E ti’a i te mata ’ata’ata e fa’atupu i te maita’i

Tē fa’ata’a nei te peresideni i e piti fā i roto i tā tātou mau ’ohipa : te herera’a i te Atua ’e te herera’a i tō tātou ta’ata tupu. I te tahi rā taime, e ’ere i te mea ’ōhie ’ia here ia vetahi ’ē. I roto i te orara’a, tē vai ra te taime e fifi ri’i ’outou nō te au ia vetahi ’ē—penei a’e ’ua ha’amāuiui terā ta’ata ia ’outou ’e ’aore rā e fifi ri’i tō ’outou nō te paraparau i te ta’ata ’e ’aore rā nō te fa’ahoa atu. I taua mau taime ra, ’a tāmata i te ha’amana’o i te here tā ’outou i fāri’i nō roto mai i te mau hoa, te ’utuāfare, te Metua i te Ao ra ’e ia Iesu Mesia. ’A ha’amana’o i te ’oa’oa tā ’outou i putapū i taua mau taime ra ’e ’a tāmata i te hi’o mana’o ē, e aha te huru mai te peu e rāve’a tō te mau ta’ata ato’a ’ia putapū i taua here ra. ’A ha’amana’o ē, e tamāhine ’e e tamāroa nā te Atua te mau ta’ata ato’a, ’e nō reira, e fāna’o ho’i rātou i tōna here ’e tō ’outou ato’a ho’i.

’A feruri na i te ta’ata i roto i tō ’outou orara’a o tā ’outou e fifi ra e fa’ahoa. ’A tu’u iāna i roto i tā ’oe mau pure ma te ani i te Metua i te Ao ra ’ia ’īriti i tō ’oe ’ā’au nōna. ’Oi’oi roa ’oe i muri iho i te hi’o iāna mai Tāna ato’a e hi’o nei iāna : mai te hō’ē tamari’i nāna e ti’a ’ia herehia.

I muri iho i tā ’oe pure, ’a rave i te tahi ’ohipa au nōna ! E ani ānei iāna ’ia haere mai i te tahi ’ohipara’a nā te Feiā ’Āpī ’e ’aore rā i te hō’ē tere ’e te mau hoa. ’A pūpū atu i te tauturu nō te mau ’ohipa ha’api’ira’a. ’Aita ana’e ’a aroha atu ma te mata ’ata’ata. E ti’a i te mau mea iti ha’iha’i e fa’atupu i te maita’i rahi… i roto i tō ’ōrua orara’a to’opiti !