សារលិខិតបង្រៀនសួរសុខទុក្ខ ខែ មិនា ឆ្នាំ ២០១៧
ព្រះចេស្ដានៃការប្រោសលោះរបស់ព្រះយេស៊ូវគ្រីស្ទ និង នៃដង្វាយធួនរបស់ទ្រង់
សូមសិក្សាអត្ថបទនេះប្រកបដោយការអធិស្ឋាន និងស្វែងរកការបំផុសគំនិត ដើម្បីដឹងពីអ្វីដែលត្រូវចែកចាយ ។ តើការយល់ដឹងអំពីគោលបំណងនៃសមាគមសង្គ្រោះ នឹងរៀបចំបុត្រីទាំងឡាយរបស់ព្រះ ឲ្យទទួលបានពរជ័យនៃជីវិតដ៏នៅអស់កល្បជានិច្ចយ៉ាងដូចម្ដេច ?
« ខ្ញុំអាចនឹងធ្វើគ្រប់ទាំងអស់បាន ដោយសារព្រះគ្រីស្ទដែលទ្រង់ចម្រើនកម្លាំងដល់ខ្ញុំ » ( ភីលីព ៤:១៣ ) ។ ប្រធាន ឌៀថើរ អេស្វ អុជដូហ្វ ទីប្រឹក្សាទីពីរក្នុងគណៈប្រធានទីមួយ មានប្រសាសន៍ថា « ទោះជាយើងមានភាពទន់ខ្សោយក្ដី យើងអាចយកឈ្នះលើវាបាន » ។ « ប្រាកដណាស់ គឺដោយសារព្រះគុណនៃព្រះ បើយើងបន្ទាបខ្លួន ហើយមានសេចក្ដីជំនឿ នោះភាពទន់ខ្សោយនឹងបានប្រែទៅជាខ្លាំងពូកែវិញ » ។១
ព្រះអង្គសង្គ្រោះមានព្រះបន្ទូលនៅក្នុងគោលលទ្ធិ និង សេចក្តីសញ្ញាថា « យើងនឹងទៅពីមុខអ្នក ។ យើងនឹងនៅខាងស្ដាំដៃអ្នក ហើយខាងឆ្វេងដៃអ្នក ហើយព្រះវិញ្ញាណរបស់យើងនឹងសណ្ឋិតនៅក្នុងដួងចិត្តរបស់អ្នក ហើយពួកទេវតារបស់យើងនៅព័ទ្ធជុំវិញអ្នក ដើម្បីទ្រអ្នកឡើង » ( គ. និង ស. ៨៤:៨៨ ) ។
អែលឌើរ ដាវីឌ អេ បែដណា ក្នុងកូរ៉ុមនៃពួកសាវកដប់ពីរនាក់មានប្រសាសន៍ថា « នីហ្វៃគឺជាគំរូអំពីមនុស្សម្នាក់ដែលបានដឹង យល់ ហើយពឹងផ្អែកលើព្រះចេស្ដានៃការប្រោសលោះរបស់ព្រះអង្គសង្គ្រោះ »។ « ពួកបងប្រុសរបស់នីហ្វៃបានយកខ្សែចងលោក ហើយគ្រោងនឹងសម្លាប់លោកចោល ។ សូមកត់សម្គាល់សេចក្ដីអធិស្ឋានរបស់នីហ្វៃ ៖ ‹ ឱ ព្រះអម្ចាស់អើយ ស្របតាមសេចក្ដីជំនឿរបស់ទូលបង្គំ ដែលមានចំពោះទ្រង់ សូមព្រះអង្គរំដោះទូលបង្គំឲ្យរួចផុតពីកណ្ដាប់ដៃបងៗទូលបង្គំផង ព្រះពរ សូមប្រទានកម្លាំងដល់ទូលបង្គំ ដើម្បីឲ្យទូលបង្គំអាចផ្ដាច់ខ្សែ ដែលចងទូលបង្គំនេះបាន › ( នីហ្វៃទី១ ៧:១៧ គូសបញ្ជាក់បន្ថែម ) ។
« … នីហ្វៃមិនបានអធិស្ឋានសុំឲ្យស្ថានភាពរបស់លោកបានផ្លាស់ប្តូរទេ ។ ផ្ទុយទៅវិញ លោកបានអធិស្ឋានទូលសូមកម្លាំងដើម្បីផ្លាស់ប្តូរស្ថានភាពរបស់លោក ។ ហើយខ្ញុំជឿថា លោកបានអធិស្ឋានតាមរបៀបមួយដ៏ខ្លី ដោយសារលោកបានដឹង យល់ ហើយបានទទួលបទពិសោធន៍នៃព្រះចេស្ដានៃការប្រោសលោះនៃដង្វាយធួន ។
« ខ្ញុំមិនគិតថា ចំណងដែលបានចងនីហ្វៃ ត្រូវបានដាច់ចេញពីដៃ និង កដៃរបស់លោកដោយអព្ភូតហេតុនោះទេ ។ ផ្ទុយទៅវិញ ខ្ញុំគិតថា លោកត្រូវបានប្រទានពរទាំងកម្លាំងផ្ទាល់ខ្លួន និង ការស៊ូទ្រាំដែលហួសពីសមត្ថភាពពីធម្មជាតិរបស់លោក ដែលក្រោយមក ធ្វើឲ្យលោកស្ថិតនៅក្នុង ‹ កម្លាំងនៃព្រះអម្ចាស់ › ( ម៉ូសាយ ៩:១៧ ) ដែលបានខិតខំ ហើយមួលកន្ត្រាក់ ហើយទីបំផុតអាចបណ្ដាច់ខ្សែនោះបាន » ។២
ខគម្ពីរ និង ព័ត៌មានបន្ថែម
© 2017 by Intellectual Reserve, Inc. All rights reserved. បោះពុម្ពនៅ ស.រ.អា. ។ អនុមតិជាភាសាអង់គ្លេស ៖ 6/16 ។ អនុមតិបកប្រែ ៖ 6/16 ។ ការបកប្រែនៃ Visiting Teaching Message, March 2017 ។ Cambodian ។ 97923 258