Kōjatdikdik eo kōn Iakwe an Baam̧le Eo N̄an Indeeo

Jān aolep mennin letok ko an Jemedwōj Ilan̄ ko ekar kōpooji n̄an aolep ajri ro Nejin, mennin letok eo eļaptata ej mour indeeo (lale K&B 14:7). Mennin letok in ej n̄an mour im̧aan mejān Anij Jemed im Nejin Jitōn Bōro n̄an indeeo ilo baam̧le ko. Ilo wōt aelōn̄ in kiin̄ ko routiej tata an Anij, celestial, korak in iakwe ko an mour in baam̧le naaj wōnm̧aanļo̧k.

Kōj aolep, jej kōjatdikdik kōn mour in lan̄lōn̄ ilo ad mour ippān baam̧le ko ewōr iakwe ippāer. N̄an jet iaad, ej juon en̄jake eo im kōj wōj jejjan̄in en̄jake—juon en̄jake eo im jejeļā ejjab pen tōpar e ak ilo iien in jej jan̄in kile. Emaron̄ mōj ad loe ilo mour ko an ro jet. N̄an jet iaad, iakwe an baam̧le emōj an ļapļo̧k an m̧ool im aiboojoj n̄e mej ekar kōjepel kōj jān juon nejid ajri, jān juon m̧am̧a, jān juon baba, juon jeiū ak jatū ļaddik, jān juon jeiū ak jatū leddik, ak jān juon jim̧a ak bubu eo ejitōn bōro.

Kōj aolep jekar en̄jake kōjatdikdik in bwe juon raan jemaron̄ in bar en̄jake okmāņāān in iakwe in an eo uwaan baam̧le eo ad jelukkuun iakwe im kiiō jej metak kake im do̧lo̧l in bar bōke.

Jemedwōj Ilan̄ Eo Eļap Iakwe Ippān Ejeļā Būruwōd. Kōttōbar eo An ej n̄an letok n̄an kōj m̧ōņōņō (lale 2 Nipai 2:25). Kōn menin, Ekar letok mennin letok eo an Nejin n̄an kōm̧m̧an bwe baam̧le en wōr lan̄lōn̄ ilo jem̧doon ko an baam̧le im en wōnm̧aanļo̧k wōt n̄an indeeo. Kōnke Rilo̧mo̧o̧r eo ekar rube to ko an mej, jenaaj aolep jerkakpeje. Kōnke Pinmuur eo an Jisōs Kraist, jemaron̄, jān tōmak eo ad im ad ukweļo̧k, jemaron̄ erreo n̄an deļo̧n̄e aelōn̄ in celestial, ijo baam̧le ko rej liāp ippān doon ilo iakwe n̄an indeeo.

Rilo̧mo̧o̧r eo ekar jilkintok Rikanaan Ilaija n̄an Josep Smith bwen kōjepļaaktok kii ko an priesthood eo (lale K&B 110). Ippān kii kein ekar itok kajoor eo n̄an liāp, letok mennin letok eo eļaptata an Anij n̄an ajri ro Nejin—mour indeeo ilo baam̧le ko rej po̧po ippān doon n̄an indeeo.

Ej juon mennin aje bwe aolep ajri ro nejin Anij ro rekar ļāwōdetok laļ in remaron̄ bōke. Juon m̧ōttan jilu in jetōb ro Nejin rekar abwin bōke mennin aje in An ilo laļ eo an jetōb m̧okta. Jān likjab in tōmak im innām jum̧ae ekar waļo̧k, rekar kālet bwe ren jab jeļā kōn lan̄lōn̄ in mennin letok eo an Jemedwōj Ilan̄ kōn baam̧le ko n̄an indeeo.

N̄an kōj ro me rekar eļļā jān mālijjon̄ in eaorōk ilo mour eo m̧okta im ad kar ekkar n̄an bōk mennin letok eo an ānbwin, kālet eo eļap an mour indeeo ej ja ad wōt n̄an kālet e rainin. Eļan̄n̄e jekar jeraam̧m̧an im loe jepļaaktok eo an gospel in, jemaron̄ kālet n̄an kōm̧m̧an im kōjparok bujen ko ippān Anij, ko im rej kōm̧m̧an bwe jen ekkar n̄an mour indeeo. Ilo ad kijenmej ilo men kein kōn tiljek, Jetōb Kwojarjar eo enaaj kapen kōjatdikdik eo ad im ad lōke bwe jej pād ilo iaļ eo n̄an mour indeeo, n̄an mour ilo baam̧le ko n̄an indeeo ilo aelōn̄ in celestial.

N̄an jet, lan̄lōn̄ eo ejjeļo̧k jem̧ļo̧kin emaron̄ bōlen juon men ejjab lukkuun alikkar ak bōlen juon kōjatdikdik eo emejkunļo̧k. Ro jinen im jemān, ajri ro, ļaddik ro jeid ak jatid, im leddik ro jeid ak jatid ro me bōlen emōj aer kōm̧m̧ani kālet ko remaron̄ kar kōm̧m̧an aer jab ekkar n̄an mour indeeo. Kom̧ bōlen maron̄ kar ļōmņak eļan̄n̄e kom̧ij jan̄in de ekkar n̄an menin kōn Pinmuur eo an Jisōs Kraist.

Juon rikanaan an Anij ekar juon alen aje tok naan in kapilōk in eo ej letok aenōm̧m̧an. Ikar inepata kōnke kālet ko an ro jet ko remaron̄ kōm̧m̧an bwe baam̧le eo am en maron̄ ban mour ippān doon n̄an indeeo. Ekar ba, “Kwoj inepata kōn jorrāān eo eoktak. Kwon baj mour im erreo n̄an am̧ deļo̧n̄ e aelōn̄ in celestial, im karōk ko an baam̧le renaaj ļapļo̧k aer em̧m̧an jān jon̄an eo komaron̄ in ļōmņake.”

N̄an aolep armej ro me en̄jake ko aer make ak armej ro me m̧are ko aer im ajri ro nejier—ak ejjeļo̧k pāleer ak nejier ajri—eaabdikļo̧k aer kōjatdikdik, ij lewaj aō kam̧ool: Jemedwōj Ilan̄ ejeļā kajeem̧ im Ej iakwe eok āinwōt ajri in jetōb eo Nejin. Iien eo kwaar pād Ippān im ippān Eo Nejin Ejitōn Bōro m̧okta jān mour in, Rekar likūt i ilo būruwōm̧ kōjatdikdik eo ippām̧ kōn mour indeeo. Ippān kajoor in Pinmuur eo an Jisōs Kraist ej jerbal im ippān Jetōb Kwojarjar eo ej tōl, komaron̄ en̄jake kiiō im naaj en̄jake ilo laļ eo ej itok iakwe eo an baam̧le Jemōm̧ Ilan̄ im Nejin Jitōn Bōro relukkuun aikuji bwe kwōn bōke.

Ij kam̧ool bwe ilo am mour erreo n̄an deļo̧n̄ e aelōn̄ in celestial, kallim̧ur eo kar kanaan kake bwe “karōk ko an baam̧le renaaj em̧m̧anļo̧k jān jon̄an am maron̄ ļōmņaki” renaaj am̧.