Parau poro’i nā te mau tuahine hāhaere, tēnuare 2017
Te tumu o te Sōtaiete Tauturu
’A tuatāpapa nā roto i te pure i teie māteria ma te ’imi ’ia ’ite e aha te fa’a’ite atu.
Te Fa’aro’o, Te ’Utuāfare, Te Tōtauturu
Te tumu o te Sōtaiete Tauturu, ’o « te fa’aineinera’a ïa i te mau vahine nō te mau ha’amaita’ira’a o te ora mure ’ore », tē parau ra Linda K. Burton, peresideni rahi nō te Sōtaiete Tauturu.1 E mea nā roto i te fa’aro’o, te ’utuāfare ’e te tauturura’a tātou e ’amo ai « i tā tātou tuha’a faufa’a rahi nō te ’ohipa ».2
Te Sōtaiete Tauturu, « e ’ohipa ïa i te pae tino ’e i te pae vārua », tē parau nei Carole M. Stephens, tauturu mātāmua i roto i te peresidenira’a rahi o te Sōtaiete Tauturu. « Terā tā te mau vahine i rave i te tau o te Fa’aora, ’e terā ato’a tā tātou e tāmau nei i te rave ».3
Mai tā tātou e hi’o nei i te vahine samaria i te ’āpo’o pape ra, tei fa’aru’e i tāna fāri’i pape nō te horo e parau ia vetahi ’ē ē, e peropheta ’o Iesu (hi’o Ioane 4:6–42), ’e ’aore rā ia Phebe, tei tāvini ia vetahi ’ē ma te ’oa’oa i roto i tōna orara’a (hi’o Roma 16:1–2), tē ’ite nei tātou i te mau hi’ora’a nō te mau vahine i te tau o te Fa’aora tei ’amo i te hō’ē tuha’a rahi nō te haerera’a mai i te Mesia. ’O ’Oia te ta’ata e ’īriti i tō tātou ’ē’a nō te ora mure ’ore (hi’o Ioane 3:16).
’Ia hi’o tātou i tō tātou mau pionie tuahine i Nauvoo, i Illinois, tei putuputu i te fare nō Sarah Kimball i te matahiti 1842 nō te fa’ati’a i tā rātou iho fa’anahora’a, tē ’ite nei tātou i te ’ōpuara’a a te Atua nō te fa’ataera’a mai i te Sōtaiete Tauturu ’ei ’āpiti au nō te autahu’ara’a. ’Ua pāpa’i Eliza R. Snow i te hō’ē papa ture ’e ’ua hi’o te peropheta Iosepha Semita i te reira. ’Ua tae mai te mana’o ē, ’aita te ’Ēkālesia i oti maita’i i te fa’anahohia maori rā ’ia fa’anahohia te mau vahine. ’Ua parau ’oia ē, ’ua fāri’i te Fatu i tā rātou pūpūra’a, e ’ohipa maita’i atu ā rā e vai ra. « E fa’anahonaho vau i te mau vahine i raro a’e i te autahu’ara’a mai te au i te hōho’a nō te autahu’ara’a », ’ua parau ’oia.4
« E ’ere te Sōtaiete Tauturu i te hō’ē noa pupu vahine e tāmata ra i te rave i te maita’i i roto i te ao nei. E mea ta’a ’ē te reira. ’O te ‘tahi mea maita’i a’e nō te mea ’ua fa’anahonahohia i raro a’e i te mana nō te autahu’ara’a. ’Ua riro tōna fa’anahonahora’a ’ei tufa’a tītauhia i roto i te ha’apararera’a i te ’ohipa a te Atua i ni’a i te fenua nei ».5
Te tahi atu mau pāpa’ira’a mo’a ’e mau ha’amāramaramara’a
Te Parau Ha’api’ira’a ’e te mau Parau Fafau 25:2–3, 10; 88:73; reliefsociety.lds.org
© 2017 nā Intellectual Reserve, Inc. Fatura’a pāruruhia. Nene’ihia i te Mau Hau Amui nō Marite. Parau fa’ati’a nō te reo peretāne : 6/16. Parau fa’ati’a nō te ’īritira’a : 6/16. ’Īritira’a nō Visiting Teaching Message, January 2017. Tahitian. 97921 895