Ngaahi Talanoa ʻo Sīsuú
Naʻe Papitaiso ʻa Sīsū
Naʻe hoko ʻa Sione Papitaiso ko ha palōfita māʻongoʻonga. Naʻá ne akoʻi ʻa e kakaí ke nau fakatomala. Naʻá ne papitaiso leva kinautolu.
ʻI ha ʻaho ʻe taha naʻe papitaiso ai ʻe Sione ʻa e kakaí ʻi he vaitafe ko Soataní. Naʻe hāʻele mai ʻa Sīsū ʻo folofola kia Sione ke Ne papitaiso ia. Naʻe ʻilo ʻe Sione naʻe ʻikai ha angahala ʻa Sīsū. Ko e hā leva naʻe fie papitaiso ai ʻa Sīsuú?
Naʻe folofola ʻe Sīsū naʻe fie maʻu ke Ne talangofua ki he ngaahi fekau kotoa pē. Ko e papitaisó ko ha fekau ia.
Hili hono papitaiso ʻe Sione ʻa Sīsuú, naʻe hā mai ha lupe ke fakahā ʻoku ʻi ai e Laumālie Māʻoniʻoní. Naʻe ongo mai e leʻo ʻo e Tamai Hēvaní mei he langí, ʻo folofola mai, “Ko hoku ʻAlo ʻofaʻangá ʻeni, ʻa ia ʻoku ou fiemālie lahi aí” (Mātiu 3:17).
Te tau lava ʻo talangofua ki he ngaahi fekaú mo fili ke papitaiso, hangē ko Sīsuú. ʻE lava leva ke hilifakinima kitautolu ke tau maʻu ʻa e meʻafoaki ʻo e Laumālie Māʻoniʻoní ◼