សារលិខិតគណៈប្រធានទីមួយ ខែ មិនា ឆ្នាំ ២០១៧
បំពាក់គ្រឿងសឹកដោយ សេចក្ដីសុចរិត
ប្រធាន ថូម៉ាស អេស ម៉នសុន ដែលជាព្យាការីរបស់ព្រះនៅលើផែនដីនេះបានប្រកាសថា « សព្វថ្ងៃនេះ យើងត្រៀមខ្លួនដើម្បីប្រយុទ្ធប្រឆាំងនឹងអំពើបាប អបាយមុខ និង អំពើអាក្រក់ដែលមាននៅចំពោះមុខយើង » ។១
តើអ្នកភ្ញាក់ផ្អើលទេប្រសិនបើអ្នកដឹងថា ប្រធាន ម៉នសុន បានប្រកាសដូចនេះតាំងពី ៥០ ឆ្នាំមុនមកម៉្លេះនោះ ? ប្រសិនបើយើងបានត្រៀមខ្លួនប្រយុទ្ធប្រឆាំងនឹងអំពើទុច្ចរិតដែលមិនធ្លាប់មានពីមុនមកនៅគ្រានោះ តើនឹងមានអំពើអាក្រក់កាន់តែច្រើនឡើងដល់កម្រិតណាទៅដែលគំរាមកំហែងយើងនៅសព្វថ្ងៃនេះ ? ព្រះអម្ចាស់បានមានបន្ទូលប្រកាសអំពីគ្រាកាន់កាប់ត្រួតត្រាយើងនេះដោយហេតុផលមួយត្រឹមត្រូវថា « មើលចុះ ខ្មាំងសត្រូវកំពុងរួមគ្នា » ( គ. និង ស. ៣៨:១២ ) ។
សង្គ្រាមដែល « យើងចូលច្បាំង »២ បានចាប់ផ្ដើមតាំងពីមុនយើងកើតលើផែនដីមកម៉្លេះ ។ វាបានចាប់ផ្ដើមតាំងពីមុនផែនដីត្រូវបានបង្កើតឡើងមកម៉្លេះ ។ វាបានកើតឡើងតាំងពីច្រើនសហស្សវត្សរ៍មុននៅក្នុងជីវិតមុនផែនដី ជាពេលដែលសាតាំងបានបះបោរ ហើយ « បានខំរកបំផ្លាញសិទ្ធិជ្រើសរើសរបស់មនុស្ស » ( ម៉ូសេ ៤:៣ ) ។
សាតាំងបានចាញ់ក្នុងចម្បាំងនោះ ហើយ « ត្រូវបោះទំលាក់ទៅផែនដី » ( វិវរណៈ ១២:៩ ) ជាទីដែលវាបន្តធ្វើសង្គ្រាមសព្វថ្ងៃនេះ ។ នៅលើផែនដីនេះ « វាបានធ្វើសង្គ្រាមជាមួយនឹងពួកបរិសុទ្ធនៃព្រះ ហើយព័ទ្ធជុំវិញពួកគេ » ( គ. និង ស. ៧៦:២៩ ) ដោយនូវសេចក្ដីកុហក ការបញ្ឆោត និង ការល្បួងនានា ។
វាធ្វើសង្គ្រាមប្រឆាំងនឹងពួកព្យាការី និង ពួកសាវក ។ វាធ្វើសង្គ្រាមប្រឆាំងនឹងច្បាប់ព្រហ្មចារីភាព និង បរិសុទ្ធភាពនៃអាពាហ៍ពិពាហ៍ ។ វាធ្វើសង្គ្រាមប្រឆាំងនឹងក្រុមគ្រួសារ និង ព្រះវិហារបរិសុទ្ធ ។ វាធ្វើសង្គ្រាមប្រឆាំងនឹងអ្វីដែលជាសេចក្ដីល្អ បរិសុទ្ធ និង ពិសិដ្ឋ ។
តើយើងប្រយុទ្ធនឹងមារសត្រូវបែបនេះតាមរបៀបណា ? តើយើងប្រយុទ្ធប្រឆាំងនឹងអំពើអាក្រក់ ដែលយើងឃើញថាកំពុងគ្របដណ្ដប់ពាសពេញពិភពលោកយើងនេះតាមរបៀបណា ? តើអ្វីទៅដែលជាគ្រឿងសឹករបស់យើង ? តើនរណាដែលជាសម្ព័ន្ធមិត្តរបស់យើង ?
