Die Seëninge van Gehoorsaamheid

“God se gebooie word nie gegee om ons te frustreer nie, of om ʼn struikelblok tot ons geluk te word nie. Net die teenoorgestelde is waar. Hy wat ons geskape het, en wat ons met ʼn perfekte liefde liefhet, weet presies hoe ons moet leef sodat ons die grootste geluk moontlik kan bekom. Hy het aan ons riglyne verskaf wat, indien ons dit volg, ons veilig deur hierdie, dikwels gevaarlike aardse reistog, sal sien. Ons onthou die woorde van die bekende gesang: ‘Onderhou die gebooie! Hierin is veiligheid; hierin is vrede’ [sien “Onderhou die Gebooie,”Gesange, no. 303].”³

“Gehoorsaamheid is die kenmerk van profete; dit het deur die eeue aan hulle krag en kennis verskaf. Dit is noodsaaklik dat ons besef dat ons ook geregtig is op hierdie bron van krag en kennis. Dit is vandag aan elkeen van ons maklik beskikbaar, soos wat ons God se gebooie gehoorsaam. …

“Die kennis waarna ons soek, die antwoorde waarna ons smag en die krag wat ons vandag begeer om die uitdagings van ʼn komplekse en veranderende wêreld te oorkom, kan ons s’n wees wanneer ons gewilliglik die Here se gebooie gehoorsaam.”⁴

“Die neiging van ons tyd is losbandigheid. Tydskrifte en televisieprogramme wys die sterre van die silwerdoek, die helde van die sportveld—diegene wat baie jongmense wil navolg—wat geen ag gee aan God se wette nie en met sondige gedrag te koop loop, skynbaar sonder enige nadelige gevolge. Moet dit nie glo nie! Daar is ʼn tyd vir afrekening—selfs ʼn balansering van die grootboek. Elke Aspoestertjie het haar middernag—indien nie in hierdie lewe nie, dan in die lewe hierna. Die Oordeelsdag sal vir almal kom. … Ek pleit met julle om gehoorsaam te wees.”⁵

“Dit mag dalk soms blyk asof diegene in die wêreld meer pret het as jy. Sommige van julle mag voel asof julle beperk word deur die lewenstyl wat ons in die Kerk navolg. My broers en susters, ek verklaar egter aan julle, dat daar niks is wat meer vreugde in julle lewens kan bring, of meer vrede aan ons siele kan bring, as die Gees wat na ons kan kom wanneer ons die Verlosser volg en die gebooie onderhou nie.”⁶

“Ek getuig aan julle dat ons beloofde seëninge ontelbaar is. Alhoewel die stormwolke mag nader, en die reën op ons mag val, sal ons kennis van die evangelie en ons liefde van ons Hemelse Vader en van ons Verlosser ons vertroos en ons ondersteun en vreugde in ons harte bring, soos wat ons opreg lewe en die gebooie onderhou. Daar is niks in hierdie wêreld wat ons kan oorwin nie.”⁷

“Wie was hierdie Man van hartseer, bekend met smart? Wie is die Koning van heerlikheid, hierdie Heer van die leërskare? Hy is ons Meester. Hy is ons Verlosser. Hy is die Seun van God. Hy is die Oorsprong van ons Saligheid. Hy vra ‘Volg my.’ Hy beveel: ‘Gaan en doen julle net so.’ Hy pleit: ‘Onderhou my gebooie.’

“Laat ons Hom volg. Laat ons sy voorbeeld navolg. Laat ons sy woord gehoorsaam. Deur dit te doen, gee ons aan Hom die goddelike gawe van dankbaarheid.”⁸