetōb Kwojarjar eo. Sister Linda K. Burton, Relief Society būreejtōn eo eutiej, ekar kajjitōk ippād bwe jen ļōmņak: “ewi jon̄an emakijkij in ad kōņaan in ‘kōnono naan ko rejouj n̄an doon’?”3
Bar Jet Eoon Ko
Bwebwenato ko rem̧ool raan kein emōj Jeiki
Elder D. Todd Christofferson jān Doulul eo an Rijilōk ro Jon̄oulruo ekar kwaļo̧k juon an en̄jake jān tōre eo ekar juon ajri im kar im̧we e kōn aorōk in iakwe an juon baam̧le. Ke e im ļaddik ro jein im jatin rekar dik wōt, jineer ekar m̧wijm̧wij kōn kāānjer eo ippān eo ekar lukkuun metak n̄e ej kōjerbal pā eo pein tuanmo̧o̧ņ. Baam̧le eo an ekar obrak kōn ļaddik wōt, aaen nuknuk ekar juon jerbal eo eļap, ak iien ko jinen ej aaene nuknuk ko aer, jet iien ekar aikuj bōjrak im etal n̄an ruum̧ in kiki eo an im jan̄ m̧ae iien metak eo ej jako.
Iien eo jemān Elder Christofferson ekar kile ta eo ekar waļo̧k, ekar jab kwaļo̧k an jab m̧ōn̄ā in rālep ium̧win juon iiō bwe en maron̄ kakkoņkoņ jāān n̄an an wiaki juon mijiin eo enaaj jipan̄ an aaene nuknuk ko. Kōn iakwe eo an n̄an kōrā eo pāleen, ekar kōm̧m̧ane juon waanjon̄ak in kōkkaajririik ilowaan wōt baam̧le ko n̄an ļaddik ro nejin. Jān kōm̧anm̧an in em̧m̧an, Elder Christofferson ekar ba, “Ikar jab jeļā kōn kaarmejete in an jema im jerbal in iakwe in an n̄an jinō ilo tōre in, ak kiiō ke ijeļā, ij ba ippa make, ‘En̄ņe ej juon em̧m̧aan.’”4
© 2016 jān Intellectual Reserve, Inc. Aolep jim̧we ko rej pād ippān. Jeje ilo USA. Kōmālim ilo kajin English: 6/16. Kōmālim an ukook: 6/16. Ukook eo an Visiting Teaching Message, August 2016. Marshallese. 12868 874
Ļōmņak kōn Menin
Ewi wāween an iakwe im kea kake bar juon armej karuwaineneik tok Jetōb eo n̄an m̧weo imōd?