ព្រះចេស្ដានៃកូនចៀម
ព្យាការី យ៉ូសែប ស៊្មីធ បានបង្រៀនថា សាតាំងមានអំណាចមកលើយើងតែតាមរយៈកម្រិតដែលយើងអនុញ្ញាតឲ្យវាមានអំណាចប៉ុណ្ណោះ ។៣
នៅពេលប្រមើលមើលអំពីជំនាន់របស់យើង នីហ្វៃ « បានឃើញថាព្រះចេស្ដានៃកូនចៀមនៃព្រះ បានយាងចុះមកសណ្ឋិតលើពួកបរិសុទ្ធក្នុងសាសនាចក្រនៃកូនចៀម ហើយលើរាស្ត្រដែលនៅក្នុងសេចក្ដីសញ្ញានៃព្រះអម្ចាស់ ដែលបានខ្ចាត់ខ្ចាយពាសពេញលើផ្ទៃផែនដី ហើយ ពួកគេប្រដាប់អាវុធដោយសេចក្ដីសុចរិត និងដោយព្រះចេស្ដានៃព្រះ ដោយសិរីល្អដ៏អស្ចារ្យ » ( នីហ្វៃទី១ ១៤:១៤ គូសបញ្ជាក់បន្ថែម ) ។
តើយើងបំពាក់គ្រឿងសឹកលើខ្លួនយើងដោយសេចក្ដីសុចរិត និង ដោយអំណាចតាមរបៀបណា ? យើងរក្សាថ្ងៃឈប់សម្រាកឲ្យបានបរិសុទ្ធ ហើយគោរពដល់បព្វជិតភាព ។ យើងធ្វើ ហើយរក្សាសេចក្ដីសញ្ញា ស្រាវជ្រាវពង្សប្រវត្តិ ហើយទៅចូលព្រះវិហារបរិសុទ្ធ ។ យើងបន្តខិតខំដោយឥតឈប់ឈរដើម្បីប្រែចិត្ត ហើយទូលអង្វរសូមព្រះអម្ចាស់ឲ្យ « ប្រទាននូវព្រះលោហិតដ៏ធួននៃព្រះគ្រីស្ទ ដើម្បីឲ្យយើងអាចបានទទួលនូវការអភ័យទោសចំពោះអំពើបាបទាំងឡាយរបស់យើង » ( ម៉ូសាយ ៤:២ ) ។ យើងអធិស្ឋាន ហើយបម្រើ ហើយថ្លែងទីបន្ទាល់ ព្រមទាំងអនុវត្តសេចក្ដីជំនឿលើព្រះយេស៊ូវគ្រីស្ទ ។
យើងក៏បំពាក់គ្រឿងសឹកលើខ្លួនយើងដោយសេចក្ដីសុចរិត និង ដោយអំណាចដែរនៅពេលយើង « រក្សាទុកក្នុងគំនិត [ របស់យើងរាល់គ្នា ] បន្តនូវព្រះបន្ទូលទាំងឡាយខាងជីវិត » ( គ. និង ស. ៨៤:៨៥ ) ។ យើងរក្សាទុកព្រះបន្ទូលទាំងនោះដោយផ្ចង់អារម្មណ៍ទៅលើព្រះគម្ពីរដ៏បរិសុទ្ធទាំងឡាយ និង ទៅលើប្រសាសន៍របស់ពួកអ្នកបម្រើដ៏ជម្រើសរបស់ព្រះអម្ចាស់ ដែលនឹងប្រាប់អំពីព្រះបំណង ព្រះហឫទ័យ និង ព្រះសូរសៀងរបស់ទ្រង់ ( សូមមើល គ. និង ស. ៦៨:៤ ) នៅក្នុងសន្និសីទទូទៅខែក្រោយ ។
នៅពេលយើងច្បាំងជាមួយអំពើអាក្រក់ យើងត្រូវតែចងចាំជានិច្ចថា យើងមានជំនួយពីទាំងសងខាងនៃវាំងនន ។ សម្ព័ន្ធមិត្តរបស់យើងរួមមាន ព្រះវរបិតាសួគ៌ ព្រះអម្ចាស់យេស៊ូវគ្រីស្ទ និង ព្រះវិញ្ញាណបរិសុទ្ធ ។
សម្ព័ន្ធមិត្តរបស់យើងក៏រួមមានពលទ័ពសួគ៌ាដែលយើងមិនអាចមើលឃើញនឹងភ្នែកផងដែរ ។ អេលីសេ បានប្រាប់យុវជនដែលមានការភិតភ័យម្នាក់នៅពេលលោក និង យុវជននោះត្រូវប្រឈមមុខនឹងកងពលអាក្រក់ដូចនេះថា « កុំខ្លាចអ្វីឡើយ ដ្បិតពួកដែលនៅខាងយើង មានគ្នាច្រើនជាងពួកដែលនៅខាងគេទៅទៀត » ( សូមមើល ពង្សាវតារក្សត្រ ទី២ ៦:១៥–១៦ ) ។
យើងមិនត្រូវខ្លាចអ្វីឡើយ ។ ព្រះមានព្រះទ័យស្រឡាញ់ពួកបរិសុទ្ធរបស់ទ្រង់ ។ ទ្រង់នឹងមិនបោះបង់យើងចោលឡើយ ។
ខ្ញុំដឹងថា ព្រះបានបំពេញតាមសេចក្ដីទូលអង្វររបស់ខ្ញុំឲ្យរំដោះខ្ញុំចេញពីសេចក្ដីអាក្រក់ តាមរយៈការឆ្លើយតបទៅនឹងការអធិស្ឋានរបស់ខ្ញុំ ។ ខ្ញុំសូមថ្លែងទីបន្ទាល់ថា ដោយមានជំនួយពីព្រះជាព្រះវរបិតា ព្រះអង្គសង្គ្រោះនៃពិភពលោក និង ព្រះវិញ្ញាណបរិសុទ្ធ នោះយើងអាចទុកចិត្តថា យើងនឹងត្រូវបានប្រទានឲ្យនូវអំណាចលើសលុបដើម្បីតតាំងរាល់សេចក្ដីអាក្រក់ដែលយើងជួបប្រទះ ។
សូមឲ្យយើងបានបំពាក់គ្រឿងសឹកដោយសេចក្ដីសុចរិត ដើម្បីយើងអាចមានទំនុកចិត្តថាយើងនឹងមានជ័យជម្នះនៅទីបំផុត ។
© 2017 by Intellectual Reserve, Inc. All rights reserved. បោះពុម្ពនៅ ស.រ.អា. ។ អនុមតិជាភាសាអង់គ្លេស ៖ 6/16 ។ អនុមតិបកប្រែ ៖ 6/16 ។ ការបកប្រែនៃ First Presidency Message, March 2017 ។ Cambodian ។ 97923 258